جاسىراتىنى جوق, ەل فۋتبولشىلارى قۇراماعا باس باپكەر بولىپ الەكساندر بوروديۋك كەلگەلى ۇپايعا جارىماي-اق قويدى. رەسەيلىك ماماننىڭ قاراماعىندا جاتتىققان كەزىندە قازاقستان فۋتبولشىلارى ءتورت ويىننىڭ بارىندە جەڭىلىسكە ۇشىرادى. الدىمەن جولداستىق كەزدەسۋدە كيپر قۇراماسىنا 1:3 ەسەبىمەن ەسە جىبەردى. ودان كەيىن 2018 جىلعى الەم چەمپيوناتىنىڭ ىرىكتەۋ كەزەڭىندە ارمەنيادان 0:2, دانيادان 1:3 جانە چەرنوگوريادان 0:3 ەسەپتەرىمەن جەڭىلدى.
بۇرناعى كۇنى چەرنوگوريامەن وتكەن باسەكەنىڭ ءبىرىنشى بولىگىندە قانداي دا ءبىر كوماندا باسىمدىق تانىتتى دەپ ايتا قويۋ قيىن بولدى. ماتچ الما-كەزەك شابۋىلمەن وربىگەن. دەگەنمەن, جەكەلەگەن تۇستاردا قوناقتاردىڭ ءبىر جەڭنەن قول, ءبىر جاعادان باس شىعارا بىلگەن ۇيىمشىل ۇجىم ەكەندىگى بايقالىپ تۇردى. ونىڭ ۇستىنە, ولار جەكەلەگەن ويىنشى-لارىنىڭ شەبەرلىگى جاعىنان دا ءبىزدىڭ فۋتبولشىلارعا قاراعاندا, الدەقايدا ءتاۋىر كورىنگەن.
جالپى, ليۋبيشا تۋمباكوۆيچتىڭ شاكىرتتەرى بۇل ويىندا «ە» توبىنداعى تۇيىسپە ماتچتان بىردەن ءبىر دامەلى كوماندا ەكەندىكتەرىن كورسەتتى. ماتچتىڭ 31-مينۋتىندا قوناقتاردىڭ شابۋىلشىسى ستەۆان يوۆەتيچ تاماشا پاس بەرىپ ماركو ۆەشوۆيچتى ءبىزدىڭ قاقپاشىمەن بەتپە-بەت شىعاردى. وبالى نەشىك, داۆيد لوريا تايسالماستان قارسى ۇمتىلعان. بىراق, ايلالى ۆەشوۆيچ دوپتى قاقپاشىدان ادەمى اسىرىپ, ەسەپتى اشىپ كەتتى.
ارادا التى مينۋت وتكەندە ءبىزدىڭ ويىنشىلاردىڭ ەسەپتى تەڭەستىرۋگە مۇمكىندىگى بولعان. عافۋرجان سۇيىمباەۆتىڭ اۋەلەتە بەرگەن پاسىن يسلامبەك قۋات باسپەن ۇرعان ەدى, دوپ قاقپانىڭ ماڭدايشاسىنا ءتيىپ, كەيىن سەرپىلدى.
ەكىنشى تايمدا «قاراتاۋلىقتاردىڭ» شابۋىلشىسى فاتوس بەچيراي ستاندارتتى جاعدايدان تەبىلگەن دوپقا بارىنەن بۇرىن جەتىپ, باسپەن گول سوقتى. ال كەزدەسۋدىڭ 63-مينۋتىندا ماركو سيميچ قاقپاشى لوريانى تاعى دا قاپى قالدىرىپ, ءۇشىنشى دوپتى ەنگىزدى.
سونىمەن, فۋتبول الەمىندە «قارشىعا» دەپ اتالىپ جۇرگەن قازاق ەلىنىڭ كومانداسى چەرنوگوريا قۇراماسىنان وسىمەن ەكىنشى رەت جەڭىلدى. بىلتىر, قازان ايىنىڭ 8-ءى كۇنى ءبىزدىڭ فۋتبولشىلار چەرنوگوريا جەرىندە 0:5 بولىپ تىزە بۇككەن بولاتىن.
بۇگىن قازاقستان قۇراما كومانداسى «ە» توبىندا كوش باستاپ كەلە جاتقان پولشا ەلىنىڭ فۋتبولشىلارىمەن كۇش سىناسادى.
قايرات جۇنىس ۇلى
