قامباسى استىققا, توسكەيى مالعا تولعان اقتەرەك اۋىلىندا ايتا جۇرەر جاقسىلىقتار جەتەرلىك

الماتى – تاشكەنت تاسجولىنىڭ ۇستىڭگى قاپتالىنا كولبەي ورنالاسقان اقتەرەك اۋىلى الماتى وبلىسىنىڭ جامبىل وبلىسىمەن شەكارالاس جاتقان ىرگەلى ەلدى-مەكەنى. مامىراجاي كۇيدەگى تازا قازاقى اۋىلدىڭ بۇگىنگى تىنىس-تىرشىلىگى, قام-قارەكەتى كوز قۋانتار­لىق. كەزىندە وتپەلى كەزەڭنىڭ قيىن­شىلىعىن باستان وتكەرگەنمەن, اۋىل تىزگىنىن تەمىرلان ءشاينۇسىپوۆ قولىنا العالى جىرتىقتارى جامالىپ, تەسىكتەرى ءبۇتىن­دە­لىپ, تابىستارى ەسەلەنىپ, بۇگىندە ەل­دىڭ ەڭسەسى كوتەرىڭكى, قازان-وشاق جوعا­رى دەگەندەي, تۇرمىستارى جاقسارعان. بيىل اقتەرەك جەكە شارۋا قوجا­لىعىنىڭ ەڭبەككەرلەرى بىتىك ەگىن ءوسىرىپ, ءار گەكتاردان 15 تسەنتنەردەن استىق جيناپ, قامبالارىنا 5 مىڭ توننا بيداي قۇيىپ الدى. ەگەر اقتەرەك وندىرىستىك كووپەراتيۆى قۇرىلعان 1994 جىلى وتىزداي تەحنيكا, ءىرى قارا مالدان ەكى بۇقا, ال قوي, جىلقىدان تۇقىم قالماسا, بۇگىندە اۋىلدان 50 مىڭعا جۋىق قوي, 6 مىڭ ءىرى قارا, 2,5 مىڭ جىلقى ءورىپ شىعادى. وسى ۋاقىتقا دەيىن اۋىلداعى ءبىر ءۇيدىڭ مۇرتى بۇزىلماعان. قايتا حالىقتىڭ جاعدايىنىڭ جاقسارعانى عوي, اۋىل سىرتىنان جاڭا كوشە ءتۇستى. ەڭ ءبىر ايتا كەتەرلىك جاعىمدى جاڭا­لىق, تەمىرلان بيىل جاعدايى تومەن قوجالىق مۇشەلەرىنە 12 جاڭا ءۇي سالىپ, قونىس تويىن تويلادى. قالعاندارىنىڭ ءۇي, قورا-جايىن قورشاپ, كوشەنىڭ ءسانى­نە ءسان قوستى. بۇدان بىرنەشە جىل بۇ­رىن 3,5 مىڭ گا جەردى قورشاپ 1,5 مىڭ ءتۇپ وتىرعىزعان الما, المۇرت اعاشتارى بىلتىردان باستاپ جەمىس بەرە باستادى. جىل سايىن قوجالىق مۇشەلەرىنە باۋ-باقشا داقىلدارىن, 5 توننا كومىرىن, بي­دايىن, جەمىن-ءشوبىن تەگىن ءتۇسىرىپ بەرەدى. اۋىل اۋدان ورتالىعىنان 90 شا­قى­رىم قاشىقتا ورنالاسقاندىقتان حالىققا تۇرمىستىق قىزمەت كورسەتۋ سالاسى دا وڭتايلى ۇيىمداستىرىلعان. شاشتاراز, ءدارىحانا, دۇكەن, ستوماتولوگيا كابينەتى, مەيرامحانا, ناۋبايحانا, بيليارد اۋىل ادامدارىنا قالتقىسىز قىزمەت جاساۋدا. ارينە, اقتەرەكتىكتەرگە اۋدان, وبلىس اكىمدىكتەرى قاشاندا قولداۋ كورسەتىپ, كومەكتەسىپ وتىرادى. بۇعان دەيىن اۋىل­داعى ورتا مەكتەپتى كۇردەلى ءجون­دەۋ­دەن وتكىزسە, بيىل وبلىستىق بيۋدجەتتەن بولىنگەن قاراجاتقا جامانتى كوشەسىنە اسفالت توسەلىپ, تۇرعىندار­دىڭ كوڭىلى ءبىر كوتەرىلىپ قالدى. ءبىر عانا «اتتەگەنايلارى» اۋىز سۋ ماسەلەسى تو­لىق شەشىمىن تاپپاي وتىر. بىلتىر وب­لىس بيۋدجەتىنەن قوماقتى قارجى ءبولى­نىپ, ءبىر ۇڭعىما قازىلسا, قالعان­دارىن جانە ءۇيدى-ۇيگە سۋ تارتۋ جۇمىستارى كەلەسى جىلدىڭ ەسەبىنەن قاراستى­رىل­ماق. اقىرىن ءجۇرىپ, انىق باساتىن تەمىرلان وسى اۋىلدا تۋىپ, وسكەن جىگىت بولعاندىقتان, جەر جاعدايىن, اۋىل تىرشىلىگىن وتە جاقسى بىلەدى. اۋىلدا تۇ­را­تىن بەسىكتەگى بالادان ەڭكەيگەن قارتقا دەيىن بەس ساۋساقتاي بىلەدى, ولاردىڭ ءار­قايسىسىنىڭ قام-قارەكەتىنەن, تۇرمىس جاعدايىنان حاباردار. سوندىقتان دا توي-تومالاق, ءولىم-جىتىمدە, تۇرمىسى نا­شار وتباسىلارىنا قولىنان كەلگەن كومەگىن بەرۋدەن ايانىپ قالمايدى. ونىڭ بۇل قامقورلىعىن اۋىلداستارى دا باعالاپ, اقتەرەكتىڭ بەل بالاسى اتان­عان تەمىرلانعا قاشاندا ريزاشى­لىق­تارىن ءبىلدىرىپ جاتقانى. مىنە, وسى توگىلگەن تەر, جاساعان ەڭبەك ەسكەرۋسىز قالماي, قوجالىق توراعاسى 2008 جىلى «قۇرمەت» وردەنىمەن ماراپاتتالدى. ال اۋىلداستارى بولسا الداعى ۋاقىتتا جاڭاشىل دا جىگەرلى باسشىسىنان تاعى دا تىڭ ىستەر, جاعىمدى جاڭالىقتار كۇتەدى. گۇلزەينەپ سادىرقىزى.