ۇلتتىق اسكەري-پاتريوتتىق ورتالىقتا ۇيىمداستىرىلعان سالتاناتتى شارادا شەكارا قىزمەتىندە ۇزاق جىلدار ەڭبەك ەتىپ, ەل تىنىشتىعى ءۇشىن ماڭداي تەرىن توككەن ارداگەرلەرگە سىي-قۇرمەت كورسەتىلدى. سونداي-اق, وسى كۇندە مىندەتىن ءمىنسىز اتقارىپ, ارىپتەستەرىنە ۇلگى بولعان ۇزدىك شەكاراشىلار مەن سالانىڭ ماقتاۋلى ماماندارى دا باسشىلىق تاراپىنان ءتۇرلى ماراپاتتارعا يە بولدى.
كاسىبي مەرەكەنىڭ 25 جىلدىعى قارساڭىندا رەسپۋبليكا اۋماعىنداعى شەكارالىق بەكەتتەردى شارلاعان اتالعان مەكەمەنىڭ مەرەيتويلىق ءرامىزى استاناعا قايتا ورالدى. ونى سالتاناتتى جاعدايدا قابىلداپ العان ۇلتتىق قاۋىپسىزدىك كوميتەتى توراعاسىنىڭ ورىنباسارى-شەكارا قىزمەتىنىڭ ديرەكتورى گەنەرال-مايور دارحان ءدىلمانوۆ تاۋەلسىزدىكتىڭ العاشقى جىلدارىندا جاڭا قالىپتاسقان مەملەكەتتىڭ شەكارالىق قاداسىن قاعىپ, تۇعىرىن نىقتاۋدا, ايقىن ماقسات, ناقتى تاپسىرمالاردى جۇكتەۋدە ەلباسى نۇرسۇلتان نازارباەۆتىڭ ەڭبەگى ەرەن ەكەندىگىن ەسكەرتىپ ءوتتى.
«كەڭەس كەزەڭىندە قازاقستاننىڭ شىعىستاعى كورشىسى قىتاي ەلىمەن 1 500 شاقىرىمداي عانا شەكارالىق اۋماعى بولىپ, سونى ءجىتى باقىلاۋدا ۇستادى. ال تاۋەلسىزدىك العاننان كەيىنگى جىلداردا بۇل كورسەتكىش كولەمى ون بەس مىڭ شاقىرىمنان اسىپ ءتۇستى. جاس مەملەكەت ءۇشىن وسىنشاما بايتاق جەردى كوزدىڭ قاراشىعىنداي قورعاۋ مەن ساقتاۋ وڭاي شارۋا ەمەس ەكەنى بەلگىلى ەدى. مەملەكەت باسشىسى ايقىنداپ بەرگەن باعىت-باعدارلارمەن جۇرە وتىرىپ, ءبىز بۇگىنگىدەي تاماشا جەتىستىكتەرگە جەتتىك. قاي مەملەكەتتى الساق تا, ونىڭ الەۋەتى ۇلتتىق قاۋىپسىزدىك قىزمەتىنىڭ جاي-كۇيىمەن ۇشتاساتىندىعىن ەسكەرسەك, ءبىزدىڭ بۇگىنگى بيىكتەرىمىز ءبىر بەلەس بولىپ تابىلادى», دەدى ول.
د.ءدىلمانوۆتىڭ ايتۋىنشا, ءوزى جەتەكشىلىك ەتەتىن سالا ماماندارى بۇل كۇندە سوڭعى ۇلگىدەگى زاماناۋي قارۋ-جاراق پەن ءتۇرلى تەحنيكالارمەن قامتاماسىز ەتىلىپ, قاتارلارى اسكەري مىندەتتەرىن ءمىنسىز ورىنداي الاتىن كاسىبي شەبەرلىكتەرى شىڭدالعان تاجىريبەلى ماماندارمەن تولىققان. قازاقستان الەمدەگى قۇرلىقتىق شەكاراسى اۋقىمدى ەلدەردىڭ قاتارىندا. ۇشقان قۇستىڭ قاناتىن تالدىرىپ, تۇلپاردىڭ تۇياعىن توزدىراتىن ۇلى دالا ەلىنىڭ مەملەكەتتىك شەكاراسىن كۇزەتۋ ءىسىنىڭ شەبەرلەرى بيىلعى جىلدىڭ العاشقى جارتىسىن جوعارى كورسەتكىشتەرمەن قورىتىندىلاعان. اتاپ ايتقاندا, التى اي ىشىندە ەل شەكاراشىلارى 12 مىڭنان استام مەملەكەتتىك شەكارا قۇقىن بۇزۋ وقيعاسىن تىركەگەن. سول سياقتى ەسىرتكى زاتتارىن تاسىمالداۋدىڭ استىرتىن جولدارىن انىقتاۋ ىسىندە دە مامانداردىڭ ءابجىل ارەكەتتى ايقىن كورىنگەن.
«اۋىز تولتىرىپ ايتارلىقتاي بيىلعى جەتىستىكتەرىمىز از ەمەس. ونىڭ ءبارى دە قاتارىمىزداعى سەنىمدى سەرىكتەس, بىلىكتى ارىپتەستەرىمىزدىڭ ەرەن ەڭبەگىنىڭ ناتيجەسى. سوندىقتان دا 1 280 شەكاراشىنى كاسىبي مەرەكە كۇنى قارساڭىندا سالتاناتتى تۇردە ماراپاتتاعاندى ءجون سانادىق. ولاردىڭ كەيبىرىنىڭ مەرزىمىنەن بۇرىن شەنى وسسە, ەندى ءبىرىنىڭ كەۋدەسىنە مەرەكەلىك توسبەلگى تاعۋدامىز», دەدى د.ءدىلمانوۆ.
نۇرلىبەك دوسىباي,
«ەگەمەن قازاقستان»
