مەرەيتويلى ۆەلوشەرۋ كوپتەگەن كورسەتكىشتەر جاعىنان رەكورد ورناتتى. بيىل ءىس-شاراعا 1500-دەن اسا ادام قاتىسىپ, ولاردىڭ ىشىندەگى 718 قاتىسۋشى 30 شاقىرىمعا سوزىلعان جولدى ۆەلوسيپەدپەن ەڭسەرىپ ءوتتى. جينالعان قارجى سوماسى 160 ميللون تەڭگەگە جەتتى.
ءىس-شارانىڭ اشىلۋىندا قر مادەنيەت جانە سپورت ءمينيسترى ارىستانبەك مۇحامەدي ۇلى قۇتتىقتاۋ ءسوزىن سويلەدى. «Charity Tour de Burabay قازاقستان رەسپۋبليكاسىندا ۆەلوسيپەد سپورتىن دامىتۋعا جانە دارىپتەۋگە جاعداي جاساپ, ەم مەن وڭالتۋعا مۇقتاج بالالارعا ەرەكشە كوڭىل ءبولىپ وتىر», – دەدى مينيستر.
«Astana Pro Team» كومانداسىنىڭ باس مەنەدجەرى الەكساندر ۆينوكۋروۆ ىزگى باستامانىڭ جۇزەگە اسۋىنا قولعابىس ەتكەندەردىڭ بارلىعىنا العىسىن ءبىلدىردى. «Astana Pro Team» كومانداسى بۇل ءىس-شارانى جىلدا كەڭىنەن قولداپ وتىراتىنىن اتاپ ءوتۋ قاجەت.
Charity Tour de Burabay يدەياسىنا باستاما بەرگەن بيزنەسمەن, مەتسەنات جانە «اسىل ميراس» قايىرىمدىلىق قورىنىڭ نەگىزىن سالۋشى بولات وتەمۇراتوۆ ۆەلوشەرۋدى ارى قاراي دا وتكىزۋگە نيەتتى ەكەنىن جەتكىزدى. ول الداعى جىلدارى ءىس-شارانىڭ اۋقىمى كەڭەيىپ, كوپتەگەن بالالار كومەككە قول جەتكىزەتىنىنە ءۇمىت ءبىلدىردى.
بەس جىل ىشىندە جينالعان قارجى سوماسى 14 ەسەگە ارتىپ, 463,5 ميلليون تەڭگەنى قۇرادى. ال قاتىسۋشىلاردىڭ سانى 7 ەسە ءوستى. 2017 جىلى اۋكتسيوننان 102 900 000 تەڭگە, بالالاردىڭ سۋرەتتەر جارمەڭكەسىنەن 684 000 تەڭگە جينالدى. جەكە جانە كورپوراتيۆتىك جارنالار 30 416 000 تەڭگەدەن اسىپ, مەتسەناتتاردىڭ جاناشىرلىق جاردەمى 26 000 000 تەڭگەگە جەتتى.
«اسىل ميراس» جەكە قايىرىمدىلىق قورى جينالعان قارجىعا پەتروپاۆل قالاسىنداعى وبلىستىق بالالار اۋرۋحاناسىنا, تالدىقورعان قالاسىنداعى وبلىستىق پەريناتالدىق ورتالىققا, ورال قالاسىنداعى وبلىستىق بالالار كوپبەيىندى اۋرۋحاناسىنا, اقتوبە قالاسىنداعى بالالار كلينيكالىق اۋرۋحاناسىنا, سونداي-اق ورال قالاسىنداعى باتىسقازاقستاندىق مۇگەدەك بالالاردىڭ «بايتەرەك» وبلىستىق قوعامدىق بىرلەستىگىنە ارناپ مەديتسينالىق جابدىقتار ساتىپ الادى.
