سالتاناتتى ءىس-شارا قازاقتىڭ ۇلى ءبيىنىڭ تۋعان جەرى – قارقارالى اۋدانى ەگىندىبۇلاق اۋلىندا ءوتتى.
وعان پارلامەنت دەپۋتاتتارى, مەملەكەتتىك ورگاندار جەكەتشىلەرى, قوعام قايراتكەرلەرى, بەلگىلى عالىمدار مەن شىعارماشىلىق زيالى قاۋىم وكىلدەرى قاتىستى.
ءىس-شاراعا قاتىسۋشىلار قازىبەك بي ەسكەرتكىشىنە گۇل شوقتارىن قويدى. سونىمەن بىرگە, قاراعاندى وبلىسىنىڭ شىعارماشىلىق ۇجىمدارى ازىرلەگەن «قاز داۋىستى قازىبەك بي» اتتى تەاترلاندىرىلعان قويىلىم كورسەتىلدى.
مەملەكەتتىك حاتشى قازاقستان پرەزيدەنتىنىڭ سالتاناتتى ءىس-شاراعا قاتىسۋشىلارعا ارنالعان قۇتتىقتاۋىن وقىپ بەردى. وندا قاز داۋىستى قازىبەك بي بابامىز ۇلتىمىزدىڭ تاريحىندا ەسىمى التىن ارىپپەن جازىلعان قايراتكەر تۇلعا ەكەنى اتاپ ءوتىلدى. بۇگىنگى تاۋەلسىز, بەيبىت ءارى وركەندەگەن قازاقستان – اتا-بابالارىمىز ارمانىنىڭ ورىندالعانىنىڭ بەلگىسى. وسىنىڭ ءبارى حالقىمىزدىڭ بىرلىگى مەن ىنتىماعىنىڭ ارقاسى. ءبىز – وتكەنىمىزدى قاستەرلەپ, بۇگىنىمىزدى قادىرلەي وتىرىپ, بولاشاققا زور ۇمىتپەن قول سوزامىز. «رۋحاني جاڭعىرۋ» باعدارلاماسىن ىسكە اسىرۋ ارقىلى تاريحىمىزدى, مادەنيەتىمىز بەن ۇلتتىق جادىمىزدى جاڭعىرتىپ, ودان ءارى بايىتاتىن بولامىز.
ءىس-شارا اياسىندا قازىبەك بيگە ارنالعان حالىقارالىق ايتىسقا قاتىسۋشى اقىندار ارناۋ شىعارىپ, ەلىمىزدىڭ تانىمال ارتىستەرىنىڭ قاتىسۋىمەن مەرەكەلىك كونتسەرت ءوتتى. شارا قازاق كۇرەسى جانە الامان بايگە سياقتى سپورت جارىستارىمەن جالعاستى.
سونداي-اق, 30 تامىزعا دەيىن قاراعاندى وبلىسى اۋماعىنان قىزىلوردا, تۇركىستان, تاراز, شىمكەنت قالالارى ارقىلى ءجۇرىپ, وزبەكستاننىڭ تاشكەنت, ناۋاي قالالارىنا دەيىن باراتىن «قاز داۋىستى قازىبەك بي جولىمەن: بابالارعا تاعزىم!» اتتى حالىقارالىق اۆتوكەرۋەن جولعا شىقتى.
