اقتوبە مەكتەپتەرىنىڭ جاڭا وقۋ جىلىنا دايىندىعىن بۇگىن وبلىستىق ءبىلىم باسقارماسىنىڭ باسشىسى ساۋلە ومىربەكوۆا تەكسەردى. ولاردىڭ اراسىندا ءۇشاۋىسىمدا ءبىلىم بەرەتىن №41 ورتا مەكتەپ تە بار. مۇندا بارلىعى 600 وقۋشى ءبىلىم الادى. بالالاردىڭ تەڭ جارتىسى تاسىمالدانادى.
«بۇرىنعى بالاباقشا عيماراتى مەكتەپكە ساي قايتا جابدىقتالعان. مۇنداعى جەرتولەدە بي كابينەتى, كىتاپحانا بار. بي الاڭى سپورت-زال بولىپ ەسەپتەلەدى. بيىل مەكتەپتىڭ جىلۋ جۇيەسى تولىق جاڭارتىلدى. ال كەلەر جىلى كوكتەمدە جاڭا مەكتەپكە كوشىپ, قازىرگى ءبىلىم ورداسى قايتادان بالاباقشا بولادى», دەدى مەكتەپ ديرەكتورى ايجان ورازالينا.
ايتا كەتەيىك, اقتوبە وبلىسىنداعى مەكتەپتەر جاڭا وقۋ جىلىنا 95 پايىز دايىن. كەيبىر وقۋ ورىندارىندا شاعىن جوندەۋ جۇمىستارى ءجۇرىپ جاتىر. «قازىرگى كەزدە 25 مەكتەپتىڭ قۇرىلىسى جۇرگىزىلۋدە. بۇل اپاتتى, ءۇش اۋىسىمدى مەكتەپتەرتىڭ ماسەلەسىن شەشۋگە باعىتتالعان جۇمىس. قىركۇيەكتە 9 مەكتەپ پايدالانۋعا بەرىلەدى. جىل سوڭىنا دەيىن تاعى 5 مەكتەپتىڭ قۇرىلىسى اياقتالۋى ءتيىس. ەسەپ بويىنشا بارلىعى 16 مىڭ بالا ءبىرىنشى سىنىپقا بارادى. قازىرگى كەزدە قازاق سىنىپتارىنا ورىس ءتىلى مەن ادەبيەتىنەن, باستاۋىش سىنىپقا ورىس ءتىلى پانىنەن ساباق بەرەتىن مۇعالىم قاجەت بولىپ تۇر. كەيبىر اۋىلدارعا حيميا, فيزيكا ءپانىنىڭ مۇعالىمدەرى قاجەت»,- دەدى اقتوبە وبلىستىق ءبىلىم باسقارماسىنىڭ باسشىسى ساۋلە ومىربەكوۆا.
ايتا كەتەيىك, اقتوبە وبلىسى بيىل وقۋلىقتارعا 1,2 ميلليارد تەڭگە قارجى ءبولدى. بايعانين, مارتوك اۋداندارىنا كىتاپتار تاراتىلىپ جاتىر. ال اقتوبە قالاسىنا قاجەتتى وقۋلىقتار بۇگىن جۇك كولىگىمەن جەتكىزىلدى.
