بۇل «رۋحاني قازىنا», «تاربيە جانە ءبىلىم», «اتامەكەن», «اقپارات تولقىنى» اتتى 4 ىشكى باعدارلاما بويىنشا 61 جوبادان قۇرالادى. وڭىرلىك باعدارلامانىڭ جالپى بيۋدجەتى 28 ملرد. تەڭگەنى قۇراسا, بيىل بۇل جوبالارعا 7 ملرد. تەڭگە باعىتتالىپ وتىر. بۇگىن قازاقستان رەسپۋبليكاسى پرەزيدەنتى جانىنداعى قوعامدىق سانانى جاڭعىرتۋ جونىندەگى ۇلتتىق كوميسسيانىڭ ءۇشىنشى وتىرىسىندا ءسوز سويلەگەن شىعىس قازاقستان وبلىسىنىڭ اكىمى دانيال احمەتوۆ وسىلاي دەدى.
وبلىس اكىمىنىڭ ايتۋىنشا, وڭىردە «رۋحاني جاڭعىرۋدىڭ» باستى باعىتتارى بويىنشا ماقساتتى جانە جوسپارلى شارالار قولعا الىنعان جانە «رۋحاني جاڭعىرۋ» جوبالىق كەڭسەسى قۇرىلعان. اتالعان ۇدەرىسكە س.امانجولوۆ اتىنداعى شقمۋ, د.سەرىكباەۆ اتىنداعى شقمتۋ, شاكارىم اتىنداعى سمۋ جانە قازاقستان حالقى اسسامبلەياسى, قوعامدىق كەڭەس پەن قوعامدىق ۇيىمدار تارتىلعان.
بۇل باعدارلاما اياسىندا ءۇش ءتىلدى ءبىلىم بەرۋدى دامىتۋ, ارحەولوگيا سالاسىنداعى عىلىمي-زەرتتەۋ جۇمىستارى, ىشكى تۋريستەردىڭ اعىمىن ارتتىرۋ كوزدەلىپ وتىر. «رۋحاني قازىنا» ىشكى باعدارلاماسى شەڭبەرىندە 19 وڭىرلىك جوبا جۇزەگە اسىرىلادى. اتاپ ايتقاندا, «شىعىس قازاقستاننىڭ وركەنيەت قۇبىلىستارى» نەگىزگى بازالىق جوبالاردىڭ ءبىرى رەتىندە ءوڭىردىڭ بىرەگەي تاريحي-مادەني كەشەنىن بىرىكتىرمەك جانە «كونە قازىنا», «شىعىس قازاقستان ءىنجۋ-مارجانى» ىشكى جوبالارىنىڭ دا باسىن قوسادى. «كونە قازىنا» اياسىندا بەرەل, شىلىكتى, ابلايكيت كەشەندەرىندەگى ارحەولوگيالىق قازبا جۇمىستارى مەن عىلىمي-زەرتتەۋ جۇمىستارى جالعاسىن تابادى. قوڭىراۋليە مەن ىرعىزباي اتا كەسەنەسىنە ينفراقۇرىلىم جەلىلەرى سالىنىپ, شىلىكتى كەشەنىنە اينەكتەن ارنايى ساركوفاگ تۇرعىزىلادى, «تارحان گەولوگيالىق قيىعى» اشىق اسپان استىنداعى مۋزەيى اشىلادى. بارلىق جادىگەرلەردى وسكەمەندە بوي كوتەرەتىن ارحەولوگيا جانە زاماناۋي ونەر مۋزەيىنە قويۋ جوسپارلانىپ وتىر.
ال ءتۋريزمدى دامىتۋ مەن مۇرالاردىڭ تانىمالدىلىعىن ارتتىرۋعا نەگىزدەلگەن «شىعىس قازاقستان ءىنجۋ-مارجانى» ىشكى باعدارلاماسى اياسىندا كيەلى ورىندار كارتاسى جاسالىپ, تۋريستىك ينفراقۇرىلىمدار كەڭەيەدى, سۋ قويمالارىنىڭ ەمدىك قاسيەتى زەرتتەلەدى. سونىمەن بىرگە «رۋحاني قازىنا» «اباي الەمى» كىتاپ سەرياسىن شىعارۋ, مۋزەي قورىن ساندىق جۇيەگە كوشىرۋ, «مادەني كود: شىعىس قازاقستان» ءارحيۆى مەن كىتاپحاناسىن قۇرۋ, «مۋزىكا الەمى», «ارت زامان» فەستيۆالدەرىن وتكىزۋ, تەاترلار مەن شىعارماشىلىق ۇىمداردىڭ گاسترولدەرىن ۇيىمداستىرۋ كوزدەلگەن.
سونداي-اق «قازاقستاننىڭ تابيعاتى جانە تابيعي مۇرالارى» جوباسى اياسىندا كوپ دانامەن شىعىس قازاقستان اتلاسىن, وسىمدىكتەر مەن جانۋارلاردىڭ قىزىل كىتابىن باسىپ شىعارۋ جوسپارلانىپ وتىر. بۇل باسىلىمدار بارلىق مەكتەپتەر مەن كوللەدجدەرگە, كىتاپحانالارعا تۇسەدى. جانە بارلىق ماتەريالدار مەن جوبالاردىڭ ناتيجەسى «تۋعان جەر: شىعىس قازاقستان» ينتەرنەت پلاتفورماسىنا ورنالاستىرىلىپ, بارشاعا قولجەتىمدى بولادى.
دۋمان اناش
«ەگەمەن قازاقستان»
سۋرەتتى تۇسىرگەن
ورىنباي بالمۇرات
«ەگەمەن قازاقستان»
