سۋرەتتە: اۋىلدان شىققان چەمپيون ايبولات قۇناپيەۆ (وڭ جاقتا) قايرات باقتياروۆپەن كۇش سىناسۋدا. سۋرەتتى تۇسىرگەن اۆتور
اۋدانداعى باراق باتىر اتىنداعى سپورت مەكتەبىنە كەلگەن باتىر تۇلعالى, كوزدەرىنەن وت ۇشقىنداعان ايبولات اۋزىن اشسا جۇرەگى كورىنەتىن, اقكوڭىل ازامات ەكەن.
– 1989 جىلدىڭ 21 ماۋسىمى مەنىڭ تاعدىرىمدى وزگەرتىپ جىبەردى, – دەپ ەسكە الدى سول ءبىر وقيعانى باتىر ءىنىمىز. – مارات دەگەن دوسىمنىڭ كولىگىنە وتىرىپ, قاسىمدا تاعى ءۇش-ءتورت جەرلەسىم بار, جولنۇسقاۋدان اقسۋاتقا قاراي كەلە جاتقانبىز. كولىكتى باسقارىپ وتىرعان دوسىم ابايلاماي قالسا كەرەك, وقىستا اۋدارىلىپ قالدىق. جىلدامدىق قالىپتى جاعدايدا بولاتىن. ج ۇلىنعا كەلگەن قاتتى زاقىمنان اقىرى مۇگەدەك بولىپ قالدىم. ابىروي بولعاندا جانىمداعى سەرىكتەرىم ءدىن امان. تاعدىردىڭ جازۋىنا نە ايتامىن, مۇنىڭ الدىندا كۇرشىمدەگى كاسىپتىك-تەحنيكالىق ۋچيليششەنىڭ تراكتورشى ءبولىمىن اياقتاپ, وسى ماماندىق بويىنشا جۇمىس ىستەپ جۇرگەنمىن. سىن ساتتە اۋىلداستارىم, تۋىستارىم مەنى قولدادى. سونان سوڭ ءوزىم دە قاراپ وتىرا بەرمەي كاسىپكەرلىكپەن شۇعىلدانا باستادىم. بۇل ەرمەگىم وزىمە ۇنادى. بالا كەزىمنەن سپورتقا اۋەس ەدىم, ءتۇرلى جاتتىعۋلاردى ۇيدە جاسايتىنمىن. اقىرى, وسىدان ەكى جىل بۇرىن قايىرىمدى ازامات قايرات توقان ۇلىنىڭ تۇرتكى بولۋىمەن قول كۇرەسىمەن اينالىسا باستادىم. ناتيجە جامان ەمەس, – دەپ ارباسىندا وتىرىپ جىميدى جىگەرلى جىگىت.
كەسەك دەنەلى, بۇلشىق ەتتەرى بۇلت-بۇلت ويناعان ايبولات ءوزى جايلى ايتقاندا اڭگىمەگە ساراڭ بولىپ شىقتى. ەسەسىنە, ايبولاتتى قول كۇرەسىنە قىزىقتىرعان قايرات توقان ۇلى ول تۋرالى ىقىلاسپەن پىكىر ءبىلدىردى.
– ەكى جىل – قول كۇرەسى ءۇشىن ۇزاق ۋاقىت ەمەس. الايدا, ايەكەڭ وسى ارالىقتا ەكى رەت وبلىس, ەكى رەت ەل چەمپيوناتتارىندا توپ جاردى. اۋدان ورتالىعىندا وتكەن جارىستاردا ەشكىمگە دەس بەرمەي كەلەدى. 2015 جىلى رەسەيدىڭ سوچي قالاسىندا پاراليمپيا ويىندارى ءوتىپ, وعان ايبولات تا قاتىستى. 100 كيلودان اساتىن اۋىر سالماق بويىنشا قولا مەدالدى يەلەندى. ايبولاتتىڭ ەندىگى ارمانى – الەم چەمپيونى اتانۋ. جاتتىعۋلار جالعاسا بەرسە, وعان قول جەتكىزۋگە بولادى. كۇرشىمدەگى بالىق زاۋىتىنىڭ باسشىسى نۇرلان قاسىمحانوۆ, ىسكەر ازاماتتار ەرجان سقاقوۆ, جاناربەك بىلىمباەۆ دەگەن جانى جومارت ازاماتتارعا مىڭ العىس. العاشقىسى ءبىر ميلليون تەڭگە, وبلىستىق سپورت باسقارماسى 500 مىڭ تەڭگە دەمەۋشىلىك كومەك كورسەتتى. اتتارى اتالعان ەكى ازامات تا قوماقتى كومەكتەن ايانبادى. ايبولاتتىڭ قولاربادا وتىرىپ-اق, اۋداندى بىلاي قويىپ, وبلىس نامىسىن قورعاپ, جوعارى ناتيجەلەرگە جەتۋى –مۇمكىندىگى شەكتەۋلى باسقا جاندارعا دا ۇلگى بولدى. قازىردىڭ وزىندە ەرىك, پاۆەل دەگەن جىگىتتەر دە قول كۇرەسىمەن شۇعىلدانا باستادى, – دەيدى قايرات توقان ۇلى.
كۇرشىمدەگى بالالار جانە جاسوسپىرىمدەر سپورت مەكتەبى ديرەكتورىنىڭ وقۋ ءىسى جونىندەگى ورىنباسارى ايگۇل شەپەنوۆا اۋداننىڭ تۇگەلگە جۋىق اۋىلدارىندا ءتۇرلى فيليالداردىڭ جۇمىس ىستەپ تۇرعانىن, ولاردا 902 بالانىڭ بوكس, قازاق كۇرەسى, ەركىن كۇرەس, شايبالى حوككەي, فۋتبول, ۆولەيبول سياقتى سپورت تۇرلەرىمەن شۇعىلداناتىنىن, ءتۇرلى دەڭگەيدەگى جارىستاردا شاكىرتتەرىنىڭ ءتاۋىر ناتيجەگە قول جەتكىزىپ جۇرگەندەرىن ماقتانىشپەن ايتتى. اۋدان اكىمى سەيسەنعازى چۋكاەۆ سپورت مەكتەبىنە قامقورلىق جاساپ تۇرادى ەكەن.
تاعى ءبىر ايتا كەتەتىن جايت, باراق باتىر سپورت كەشەنىنە كەلگەنىمىزدە, مۇمكىندىگى شەكتەۋلى جاندارعا ارنالعان سپورت زالدارىنىڭ قاجەتتى قۇرالدارمەن جابدىقتالعانىن كوردىك. مۇندا سەنبى, جەكسەنبى كۇندەرى دە جاتتىعا بەرۋگە بولادى. دەمەك, سپورتقا كوڭىل بولىنگەن جەردە تابىستىڭ دا مىندەتتى تۇردە بولاتىنى ءسوزسىز.
وڭداسىن ەلۋباي,
جۋرناليست
شىعىس قازاقستان وبلىسى,
كۇرشىم اۋدانى
