ۆيتسە-مينيستر سوڭعى جىلدارى قولايسىز اۋا رايى جاعدايلارى مەن ءداندى داقىلداردىڭ اۋرۋلارىنىڭ كوپ تارالۋىنا بايلانىستى استىق ساپاسى ناشارلاعانى بايقالعانىن اتاپ ءوتتى. سونداي-اق 2014 جىلى ەليتالى تۇقىمداردى سۋبسيديالاۋدىڭ الىنىپ تاستالۋى مەن ولاردى سۋبسيديالاۋعا مينيمالدى نورمالاردى ورناتۋعا بايلانىستى اۋىل شارۋاشىلىعى وندىرۋشىلەرى ساپالى تۇقىمداردى ساتىپ الۋدى قويدى, سەبەبى مينيمالدى نورمالار بويىنشا تولەنەتىن سۋبسيديالار ولاردىڭ شىعىندارىن اقتامايتىن بولدى.
بيىل وسى جاعدايدى تۇزەۋ ءۇشىن بىرقاتار جۇيەلى شارالار قابىلداندى, سولاردىڭ ىشىندە: بىرەگەي جانە ەليتالى تۇقىمداردى سۋبسيديالاۋ قايتا قالىپقا كەلتىرىلدى, تۇقىمداردى سۋبسيديالاۋدىڭ مينيمالدى نورمالارى الىنىپ تاستالدى, تۇقىم شارۋاشىلىعىن قارجىلاندىرۋ كولەمى باسىمدىقتاردى قايتا قاراۋ ەسەبىنەن, الدىندا بەكىتىلگەن بيۋدجەت اياسىندا 2 ەسەگە – 3,7 ملرد-تان 7,2 ملرد تەڭگەگە دەيىن ۇلعايتىلدى.
سونىڭ ناتيجەسىندە, 2017 جىلى ساپالى تۇقىمدار ەگىستىگى 1,5 ەسەگە ۇلعايتىلدى. ەليتالى تۇقىمداردى پايدالانۋ كولەمى 68%-عا ءوستى, ال تومەنگى ساپالى تۇقىمداردى پايدالانۋ 1,6 ەسەگە قىسقارتىلدى.
ءوز كەزەگىندە, تۇقىم ءوسىرۋ شارۋاشىلىقتارىنىڭ ماتەريالدىق-تەحنيكالىق بازاسىنا جاسالعان تالداۋ ناتيجەسىندە 370 بىرلىك تۇقىم ءوسىرۋ تەحنيكاسىن جاڭارتۋ قاجەتتىلىگى انىقتالدى. ينۆەستيتسيالىق سۋبسيديالاۋ باعدارلاماسىندا تۇبەگەيلى جاقسارتۋ جۇمىستارى ءۇشىن 2018 جىلدان باستاپ تۇقىم ءوسىرۋ تەحنيكاسىنا جۇمسالاتىن شىعىنداردى وتەۋ ءنورماتيۆىن 50%-عا دەيىن ۇلعايتۋ قاراستىرىلعان, بۇگىندە ول 25%-دى قۇرايدى. بۇل الداعى ءۇش جىل ىشىندە تۇقىم ءوسىرۋ تەحنيكالارىن تولىقتاي جاڭارتۋعا مۇمكىندىك بەرەدى.
سونداي-اق, ءبىرىنشى ۆيتسە-مينيستر تىڭايتقىشتاردى پايدالانۋ ماسەلەسىنە توقتالىپ ءوتتى. تىڭايتقىشتاردى سۋبسيديالاۋدىڭ بۇرىنعى تەتىكتەرى ولاردى قاجەتتى كولەمدە پايدالانۋعا سۇرانىس تۋدىرمايتىن. سونىڭ سالدارىنان ولاردى قولدانۋ ورتا ەسەپپەن قاجەتتىلىكتىڭ 10%-نان اسپايتىن. وسىعان وراي 2017 جىلدان باستاپ تىڭايتقىشتاردى سۋبسيديالاۋدىڭ جاڭا سۇلباسى ەنگىزىلدى, وندا ناقتى مانىندەگى ناقتى نورماتيۆتەر بەكىتىلگەن.
بۇگىنگى تاڭدا 309 مىڭ توننا تىڭايتقىش ساتىلىپ الىنعان, بۇل 2016 جىلى 261 مىڭ توننانى قۇراعان جالپى كولەمنەن كوپ. جىل قورىتىندىسى بويىنشا سوڭعى بىرنەشە جىلدا العاش رەت تىڭايتقىشتاردى پايدالانۋ قاجەتتىلىكتىڭ 14%-ىن قۇرايدى.
