نەگىزىنەن, بۇل قىزمەتتە جاڭا اكىمنىڭ تاجىريبەسى مول, جەرگىلىكتى جەر جاعدايىن جاقسى بىلەدى دەۋگە بولادى. بۇعان دەيىن قايىرگەلدى اليعازى ۇلى وبلىستاعى قاشىر اۋدانىن, ءوندىرىستى اقسۋ قالاسىن باسقاردى. ەلگە جايلى, سوڭىنا بەي-بەرەكەت ءسوز قالدىرماعان, شارۋاشىلىق جايىنا مىقتى. قاشىر اۋدانى ورتالىعىنىڭ تەرەڭكول دەپ اتالۋىنا, تۇڭعىش رەت قازاق مەكتەبىنىڭ سالىنۋىنا ۇلەس قوستى. ەندى كەرەكۋ ءوڭىرى ورتالىعىن باسقارادى. ال بۇعان دەيىن قالا اكىمى بولعان باقىتجان جولامانوۆتىڭ, نەگە ەكەنى بەلگىسىز, كەلگەنىنەن كەتكەنى جىلدام بولدى.
فاريدا بىقاي. پاۆلودار.
جىلجىمالى كەشەن تابىس ەتىلدى. وبلىستىق بالالار اۋرۋحاناسىنا جىلجىمالى مەديتسينالىق كەشەن تابىس ەتىلدى. بۇل زاماناۋي مەديتسينالىق كولىكتىڭ قۇنى 85 ميلليون تەڭگە تۇرادى. ەندى بالالار دارىگەرلەرى وبلىستىڭ قانداي شالعاي اۋدانىنا دا تەز جەتىپ, اۋرۋلارعا كومەك كورسەتە الادى. بۇل وبلىستىق بالالار اۋرۋحاناسىنىڭ كوپتەن بەرگى قولى جەتپەي جۇرگەن جابدىعى بولاتىن. ونىڭ ىشىندە اۋىرعان بالانىڭ دياگنوزىن انىقتايتىن بارلىق جابدىق تا, جاعداي دا بار. دارىگەر وسى كولىكتىڭ ارقاسىندا ناۋقاسقا جەدەل كومەك تە كورسەتە الادى. ەندى شالعاي اۋىلدارداعى اتا-انالار بالا اۋىرعاندا الىستاعى اۋدان ورتالىعىنا نەمەسە وبلىستىق اۋرۋحاناعا قالاي جەتەمىز دەپ باس قاتىرمايدى. بالالار دارىگەرى جەتىسپەي وتىرعان جەرلەردە جەدەل مەديتسينالىق كولىكتىڭ تيىمدىلىگى وتە جوعارى بولارىن وبلىستىق اۋرۋحانا باسشىلارى قازىردەن ايتىپ وتىر.
ءنازيرا جارىمبەتوۆا. قوستاناي.
تۋعان جەرگە تاعزىم اكتسياسى باستالدى. كەندى التايدىڭ اۋداندارى مەن قالالارى وسكەمەن مەن سەمەيدە «تۋعان جەرگە – تاعزىم» اكتسياسىن باستادى. بۇرىنعى سەمەيگە قاراستى اۋدان وكىلدەرى وسكەمەنگە, ال وسكەمەنگە قاراستىلارى سەمەيگە بارىپ, اۋىل شارۋاشىلىعى جارمەڭكەسىن وتكىزىپ, ەت, كوكونىس, باسقا دا اۋىل شارۋاشىلىعى ونىمدەرىن قالا دۇكەندەرىنە قاراعاندا 30-40 پايىز تومەن باعامەن ساتا باستادى. ەكى اپتا قاتارىنان بەسقاراعاي مەن جارما اۋداندارى ءجۇز توننادان استام كوكونىس, ەت پەن ءسۇتتى ارزانعا ساتتى. اۋدان اكىمدەرى قاليحان بايعونىسوۆ پەن تەمىربەك قاسىمجانوۆتىڭ ايتۋىنشا, جارمەڭكە وتكىزۋمەن بىرگە, جەتىمدەرگە ازىق-ت ۇلىك تەگىن اپارىپ بەرىلگەن. مەتاللۋرگتەردىڭ مادەنيەت سارايىندا ەكى اۋدان ونەرپازدارى ءان مەن كۇيدەن شاشۋ شاشتى.
وڭداسىن ەلۋباي. وسكەمەن.
تىڭداۋشىلارعا ارنايى سەرتيفيكات. پەتروپاۆل قالاسىندا بەلگيالىق «EuroConsultants» كومپانياسىنىڭ قولداۋىمەن ازىق-ت ۇلىك ونىمدەرىنىڭ قاۋىپسىزدىگىن قامتاماسىز ەتۋگە ارنالعان ايماقتىق سەمينار ءوتتى. وعان سانيتارلىق-ەپيدەميولوگيالىق سالا ماماندارىمەن قاتار, اقش, يتاليا, لاتۆيا, نيدەرلاندى, ۋكراينا مەملەكەتتەرىنەن ساراپشىلار قاتىستى. باسقوسۋدا بۇكىلالەمدىك ساۋدا ۇيىمى تالاپتارىنا ساي ءونىم ساپاسىن الەمدىك تالاپتارعا جەتكىزۋدىڭ جولدارى قاراستىرىلىپ, دارىستەر وقىلدى. رەسپۋبليكا بويىنشا ءىس-تاجىريبەلەر ورتاعا سالىنىپ, پايدالى ۇسىنىستار ايتىلدى. اتالمىش شارا اياسىندا ءبىر مىڭنان استام ماماننىڭ كاسىبي بىلىكتىلىگىن ارتتىرۋ كوزدەلگەن. ەكى كۇنگە سوزىلعان سەميناردا جۇزدەن اسا تىڭداۋشىلارعا ارنايى سەرتيفيكاتتار تابىس ەتىلدى.
ءومىر ەسقالي. سولتۇستىك قازاقستان وبلىسى.
كىتاپتى كوپ وقيتىن اۋلەتتەر. اقپاراتتىق تەحنولوگيالار قانشا جەتىلگەنىمەن كوركەم ادەبيەتتىڭ ۇرپاق تاربيەسىندەگى ورنى بولەك. جاقىندا كەنتاۋ قالالىق كىتاپحاناسى ۇجىمىنىڭ ۇيىمداستىرۋىمەن “ۇزدىك وقيتىندار اۋلەتى” بايقاۋى بولىپ ءوتتى. مادەني شاراعا جەتى وتباسى قاتىسىپ, قازاقتىڭ تۇرمىستىق سالت-داستۇرلەرىنە بايلانىستى بەس كەزەڭ بويىنشا سىنعا ءتۇستى. وسى بايقاۋدا بەرىكقارا اۋلەتى باس جۇلدەنى جەڭىپ الدى. جۇلدەلى ءۇش ورىنعا اليەۆتەر, قويشىباەۆتار جانە ورالباەۆتار وتباسىلارى يە بولدى.
باقتيار تايجان. وڭتۇستىك قازاقستان وبلىسى.
بەينەكونفەرەنتسيا ارقىلى تالقىلاندى. قاراعاندى جانە باتىس قازاقستان وبلىستىق جايىق بەكتۇروۆ پەن حامزا ەسەنجانوۆ اتىنداعى جاسوسپىرىمدەر مەن بالالار كىتاپحاناسى اراسىندا ء«بىر ەل – ءبىر كىتاپ» رەسپۋبليكالىق اكتسياسى اياسىندا تىكەلەي بايلانىستا بەينەكونفەرەنتسيا ءوتتى. وعان قاتىسقان قاراعاندىداعى, ورالداعى جوعارى وقۋ ورىندارىنىڭ شاكىرتتەرى ج.ايماۋىتوۆتىڭ «اقبىلەك» رومانىن تالقىلاپ, ونى وقۋدان تۇيگەن وي-اسەرلەرىن ورتاعا سالدى. قاراعاندىداعى اتالعان كىتاپحانا مۇنداي شارانى باسقا دا قالالارداعى رۋحاني بايلىق وشاقتارىمەن جالعاستىرماق.
ايقىن نەسىپباي. قاراعاندى.
ەكولوگيالىق اكتسيا مارەگە جەتتى. باتىس قازاقستان وبلىستىق ەكولوگيالىق قوعامدىق ۇيىمدار قاۋىمداستىعى جاس بۋىننىڭ ەكولوگيالىق تانىمىن كوتەرۋ ءۇشىن ارنايى اكتسيا جاريالادى. بىرنەشە كەزەڭنەن تۇراتىن اكتسيا اياسىندا تال وتىرعىزۋ, اۋماقتاردى تازارتۋ جۇمىستارى اتقارىلدى. تاربيە ساعاتتارى مەن كونكۋرستار وتكىزىلدى. وتكەن اپتادا جاس جەتكىنشەكتەر اراسىندا وتكىزىلگەن شارانىڭ ناتيجەلەرى شىعارىلىپ, ورال قالاسىنداعى №19, №20 جانە №41 مەكتەپ وقۋشىلارى جەڭىمپاز دەپ تانىلدى.
تەمىر قۇسايىن. ورال.
