كوپتەن بەرى پايدالانىلماي كەلە جاتقان ساۋىقتىرۋ ورتالىعىنىڭ ىرگەتاسى 1975 جىلى قالانىپتى. ءبىر كەزدەرى بالالار ۋلاپ-شۋلاپ جاتاتىن لاگەردىڭ قازىرگى كورىنىسى ۇسقىنسىزداۋ, ابدەن توزعانى كورىنىپ تۇر. بىراق كۇزەتشى قويىلعاندىقتان بۇنداعى عيماراتتار بۇزىلماعان, سول قالپىندا. وزەن جاعاسىندا تۇرعان ەكى قاباتتى نەگىزگى عيماراتتىڭ سىرتى ج ۇلىم-ج ۇلىمى شىققانىمەن, قابىرعالارىنا ەشقانداي زاقىم كەلمەپتى. بۇل كورپۋستىڭ جالپى اۋماعى 496 شارشى مەتر بولسا, ول اۆتونومدى جىلۋ جۇيەسىمەن جىلىتىلادى. ەندى وسى نەگىزگى كورپۋس, تەحنيكالىق پاسپورتتارى جوق 8 قوسالقى عيمارات جانە كۇننەن قاقپالايتىن ورىندار مەن شەشىنەتىن جەرلەرى بار ورتالىق كۇردەلى جوندەۋدەن وتەدى. اتالعان نىسانعا تەحنيكالىق پاسپورت بار جانە اباتتاندىرۋدى قوسا العاندا سمەتالىق قۇجات پەن مەملەكەتتىك ساراپتاما ازىرلەۋ ءۇشىن 11,2 ملن تەڭگە دە ءبولىنىپ وتىر.
ورتالىق كۇردەلى جوندەۋ كورگەن سوڭ 70 بالانى ەمىن-ەركىن قابىلداي الادى. سونىمەن قاتار قوسىمشا عيماراتتاردا تاعى 30-40 بالانى دەمالدىرۋعا بولادى ەكەن. اتالعان دەمالىس ورنىن جىلدىڭ بارلىق مەزگىلىندە جۇمىس ىستەيتىندەي جاعدايدا ۇستاۋعا مۇمكىندىك بار دەيدى وسى ىسكە جاۋاپتى ادامدار. ءتىپتى ورتالىق اۋماعىندا جاڭا عيماراتتار سالۋعا دا جەر جەتەتىن كورىنەدى. زەرەندى اۋداندىق ءبىلىم بەرۋ ءبولىمىنىڭ باسشىسى جانگەل ۋايسوۆ بالالاردىڭ بارىنشا جاقسى دەمالۋلارى ءۇشىن جاياۋ ءجۇرۋ جانە وزەندە ءجۇزۋ جاعدايلارىنىڭ بارلىعى جاسالاتىنىن العا تارتتى. الەۋمەتتىك از قامتىلعان جانە كوپ بالالى وتباسىلاردىڭ بالالارىنا تەگىن دەمالاتىنداي جەڭىلدىكتەر دە قاراستىرىلۋى مۇمكىن كورىنەدى. سونىمەن بىرگە مەملەكەت قاراۋىندا بولاتىن اتالعان ورتالىقتا دەمالۋ باعاسى جەكە لاگەردە دەمالۋدان ارتىق بولمايتىندىعىنا سەندىرگەن شەنەۋنىك اۋداندا وسىنداي ساۋىقتىرۋ ورنى جوقتىعىن العا تارتتى.
جالپى, اۋداندا «سۇڭقار», مالىك عابدۋللين اتىنداعى جانە «پارۋس» دەپ اتالاتىن جەكە مەنشىكتەگى ءۇش لاگەر جۇمىس ىستەيدى. قازىرگى كەزدە سول مالىك عابدۋللين اتىنداعى لاگەردە 100-گە تارتا بالا ءوز جازعى دەمالىستارىن وتكىزىپتى. ەگەر «يسكوركا» جاڭا اتاۋىمەن جانە وزگەشە قىزمەت كورسەتۋ ساپاسىمەن قاتارعا قوسىلاتىن بولسا, وندا اينالاسىنداعى وزگە دە لاگەرلەر ءوز قىزمەت ساپالارىن بارىنشا جاقسارتۋعا ۇمتىلاتىنى ايتپاسا دا تۇسىنىكتى. سوندىقتان دا جاڭا دەمالىس ورنىنىڭ قاتارعا قوسىلۋى وڭدى وزگەرىستەر اكەلەدى دەگەن ءۇمىت تە جوق ەمەس.
اسقار تۇراپباي ۇلى,
«ەگەمەن قازاقستان»
اقمولا وبلىسى
