القالى جيىندا فەدەراتسيانىڭ ەسەپ بەرۋ كەزەڭىندە اتقارىلعان جۇمىستارى تىڭدالدى. وعان مادەنيەت جانە سپورت ءمينيسترى ارىستانبەك مۇحامەدي ۇلى قاتىستى. بۇدان بولەك, جيىن بارىسىندا فەدەراتسيانىڭ جاڭا قۇرامى بەكىتىلدى.
باسقوسۋدا داۋىس بەرۋشىلەردىڭ ءبىراۋىزدان شىعارعان شەشىمى بويىنشا قازاقستاننىڭ سپورتتىق اتۋ فەدەراتسياسىنا باسشى بولىپ ارىستانبەك مۇحامەدي ۇلى سايلاندى. سونىمەن قاتار, فەدەراتسيانىڭ اتقارۋشى كوميتەتى بەكىتىلدى. اتقارۋشى كوميتەتتىڭ توراعالىق ەتۋشىسى, فەدەراتسيانىڭ باس حاتشىسى لاۋازىمىنا ولەگ پوچيۆالوۆ, ۆيتسە-پرەزيدەنت قىزمەتتەرىنە نۇرلان ورازاليەۆ پەن انۆار يۋنۋسمەتوۆ, اتقارۋشى ديرەكتورى بولىپ وكسانا سەرەدا, ستەندتىك اتۋ بويىنشا اتقارۋشى ديرەكتورىنا تاتيانا داۆىدوۆا, مىلتىق اتۋ بويىنشا اتقارۋشى ديرەكتورى بولىپ تاتيانا تاباكاەۆا سايلاندى.
جيىندا ءسوز العان ارىستانبەك مۇحامەدي ۇلى سپورتتىق اتۋ ەلىمىزدەگى نەگىزگى وليمپيادالىق سپورت ءتۇرى ەكەندىگىن ەرەكشە اتاپ ءوتتى.
– قۇرمەتتى, جينالعان قاۋىم, ماعان ءۇمىت ارتىپ, وسى مىندەتتى سەنىپ تاپسىرعاندارىڭىزعا العىسىم شەكسىز. شىنى كەرەك, ەلىمىزدە سپورت كۇننەن كۇنگە دامىپ بارادى. وعان دالەل رەتىندە سوڭعى وليمپيادا ويىندارىن الۋىما بولادى. برازيليادا جامپوزدارىمىز 17 مەدال جەڭىپ, قازاقستان تاريحىنداعى ەڭ جوعارعى كورسەتكىشتى جاسادى. بۇل ءبىزدىڭ سپورتقا دەگەن كوزقاراسىمىزدىڭ, باعىتىمىزدىڭ ايقىن ەكەندىگىن بىلدىرەدى, – دەدى مادەنيەت جانە سپورت ءمينيسترى.
ول سونداي-اق, بىرەر جىل بۇرىن ەلىمىزدە سپورتتىڭ ءبىر تۇرىنەن بىرنەشە فەدەراتسيا بولعانىن, الايدا حالىقارالىق تالاپتارعا سايكەس, ولاردىڭ ارنايى تىركەۋلەردەن كەيىن بىرىكتىرىلگەنىن دە ەسكە سالىپ ءوتتى.
بۇدان بولەك, مينيستر قازىرگى ۋاقىتتاعى باستى ماقسات وتاندىق سپورتشىلاردىڭ ناتيجەلەرىن جەتىلدىرۋ جانە وليمپيادا ويىندارىنا ليتسەنزيا ۇتىپ الۋ ەكەنىن ايتا كەلە, الەمدىك قاۋىمداستىقتا ۇلكەن ناتيجەلەرگە جەتىپ, الداعى وليمپيا ويىندارىندا ايتۋلى جەتىستىكتەرگە قول جەتكىزەتىندىگىنە سەنىمىن ءبىلدىردى. ول سپورتتىق اتۋ فەدەراتسياسىنىڭ 2016 جىلعى قىزمەتى, ياعني ۇلتتىق قۇراما كوماندالاردىڭ دايىندىعى, وڭىرلەردەگى سپورت ءتۇرىن دامىتۋ, رەسپۋبليكالىق جانە حالىقارالىق دەڭگەيدەگى بىرقاتار سپورت شارالارىن ۇيىمداستىرۋدا, سونداي-اق, بۇقارالىق سپورتتى دامىتۋداعى جۇمىسى جەمىستى بولعانىن مالىمدەدى.
– بۇگىن ماڭىزدى جيىن ءوتتى. سپورتتىق وق اتۋ فەدەراتسياسىنا جاڭا باسشى سايلاندى. وزدەرىڭىز بىلەسىزدەر, بۇل سپورت تۇرىندە كوبىرەك مەدال ساراپقا سالىنادى. الداعى ۋاقىتتا وسى سالانىڭ دەڭگەيى بۇرىنعىسىنان دا كوتەرىلىپ, قىزىعۋشىلىق تانىتقان جاستارىمىزدىڭ دا قاتارى ارتا تۇسەدى دەپ ۇمىتتەنەمىن. تاعى ءبىر ايتا كەتەرىم, بىرەر كۇننەن كەيىن استانادا اتۋ سپورت تۇرلەرىنە ارنالعان كەشەن اشىلادى. ونىڭ دا جاستارىمىز ءۇشىن پايداسى زور بولماق, – دەدى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ.
ايتا كەتەيىك, بۇگىندە اتۋ سپورت ءتۇرى بويىنشا ەلىمىزدە 2 مىڭعا جۋىق ادام قىزمەت ەتەدى.
ايان ءابدۋالي,
«ەگەمەن قازاقستان»
