ورتالىق كوممۋنيكاتسيالار قىزمەتى الاڭىندا «مەملەكەتتىك رامىزدەر ماقتانىشىم!» جانە «ماڭگىلىك ەل – مۇراتىم!» تاقىرىبىنداعى قر مەملەكەتتىك رامىزدەرىنىڭ 25 جىلدىعىنا ارنالعان استانا قالالىق جاس اقىندار اراسىنداعى ءمۇشايراسى جونىندە ءباسپاسوز كونفەرەنتسياسى ءوتتى.
اقىن قالقامان سارين مەن استانا قالاسى اكىمدىگىنىڭ جاستار ساياساتى ماسەلەلەرى باسقارماسىنىڭ باسشىسى اسحات ورالوۆتىڭ قاتىسۋىمەن وتكەن كونفەرتسيادا ءمۇشايرا ماقساتى مەن شارتتارى ايتىلىپ, جۋرناليستەر تاراپىنان قويىلعان وزگە دە ساۋالدارعا جاۋاپ بەرىلدى.
قازىلار القاسىنىڭ قۇرامى الدىن الا جاريالانبايتىنى, اقىنداردىڭ بۇركەنشىك اتپەن قاتىساتىنى تۋرالى ايتقان اسحات ورالوۆ, «بۇل ءمۇشايرا تاستۇلەك تالانت, شىن جۇيرىكتى انىقتايدى, بارىنشا ءادىل وتەدى», - دەپ وتىر.
ال, اقىن قالقامان سارين: «تاۋەلسىزدىك كەزەڭىندە ادەبيەتكە كەلگەن اقىنداردىڭ ازاتتىقتى جىرلاماعانى جوق شىعار, ءار كىم ءار قىرىنان وزىنشە جانە وزگەشە ورنەكپەن جازا ءبىلدى. ال, تاۋەلسىزدىك تۇسىندا ومىرگە كەلگەن جاستار قالاي جىرلايدى ەكەن؟ تاۋەلسىز ەلدە دۇنيەگە كەلىپ, ازات سانامەن ەسەيگەن ۇرپاقتىڭ ولەڭى قالاي ورىلەدى؟ سونى كورگىمىز كەلەدى. ارينە, ولار بۇعان دەيىن دە جازىپ ءجۇر عوي, بىراق, بۇل ءمۇشايرانىڭ تاقىرىبى اۋىرلاۋ, تالابى دا جەڭىل ەمەس. ناعىز تاۋەلسىزدىك جەمىسىنىڭ جىرلارىنا كۋا بولامىز دەپ ۇمىتتەنەمىز», - دەدى.
مۇشايراعا 14 – 29 ارالىعىنداعى جاس اقىندار قاتىسا الادى.
ءمۇشايرا جەڭىمپازدارى I, II جانە III دارەجەلى ديپلومدارمەن جانە استانا قالاسىنىڭ جاستار ساياساتى ماسەلەلەرى باسقارماسىنىڭ اقشالاي سىيلىعىمەن ماراپاتتالادى. I ورىن – بىرەۋ (300 000 تگ), II ورىن – ەكەۋ (200 000 تگ), III ورىن – ۇشەۋ (100 000 تگ), ارنايى جۇلدە – تورتەۋ (50 000 تگ).
وتىنىمدەردى قابىلداۋ 2017 جىلدىڭ 5 تامىزى مەن 5 قىركۇيەك ارالىعىندا جۇرىلەدى. مەكەن-جايى: استانا قالاسى, دوستىق كوشەسى 13, 214 كابينەت نەمەسە bm_30@mail.ru ەلەكتروندى پوشتاسى.
ءسويتىپ, بەسىگەنەن بوداندىق بەلگىسىن كورمەي وسكەن جاس وسكىن اقىندار تاۋەلسىز ەلدىڭ مەملەكەتتىك رامىزدەرىنە دەگەن جۇرەك ءلۇپىلىن پوەزيا تىلىندە جەتكىزىپ, ماڭگىلىك ەل مۇراتىن جىرعا قوسادى. جىر بايگەلى بولسىن جاس اقىندار!
ايتپاقشى, كونفەرتسيادا العاشقى 25 اقىننىڭ ولەڭى كىتاپ بولىپ قۇراستىرىلاتىنى, استانادان وزگە قالالاردان قاتىسقىسى كەلەتىندەر دە ءوتىنىم بەرۋىنە بولاتىنى تۋرالى ايتىلدى.
ۇلاربەك نۇرعالىم ۇلى
«ەگەمەن قازاقستان»
