جوباسىن ءوز ارحيتەكتورلارىمىز جاساعان ەكو-كەڭسەگە الماتىلىق كاسىپكەر, «ۋچيوت.kz» برەندىنىڭ يەسى ماكسيم بارىشەۆ 280 ميلليون تەڭگە جۇمساعان.
جالعا قىمبات كەڭسە الۋدان باس تارتقان بيزنەسمەننىڭ ايتۋىنشا, 6 قاباتتى ەكولوگيالىق عيماراتتىڭ قۇرىلىسىنا كەتكەن شىعىنى 7 جىلدا اقتالۋى ءتيىس. قالادا مۇنداي عيماراتتى ۇستاپ تۇرۋعا ايىنا 350 مىڭ تەڭگە كەتسە, جاڭا كەڭسە تەك ۇنەمدەۋدىڭ ارقاسىندا ايىنا 70 مىڭ تەڭگە عانا جۇمساپ وتىر. كەڭسەدەگى قىزمەتكەرلەر دە ەلەكتر ۇنەمدەيتىن نوۋتبۋكتەر مەن قوزعالعان كەزدە عانا قۋات جۇمسايتىن ءليفتىنى پايدالانادى.
جاسىل كەڭسەدە ارنايى قوندىرىلعان جۇيە جاڭبىر سۋىن قايتا سۇزگىدەن وتكىزىپ وتىرادى. تازارتىلعان جاڭبىر سۋى گۇلدەر مەن كوشەتتەردى سۋارۋعا, كاناليزاتسياعا جۇمسالادى.
عيماراتتىڭ شاتىرىنا كۇننەن قۋات الاتىن كوللەكتورلار ورناتىلعان. ءارى ول سۋدى جىلىتىپ وتىرادى. وسى ءتاسىلدىڭ ارقاسىندا كەڭسە قالالىق جىلۋعا تولىقتاي تاۋەلسىز بولىپ وتىر.
كەڭسەنىڭ قالىپتى تىرشىلىگى ءۇشىن قاجەتتى ەلەكتر قۋاتىنىڭ باسىم بولىگى كۇن ساۋلەسىنەن الىنادى. تەرەزەلەرى دە كۇمىستىڭ جۇقا قاباتىمەن وڭدەلگەن, ءمولدىر سۇزگىشتى قۇرايتىن مۋلتيفۋنكتسيالىق اينەكپەن جابدىقتالعان. بۇل اينەكتەر جىلدىڭ كەز كەلگەن مەزگىلىندە جايلى ميكروكليمات قالىپتاستىرىپ, ەنەرگيا تاپشىلىعىن تۋدىرمايدى ەكەن. قابىرعالار دا جىلۋ ۇنەمدەيتىن بىرنەشە قاباتتى جەڭىلدەتىلگەن اسپالى جابىندىلارمەن قاپتالعان.
وعان قوسا ءزىلزالا بولعان جاعدايدا عيماراتتىڭ بەكەمدىلىگىن ارتتىرۋعا باعىتتالعان كونسترۋكتسيالىق شەشىمدەر قولدانىلعان. كەڭسەنىڭ 20 پايىزدان استامى جەر دەڭگەيىنەن تومەن تۇر ءارى عيماراتتىڭ ىرگەتاسى 1 مەترلىك قالىڭ مونوليت بەتون پليتاسىنا ورنالاسقان. نىساننىڭ جەر استىنداعى سالماعى جەر ۇستىندەگى سالماعىنا تەڭەستىرىلگەن. دەمەك, بۇل جەر سىلكىنىسىنە توتەپ بەرەدى.
ايناش ەسالي,
«ەگەمەن قازاقستان»
الماتى
