اقش فەدەرالدى بارلاۋ بيۋروسىنىڭ ديرەكتورى روبەرت ميۋللەر كونگرەستىڭ وكىلدەر پالاتاسىندا سويلەگەن سوزىندە ءوزى جەتەكشىلىك ەتەتىن ۆەدومستۆونىڭ تاياۋ جىلدارداعى قىزمەتىنىڭ باسىم باعىتتارىنىڭ ءبىرى كيبەرجانسىزدىقپەن كۇرەس بولاتىنىن مالىمدەدى.
روبەرت ميۋللەر اقش-تىڭ قاۋىپسىزدىگىنە, ونىڭ ىشىندە قىتاي تاراپىنان ەكونوميكالىق جانسىزدىق ارەكەتتەر اسا قاتەر توندىرەتىنىن اتاپ وتكەن. رەسمي بەيجىڭ كەزىندە قىتاي تاراپىنىڭ اقش-تىڭ ۇكىمەتتىك مەكەمەلەرى مەن كومپانيالارىنا قارسى كيبەرشابۋىل ۇيىمداستىرماعانىن بىرنەشە مارتە مالىمدەگەن بولاتىن. ر.ميۋللەر سونداي-اق مۇنداي «شابۋىل» رەسەي مەن يراننان دا بولۋى ءمۇمكىندىگىن ەسكەرتكەن.
وپپوزيتسيا ليدەرى سوتقا جۇگىنبەك
پولشاداعى كونسەرۆاتيۆتى وپپوزيتسيانىڭ ليدەرى ياروسلاۆ كاچينسكي ءوزىنىڭ گەرمانيا جانە وسى ەلدىڭ كانتسلەرى انگەلا مەركەل تۋرالى پىكىرلەرىن بۇرمالاپ كورسەتكەنى ءۇشىن نەمىس جۋرناليستەرىنە قارسى سوتقا جۇگىنەتىنىن ءمالىمدەدى. كەيبىر اقپارات قۇرالدارىنىڭ حابارلاۋىنشا, ول گەرمانيانىڭ ءبىر زاڭگەرلىك مەكەمەسىنىڭ قىزمەتىن پايدالانۋى مۇمكىن.
ياروسلاۆ كاچينسكي ءوزىنىڭ «ءبىزدىڭ ارمانىمىزدىڭ پولشاسى» دەپ اتالاتىن جاڭا كىتابىندا گەرمانيا كانتسلەرى ا.مەركەلدىڭ ساياساتىن سىناپ, ونى ماسكەۋمەن ستراتەگيالىق وداق ورناتۋعا تىرىسادى دەپ كىنالاعان سياقتى. سونىمەن قاتار, ساياساتكەر اتالعان كىتابىندا قازىرگى كانتسلەر بۇرىندارى شىعىس-گەرمان ارنايى قىزمەتىمەن بايلانىس جاساعان جانە كانتسلەرلىك لاۋازىمعا ونشالىقتى دەموكراتيالىق جولمەن كەلمەگەن دەگەن پىكىر ايتقان كورىنەدى.
ءپۋتيننىڭ كومانداسىندا قالادى
رەسەي ۇكىمەتىنىڭ توراعاسى ۆلاديمير پۋتين «رەسەي شاقىرادى!» فورۋمىندا ەلدىڭ بۇرىنعى قارجى ءمينيسترى الەكسەي كۋدريننىڭ ءوز كومانداسىندا قالاتىندىعى, ونىڭ اقش-تا ايتقان پىكىرى «ەموتسيالىق» سيپاتتا ايتىلعاندىعى تۋرالى مالىمدەدى.
ۆ.پۋتين الەكسەي كۋدريندى «رەسەي ءۇشىن پايدالى جانە قاجەت» ادام دەپ اتاعان. پرەمەر-مينيستر «ول ءسوز جوق, رەسەيدە عانا ەمەس, الەمدەگى جاقسى مامانداردىڭ ءبىرى» دەپ اتاپ كورسەتكەن ەكەن. الەكسەي كۋدرين قارجى ءمينيسترى قىزمەتىنەن اقش-تا جاساعان بەلگىلى مالىمدەمەسىنەن كەيىن وتستاۆكاعا جىبەرىلگەن ەدى. ول رەسەيدىڭ قارجى مينيسترلىگىنە 2000 جىلدان بەرى باسشىلىق ەتىپ كەلە جاتقان بولاتىن.
قوماقتى قارجىنى جىمقىرعان
توكيو سوتى جاپونيا دەموكراتيالىق پارتياسىنىڭ ەكس-باسشىسى يتيرو ودزاۆاعا قارسى ءىستى قاراۋدى باستادى. ساياساتكەرگە قارجىلىق الاياقتىق جاسادى دەگەن ايىپ تاعىلعان.
جۇرگىزىلگەن تەرگەۋ امالدارى بويىنشا, ول 2004 جىلى ءوزىنىڭ ءۇش كومەكشىسىمەن ىمىرالاسۋ ارقىلى پارتيانىڭ ەسەپ-شوتىنداعى 400 ميلليون يەندى (5 ميلليون دوللار) زاڭسىز ەسەپتەن شىعارعان كورىنەدى. ساياساتكەر بۇل اقشاعا توكيودا وزىنە جەر تەلىمىن ساتىپ العان جانە ءوزىنىڭ حاتشىلارى ءۇشىن تۇرعىن ءۇي سالۋدى جوسپارلاعان سياقتى. توكيو سوتى ودزاۆانىڭ ءۇش كومەكشىسىن دە كىنالى دەپ تاۋىپ وتىر. ال ساياساتكەر وزىنە تاعىلعان ايىپتى مويىنداماۋدا.
تەلەارنا ساتىپ العىسى كەلەدى
ينتەرفاكس اگەنتتىگىنىڭ اقپاراتىنا قاراعاندا, جاڭا ساياسي پارتيا قۇرۋعا نيەتتەنگەن ميللياردەر بۋدزين يۆانيشۆيلي اقپاراتتىق باعدارلامالاردى تاراتۋعا ليتسەنزياسى بار گرۋزياداعى تەلەارنانى ساتىپ الۋعا ىقىلاستى ەكەندىگىن بىلدىرگەن.
«ەگەر مەنىڭ وسى ۇسىنىسىما ناقتى مۇددەلىلىك تانىتقان تەلەارنانىڭ قوجايىنىنا تەلەارنانىڭ قۇنىنان ءۇش ەسەدەن دە كوپ اقشا تولەيمىن», دەپتى ول. ميللياردەردىڭ ايتۋىنشا, تەلەارنانىڭ قۇنىن بۇكىلالەمدىك بانكتىڭ ۇسىنىمىمەن اۋديتورلىق كومپانيالاردىڭ ءبىرى باعالايتىن بولادى. ب.يۆانيشۆيلي سونداي-اق تەلەارنانى ەكى جىلدان سوڭ بۇرىنعى يەسىنە سيمۆوليكالىق باعامەن, ياعني 1 لاريگە باعالاپ, قايتاراتىنىنا ۋادە بەرىپتى.
10 مىڭ شەنەۋنىكتى «وتىرعىزامىن» دەيدى
ۆلاديمير جيرينوۆسكي مەملەكەتتىك دۋمانىڭ وتىرىسىندا «سپراۆەدليۆايا روسسيانىڭ» ليدەرى سەرگەي ميرونوۆتى, ماسكەۋدىڭ ەكس-مەرى يۋري لۋجكوۆتى, تاعى 10 مىڭعا جۋىق ساياساتكەر مەن شەنەۋنىكتى «وتىرعىزۋعا» ۋادە بەردى. ونىڭ مالىمدەۋىنشە, «تۇتقىنداۋ» پرەزيدەنتتىك سايلاۋ اياقتالعان كۇننىڭ ەرتەڭىندە باستالماق.
«پرەزيدەنت كىم بولاتىنىن سىزدەر ءالى بىلمەيسىزدەر. ۇلكەن «سىيلىق» بولادى. تۇتقىنداۋدى 5 ناۋرىزدا, دۇيسەنبى كۇنى ساعات 10.00-دە باستايمىز. ون مىڭ شەنەۋنىكتىڭ ءتىزىمى دايىن, مەن قول قويدىم», دەپتى پارتيا باسشىسى. ءوزىنىڭ سوزىندە ۆ.جيرينوۆسكي مەمدۋما سپيكەرى ب.گرىزلوۆقا ميرونوۆ پەن لۋجكوۆ تاراپىنان بولۋى مۇمكىن سوت قۋعىنداۋىنان قورعاۋ تۋرالى وتىنىشپەن دە شىعىپتى.
قىسقا قايىرىپ ايتقاندا:
*اقش پرەزيدەنتى باراك وباما ءباسپاسوز ماسليحاتىنداعى سوزىندە پاكستاندى اۋعاندىق ەكسترەميستىك توپتارمەن بايلانىس جاسادى دەپ ايىپتادى. پرەزيدەنتتىڭ پىكىرىنشە, بۇل ەكى ەلدىڭ ستراتەگيالىق ارىپتەستىگىنە نۇقسان كەلتىرەدى.
*بريتاندىق پروكۋراتۋرا جەكەلەگەن ادامداردىڭ لوندونعا ساپارمەن كەلگەن ءيزرايلدىڭ بۇرىنعى سىرتقى ىستەر ءمينيسترى تسيپي ءليۆنيدى تۇتقىنداۋعا قول جەتكىزۋ تالابىنا جول بەرمەدى. بريتاندىق قۇقىق قورعاۋشى توپتارى ونى 2008 جىلى گازا سەكتورىنداعى وپەراتسيا كەزىندە اسكەري قىلمىس جاسادى دەپ ايىپتايدى.
*چيليدە ەرەۋىلگە شىققان ستۋدەنتتەر بيلىكپەن كەلىسسوز جۇرگىزۋدەن باس تارتتى. ولاردىڭ تالابى – تەگىن ءبىلىم الۋعا قولجەتىمدىلىك جاعداي جاساۋ.
*رەسەي پرەزيدەنتى دميتري مەدۆەدەۆ ابحازيانىڭ بۇرىنعى پرەزيدەنتى, مارقۇم سەرگەي باگاپشتى «مۋجەستۆو» وردەنىمەن ناگرادتادى. ناگرادا وعان «زاكاۆكازە وڭىرىندەگى جاعدايدى تۇراقتاندىرۋعا جانە ونداعى پروبلەمالاردى شەشۋگە» قوسقان ەڭبەگى ءۇشىن بەرىلگەن.
ينتەرنەت ماتەريالدارى نەگىزىندە ازىرلەندى.
