اۋديوسپەكتاكلدىڭ تۇساۋى كەسىلدى

بەيبىت زاماندا قىرىق جىلعا سوزىلعان يادرولىق سىناقتاردىڭ قاسىرەتى اباي ەلىنىڭ تۋماسى, بەلگىلى جازۋشى روللان سەيسەنباەۆتىڭ نازارىنان ەشقا­شان تىس قالعان ەمەس. وسى تاقىرىپقا ارنالعان ونىڭ شىعارمالارى كوپتەگەن شەتەل تىلدەرىندە دە جارىق كورگەنىن جاقسى بىلەمىز. سونىڭ ءبىرى «دۇنيە تاس-تالقان بولعان كۇن» دەپ اتالادى. جۋىردا سەمەيدەگى «دوستىق» ۇيىندە جازۋشى­نىڭ اتالمىش حيكاياسى بويىنشا جاسالعان اۋديو­سپەكتاكلدىڭ تۇساۋكەسەر ءراسىمى وتكىزىلدى. وعان وسىنداعى «بوكەر» دەپ اتالاتىن ەۆرەي ۇلتتىق مادەني ورتالىعى, «جاڭا شىعارماشىلىق» دەپ اتا­لاتىن جاستاردىڭ قوعامدىق بىرلەستىگى مەن «الفا-مارينو» جارناما-اقپارات اگەنتتىگى مۇ­رىندىق بولدى. ەل تاۋەلسىزدىگى مەن ەلباسى جار­لىعىمەن سەمەي اتوم پوليگونىنىڭ جابىلعانىنا 20 جىل تولۋىنا وراي ۇيىمداستىرىلعان يگى شاراعا سەمەيلىكتەر كوپتەپ جينالدى. اۋديوسپەكتاكل تاسپاسى ەندى زاعيپتار قوعامىنا جىبەرىلمەك. وسىنداي يگىلىكتى شارالار باسقا ازاماتتاردىڭ تاراپىنان دا زور قولداۋ تاۋىپ جاتقانى قۋانتادى. ايتالىق, جاستار مەن بالالار قاۋىمداستىعى جانە كوڭىلدى تاپقىرلار كلۋبى مۇگەدەك بالالارعا ارنالعان قايىرىمدىلىق مارافونىن وتكىزدى. اكتسيا سوڭىندا الگىندەي جاندارعا اقشالاي جانە باسقا دا قايىرىمدىلىق كومەك كورسەتىلدى. مۇنداي يگى شارالاردان قالا كاسىپكەرلەرى دە سىرت قالىپ وتىرعان جوق. سونىمەن بىرگە اۋىلداعى شارۋا قوجالىقتارى دا يادرولىق سىناق زارداپتارىن باسىنان وتكىزگەن جارىمجان جاندارعا قول ۇشىن بەرىپ, ولاردى وتىن-سۋ, مالدارىنا قاجەت جەم-شوپپەن قامتاماسىز ەتۋگە كومەكتەسۋدە. كوپ تۇكىرسە كول دەمەكشى, وسىنداي بەرەكە-بىرلىككە نە جەتسىن! ال كۇنى كەشە عانا سەمەي مەملەكەتتىك ۋنيۆەرسيتەتىندە «يادرولىق قارۋدان قۇتىلعانىمىزعا 20 جىل» دەگەن تاقىرىپپەن كونفەرەنتسيا وتكىزىلدى. داۋلەت سەيسەن ۇلى, سەمەي.