قازىرگى تاڭدا ەلىمىزدىڭ بىتىمگەرلىك باستامالارىنىڭ تۇتاس تاريحى قالىپتاسىپ وتىر. بۇل تاريح ەلباسى نۇرسۇلتان نازارباەۆتىڭ تاۋەلسىزدىكتىڭ العاشقى كەزەڭدەرىندە ورىن العان ازەربايجان مەن ارمەنيا اراسىنداعى تاۋلى قاراباق جانجالىن رەتتەۋدەگى ارااعايىندىق قىزمەتىنەن باستاۋ الادى. سودان بەرگى ارالىقتا قازاقستاننىڭ بىتىمگەرلىك ءىس-قيمىلى جاندانا ءتۇستى.
ەلىمىزدىڭ جۇرگىزىپ كەلە جاتقان ساياساتى پرەزيدەنت تاراپىنان ناقتىلاناتىنىن ەسكەرە سويلەسەك, مەملەكەت باسشىسى نۇرسۇلتان نازارباەۆتىڭ بىتىمگەرلىك باعىتىنداعى ىزگىلىكتى ۇستانىمدارى وزگەرگەن جوق. بۇل ءوز كەزەگىندە قازاقستاننىڭ جاھاندىق قاۋىپسىزدىك ماسەلەلەرىنە قاتىستى ماقساتى مەن مۇددەسى ەشقاشان وزگەرمەيتىنىن, وسى ورايداعى كۇش-جىگەرى الداعى ۋاقىتتا تەك بەيبىت الەم قۇرۋعا جۇمسالا بەرەتىنىن ايقىندايدى.
حالىقارالىق قارىم-قاتىناستار جۇيەسىندەگى ءاربىر قادامىمىزدى ءسوز ەتكەندە ەلىمىزدىڭ بىتىمگەرشىلىك ميسسياسىن سالقىنقاندىلىقپەن, ساۋاتتىلىقپەن اتقارىپ كەلە جاتقانىن اتاپ ءوتۋىمىز كەرەك. بۇل ءبىر جاعىنان ەلىمىزدىڭ جاھاندىق تۇيتكىلدەردى شەشۋدە مول تاجىريبە جيناقتاعانىن, ءوزىنىڭ ميسسياسىن ورىنداۋدا بۇرا تارتپاي, ادىلدىككە جۇگىنەتىنىن اڭعارتادى. سوندىقتان دا بولار, قازىرگى تاڭدا اقش, رەسەي, فرانتسيا جانە باسقا دا الپاۋىت مەملەكەتتەردىڭ باسشىلارى, سونداي-اق, حالىقارالىق بەدەلدى ۇيىمداردىڭ جەتەكشىلەرى اسا كۇردەلى, جاھاندىق قاۋىپسىزدىككە تىكەلەي قاتىسى بار ماسەلەلەردە قازاقستان تاراپىنىڭ ارااعايىندىق جاساۋىن قالايتىندىقتارىن ءبىلدىرىپ كەلەدى.
ماسەلەن, اقش-تىڭ 44-ءشى پرەزيدەنتى باراك وبامانىڭ 2014 جىلى قازاقستان باسشىسىنا بىرنەشە رەت تەلەفون سوعىپ, اقش-رەسەي قارىم-قاتىناسىن رەتتەپ, ورىن العان كۇردەلى ماسەلەلەردىڭ وڭتايلى شەشىلۋىنە ىقپال ەتۋىن وتىنگەنىن, سونداي-اق, ونىڭ ۋكراينانىڭ وڭتۇستىك-شىعىسىنداعى جاعدايعا بايلانىستى سان مارتە حابارلاسىپ, ەلباسىنا ونداعى تۇيتكىلدەردى رەتتەۋگە ۇلەس قوسۋىن سۇراعانىن اتاپ وتۋگە بولادى. سودان كەيىن كوپ وتپەي, ياعني سول جىلدىڭ جەلتوقسان ايىندا فرانتسيانىڭ بۇرىنعى پرەزيدەنتى فرانسۋا وللاند ۋكراينا داعدارىسىن رەتتەۋ ىسىنە بايلانىستى قازاقستانعا كەلىپ نۇرسۇلتان نازارباەۆپەن اڭگىمەلەسكەن سوڭ, اۋەلگى باعىتىن وزگەرتىپ, قايتار جولىندا ماسكەۋگە سوعىپ, رەسەي پرەزيدەنتى ۆلاديمير پۋتينمەن كەزدەسكەنى تالايدىڭ ەسىندە. ارينە, مۇنىڭ بارلىعى ەلباسىنىڭ بىتىمگەرلىك ءرولىنىڭ زور ەكەنىن ۇقتىرادى.
سونىمەن قاتار, پرەزيدەنت نۇرسۇلتان نازارباەۆتىڭ رەسەيلىك بومبالاۋشى ۇشاقتىڭ اتىپ تۇسىرىلۋىنە بايلانىستى تۋىنداعان تۇركيا-رەسەي جانجالىنىڭ تەز ارادا باسىلۋىنا سىڭىرگەن ەڭبەگى ەرەكشە. ەگەر بۇل كيكىلجىڭ ۇزاققا سوزىلىپ نەمەسە باسقا دا كۇردەلى جاعدايلارعا ۇلاسىپ كەتەر بولسا, ەكى جاققا دا وڭاي تيمەسى انىق ەدى. دەگەنمەن, ولاردىڭ باعىنا وراي ىسكە پرەزيدەنت ن.ءا.نازارباەۆ كىرىسىپ, تۇركيا-رەسەي قارىم-قاتىناستارى قالپىنا كەلدى. بۇل دا ەلىمىز بەن ەلباسىمىزدىڭ حالىقارالىق ارەناداعى بەدەلىن ودان ءارى بيىكتەتە ءتۇستى.
ءيا, مۇنداي دانەكەرلىك دەرەكتەرى ەلباسىنىڭ قىزمەتى جولىندا بارشىلىق. وسى ورايدا نۇرسۇلتان نازارباەۆتىڭ باستاماسىمەن ەلىمىزدىڭ قۋاتى جاعىنان الەمدە ءتورتىنشى ورىندا تۇرعان يادرولىق ارسەنالىنان ءوز ەركىمەن باس تارتۋىن, يراننىڭ يادرولىق باعدارلاماسىنا قاتىستى كەرەعار كوزقاراستاردى ءبىر-بىرىنە جاقىنداتىپ, نەگىزگى تۇيتكىلدىڭ شەشىلۋىنە استانا كەلىسسوزدەرى وزىندىك زور ىقپالىن تيگىزگەنىن بۇگىندە ماقتانىشپەن ايتۋعا بولادى.
تاعى ءبىر ايتا كەتەر جايت, ەلباسىنىڭ ساليقالى ساياساتى ارقاسىندا ەلىمىز بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. وسىناۋ بەدەلدى ۇيىمعا مۇشە بولۋىمىزعا ەلباسى نۇرسۇلتان نازارباەۆتىڭ حالىقارالىق قوعامداستىق الدىنداعى جوعارى بەدەلى مەن بىتىمگەرشىلىك باستامالارى تىكەلەي اسەر ەتكەنى انىق.
سوڭعى كەزدەرى سيريا داعدارىسىنا قاتىستى كەلىسسوزدەردى جۇرگىزۋگە استانا الاڭى تاڭدالدى. بەيتاراپ استانادا وتكەن اتالعان كەلىسسوزدەر «استانا پروتسەسى» دەگەن اتاۋمەن تاريحقا جازىلۋدا. بۇگىندە ونىڭ استانادا 5 راۋندى ءوتتى. وسى استانا كەزدەسۋىنە قاتىسۋشىلار العاش رەت سيريا ۇلتتىق بىرلىكتىڭ مەملەكەتى بولىپ قالۋى ءتيىس ەكەنىن قۋاتتادى.
ءيا, بۇگىندە كوپتەگەن مەملەكەت باسشىلارى ايماقتىق نەمەسە الەمدىك وزەكتى ماسەلەلەردى شۇعىل شەشۋدە ەلباسىنا جۇگىنەتىنى, ەلىمىزدى ارااعايىندىققا شاقىراتىنى داستۇرگە اينالىپ وتىر. مۇنىڭ بارلىعى ەل مەرەيىنىڭ بيىكتەگەنىن بىلدىرەتىن فاكتور بولسا كەرەك.
