«Smart Zholy» باعدارلاماسىن قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ قورى بيىل ناۋرىز ايىندا جاريالاعان بولاتىن. اتالمىش جوبا اياسىندا IT سالاسىنداعى وتاندىق پروگرامميستەرگە حالىقارالىق كومپانيالارمەن بىرلەسىپ بىرەگەي يننوۆاتسيالىق ءونىم ازىرلەۋگە جانە سەرۆيس قۇرۋعا مۇمكىندىك بەرىلدى. باعدارلاما قازاقستاندىق ستارتاپتاردىڭ ساپاسى مەن ولاردىڭ بولاشاعىنا, اسىرەسە, جاستار جوباسىنا قاتىستى وزەكتى ماسەلەلەردى شەشۋگە باعىتتالدى.
«Smart Zholy» وڭتۇستىك ازياداعى «Echelon Asia Summit» جەتەكشى ستارتاپ-الاڭىمەن بىرلەسىپ جاسالعان. جوبانىڭ باستى ەرەكشەلىگى – كونكۋرستىق نەگىزدە ىرىكتەلىپ الىنعان جەڭىمپازداردىڭ الەمنىڭ جەتەكشى تەحنولوگيالىق حابىنىڭ ءبىرى – سينگاپۋرگە جولداما الۋىندا بولدى. ياعني, قازاقستاندىق ۇزدىك پروگرامميستەر شەتەلدەگى ءىرى كومپانيالاردا تاجىريبەدەن وتە ءجۇرىپ ءوز جوبالارىن جۇزەگە اسىردى.
«Smart Zholy» جوباسىنىڭ نەگىزگى ماقساتى − جاستاردىڭ ستارتاپتارىن تەك قانا قازاقستانعا ەمەس, عالامدىق نارىققا شىعارۋ, مەملەكەت باسشىسىنىڭ جولداۋىندا قوزعالعان ەكونوميكانى جەدەل جاڭعىرتۋ جانە تسيفرلى ەكونوميكانى قۇرۋ مىندەتىن ورىنداي وتىرىپ, ەلىمىزدى تەحنولوگيالىق سالاسىن جەتىلدىرۋ بولاتىن. جوبا ەكى كەزەڭگە ءبولىندى. ءبىرىنشى كەزەڭ استانا, الماتى, قاراعاندى, پاۆلودار قالالارىندا وتكىزىلدى. ەكىنشى كەزەڭ ەلىمىزدى تۇتاس قامتىدى. 10 كوماندا جەڭىمپاز دەپ اتالدى.
سينگاپۋر ەلىندە ءبىزدىڭ ماماندار ەڭ اتاقتى دەگەن ەكى كومپانيادا - (əلەمدەگى ەڭ ۇلكەن پورتتىڭ ءبىرى) PSA پورتىنىڭ جəنە Parkway Pantai مەديتسينا ورتالىعىندا بولعان. قازاقستاندىق پروگرامميستەر كومپانيانىڭ IT-مەن بايلانىستى بيزنەس مۇمكىندىكتەرىن جەتىلدىرۋگە كومەكتەسكەن. ال بۇگىندە ولار تاجىريبەلەرىن ءوز يدەيالارىن جۇزەگە اسىرۋ جولىندا قولدانۋدا. شەتەلدى مويىنداتقان جوبالارىن قازاقستاندىق كومپانيالارعا ۇسىنىپ, ءتىپتى كەيبىرىنەن ارنايى تاپسىرىس تا الىپ ۇلگىرگەن. ياعني, تەلەكوممۋنيكاتسيا, لوگيستيكا, قارجى جانە دەنساۋلىق ساقتاۋ سالاسىنداعى ءىرى كورپوراتسيالاردىڭ وتىنىمدەرى بويىنشا جوبالار ازىرلەدى.
دينارا بىتىكوۆا,
«ەگەمەن قازاقستان»
