«بۇل جەردە سارماتتاردىڭ عيباداتحاناسى بولعان. ەكى قورعاندى قازعانىمىزدا قاتار جەرلەنگەن ەر مەن ايەلدىڭ قاڭقاسى شىقتى. ولار وسىدان 2200 جىل بۇرىن جەرلەنگەن. ايەلدىڭ وباسىنان التىن, اسىل تاستار مەن جۇزگە جۋىق مونشاق تاپتىق», - دەيدى ارحەولوگ مارات قاسەنوۆ.
ستۋدەنتتەر تاپقان جادىگەرلەر حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ مۋزەيىندە ساقتالادى.
قىزىلقوعا اۋدانىندا وبلىستىق تاريحي-ولكەتانۋ مۋزەيى دە ارحەولوگيالىق زەرتتەۋ جۇمىستارىن جۇرگىزىپ جاتىر. مۋزەي باسشىسى راشيدا حاريپوۆا ميالى قورعاندار توبىنا قازبا جاساۋ كەزىندە قولا داۋىرىنە جاتاتىن سارمات كومبەسى تابىلعانىن ايتادى. كومبەدەن ءبىر قۇلاعى جانۋار بەينەسىندە جاسالعان مەتالل قازان شىققان. التىن زەرگەرلىك بۇيىمدار مەن قارۋ-جاراق, تۇرمىستىق زاتتار دا الىندى. بۇل جادىگەرلەر ءبىزدىڭ داۋىرىمىزگە دەيىنگى ەكى مىڭ جىل بۇرىنعى كەزەڭگە سايكەس كەلەدى ەكەن. قورعاندار توبىنا زەرتتەۋ جالعاسىپ جاتىر.
جالپى وبلىستا سارمات كەزەڭىنە تيەسىلى 100-دەن استام قورعان ءالى زەرتتەلگەن جوق. قىزىلقوعادان كەيىن ارحەولوگتار سارايشىق پەن اقتوبە-لاەتي قالالارىنىڭ ورىندارىنا قازبا جۇمىستارىن جۇرگىزەدى.
باقىتگۇل باباش,
"ەگەمەن قازاقستان"
اتىراۋ
