سۋ مەن عيماراتتاردى جىلىتۋعا ارنالعان اگرەگات كۇن ەنەرگياسىن جينايتىن پلاستينالاردىڭ كومەگىمەن ساۋلەلەردى ورتالىققا شوعىرلاندىرادى. وندا ورنالاسقان شىنى تۇتىكشە تۇرىندەگى ۆاكۋم تسەلسي ولشەمىمەن 900 گرادۋسقا دەيىن قىزادى دا, ەدەندى, باسسەيندى نەمەسە كىشىگىرىم ۇيلەردى جىلىتا الادى. ۇيىمداستىرۋشىلاردىڭ ايتۋىنشا, قۇرىلعىنىڭ 4 كۆت بولاتىن قۋاتتىلىعى ۇلكەن ۇيلەرگە شاماسى كەلمەيدى. دەسە دە, كۇنىنە 1000 ليتر سۋدى جىلىتۋعا قاۋقارلى. اپپاراتتىڭ بىرەگەيلىگى سول, كۇننىڭ ورنالاسقان جەرىن ءوزى انىقتايدى جانە كۇنباعىس سەكىلدى پلاستينالارىن كۇنگە قاراي بۇرادى.
ۋكراينالىق وندىرۋشىلەردىڭ پاتەنتتەلگەن تاعى ءبىر تەحنولوگياسى – ۋلترادىبىستى شىعىن ولشەۋىش. ونى گاز, مۇناي جانە سۋ قۇبىرلارىنداعى قىسىمدى ولشەۋ ءۇشىن پايدالانادى. «اپپارات تەتىكتەرىندەگى ۋلترادىبىستىڭ كومەگىمەن قۇبىردى اشپاي-اق ونىڭ ىشىندەگىسىن, كولەمىن جانە قىسىمىن بىلۋگە بولادى. ىڭعايلى دا ىقشام شاباداندا ورنالاسقان قۇرىلعىنىڭ قۋاتى 8 ساعاتقا دەيىن جەتەدى», دەيدى تانىستىرۋشىلار.
ۋكراينا سەكتسياسىنىڭ ءۇشىنشى جاڭالىعى – كۇن ساۋلەلەرىنەن ەنەرگيا وندىرەتىن قوندىرعى. كۇندىزگى ۋاقىتتا كۇننەن قۋات جينايتىن پەردەشە كەشكى ۋاقىتتا بولمە شامىنىڭ جارىعىنان دا ەنەرگيا وندىرەدى. جينالعان ەنەرگيانى كىشىگىرىم تۇرمىستىق تەحنيكالارعا قولدانۋعا بولادى. اتاپ ايتقاندا, تەلەفون مەن نوۋتبۋكتى قۋاتتاۋعا, تەلەديداردى قوسۋعا جارامدى.
اسحات رايقۇل,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
