وتەپوۆ كوشەسىندەگى ترامۆاي جەلىسى جەردەن قازىپ الىنىپ, بۇرىنعى تەمىر جول ورنىنا جاڭادان اسفالت توسەلە باستادى. الماتى قالاسىنىڭ اكىمدىگى بيىل جاز ايىندا وتەتىن قۇرىلىس جۇمىستارىنىڭ اياسىندا شەۆچەنكو مەن قوناەۆ, وتەپوۆ كوشەلەرىندەگى بارلىعى 7,5 شاقىرىمعا سوزىلاتىن ترامۆاي جولدارى رەلستەن تولىقتاي تازارتىلادى دەپ مالىمەت تاراتتى. الدا – ماقاتاەۆ كوشەسى! شويىن جولدان بوساعان اۋماققا اسفالت توسەلىپ, جەڭىل كولىكتەر ايالدايتىن اۆتوتۇراقتارعا ورىن دايىندالىپ, جول جيەكتەرى ساندەلۋدە. وعان الماتىنىڭ تاعى ءبىر سوڭعى جاڭالىعى – ۆەلوسيپەد جولدارى جارىسا توسەلە باستادى.
كۇن ساناپ كوركەيىپ, ساعات ساناپ اينالاعا قاناتىن جايىپ ۇلعايعان الىپ مەگاپوليستىڭ قوعامدىق كولىك قاتىناستارى قىزمەتىنىڭ مۇلدەم جاڭا ۇلگىگە كوشكەنى دە بەلگىلى. ونىڭ ءبىرى – الماتى مەتروسى. الداعى جىلدىڭ سوڭىنا دەيىن جاڭادان «سارىارقا,» «دوستىق» بەكەتتەرى پايدالانۋعا بەرىلمەك. مۇنىڭ سىرتىندا قالا باسشىلىعىنىڭ تاياۋ مەزگىلدە تۇرعىنداردىڭ كۇندەلىكتى ءجۇرىپ-تۇرۋىن مەيلىنشە جەڭىلدەتەتىن «الماتى-2020» اتتى جاڭا جوبانى جۇزەگە اسىراتىن ءتۇرى بار.
...ەڭ العاشقى ترامۆاي الماتى كوشەلەرىندە 1937 جىلى كۇزدە جولعا شىققان ەكەن. سول زاماننىڭ ەڭ ءتيىمدى ءارى وركەنيەت ۇلگىسى سانالعان ترامۆاي كولىگى اراعا 80 جىل سالىپ الماتىمەن قوشتاسىپ وتىر.
تالعات ءسۇيىنباي,
«ەگەمەن قازاقستان»
الماتى
