مانيتوبا پروۆينتسياسىنىڭ استاناسى ۆيننيپەگ قالاسىندا وتكەن ءىس-شاراعا قازاقستان رەسپۋبليكاسىنىڭ كاناداداعى ەلشىسى كونستانتين جيگالوۆ, مانيتوبا مادەنيەت ءمينيسترى روشەل سكۆايەرس, قارجى ءمينيسترى كامەرون فريزەن, پروۆينتسيا پارلامەنتىنىڭ دەپۋتاتتارى جانە شامامەن 400-دەي قوعام قايراتكەرى قاتىستى.
قاتىسۋشىلاردىڭ الدىندا سويلەگەن سوزىندە ك.جيگالوۆ كىتاپ اۆتورىن قازاقستاننىڭ تاريحى مەن مادەنيەتىن ساۋلەت تۇرعىسىنان زەرتتەگەن عىلىمي جوبانىڭ ءساتتى اياقتالۋىمەن قۇتتىقتاي كەلىپ, كانادا تاريحىندا قازاقستانعا ارنالعان العاشقى كىتاپتىڭ 2017 جىلى باسىپ شىعارىلۋىنىڭ ەرەكشە ماڭىزىن اتاپ ءوتتى.
«بيىلعى جىلى قازاقستان مەن كانادا اراسىنداعى ديپلوماتيالىق قارىم-قاتىناستارعا − 25 جىل, پرەزيدەنت ن.ءا.نازارباەۆ باس ارحيتەكتورى بولىپ سانالاتىن استانا قالاسىنىڭ ەلوردا بولۋىنا 20 جىل تولىپ وتىر. بۇل كىتاپ ەكسپو-2017 حالىقارالىق مامانداندىرىلعان كورمەسىنىڭ اشىلۋى قارساڭىندا جارىق كورۋدە. پروفەسسور فرانك البو كىتاپتىڭ جەكە بولىگىن سوعان ارناپ وتىرعانى بەلگىلى», – دەدى ك.جيگالوۆ.
سونىمەن قاتار, قازاقستان ەلشىسى تىڭداۋشىلاردى ەلىمىزدىڭ الەۋمەتتىك-ەكونوميكالىق دامۋى, سونداي-اق, ەلىمىزدىڭ جاڭعىرتىلۋىنىڭ باستى قادامدارى تۋرالى جان-جاقتى حاباردار ەتتى. مەملەكەت باسشىسىنىڭ باستاماسىمەن ىسكە اسىرىلىپ جاتقان قوعامدىق سانانى جاڭعىرتۋ جانە «تۋعان جەر» باعدارلاماسى اياسىنداعى «قازاقستاننىڭ كيەلى جەرلەرى» جوباسىن ەسكەرە وتىرىپ, اۆتور كوتەرگەن تاقىرىپتاردىڭ وزەكتىلىگىنە دە ەرەكشە نازار اۋداردى.
كانادا جۇرتشىلىعى «استانا: ساۋلەتى, جۇمباعى, تاعدىرى» كىتابىنا قىزىعۋشىلىق تانىتىپ, قازىرگى كەزدە ونىڭ العاشقى تيراجى (4500 دانا) تولىعىمەن ساتىلدى. كىتاپ كانادانىڭ رەسمي بەستسەللەرى اتاعىنا يە بولدى.
ف.البو ءىس-شاراعا جيناعان جۇرتشىلىقتى كىتاپتىڭ رەسمي سايتى (www.astanamyth.com), «اتوم» جوباسىمەن بىرگە ىسكە اسىرىلىپ جاتقان يادرولىق قارۋعا تىيىم سالۋ جونىندەگى ونلاين ناۋقان, سونداي-اق, الداعى ۋاقىتتا لوندون, ۆاشينگتون, وتتاۆا قالالارىندا جانە استاناداعى ەكسپو-2017 كورمەسى شەڭبەرىندە ارنايى تۇساۋكەسەر ۇيىمداستىرۋ تۋرالى ءوز جوسپارلارىمەن تانىستىردى, دەپ حابارلادى ەلىمىزدىڭ سىرتقى ىستەر مينيسترلىگىنىڭ ءباسپاسوز قىزمەتى.
