گرۋزيا مەملەكەتىنىڭ ۇلتتىق كۇنىنىڭ اشىلۋ سالتاناتى قازاقستان جانە گرۋزيا مەملەكەتتەرىنىڭ ءانۇراندارىن ورىنداۋمەن باستالدى. سودان كەيىن ساحناعا گرۋزيانىڭ باس كوميسسارى, ەنەرگەتيكا ءمينيسترىنىڭ ورىنباسارى يليا ەلوشۆيلي شىعىپ, قۇتتىقتاۋ ءسوز سويلەدى. ول ءوز سوزىندە ەكى ەل اراسىنداعى ۋاقىتپەن شىڭدالعان دوستىقتى تىلگە تيەك ەتە كەلىپ, استانادا ءوتىپ جاتقان الەمدىك كورمەنىڭ ءمانى مەن ماڭىزىنا توقتالدى. ودان ءارى ول ءوز سوزىندە گرۋزيا ۇلتتىق پاۆيلونىنىڭ تاقىرىبى «ەنەرگيا كوزى – ادامدار» دەپ اتالاتىندىعىن, ءوز ەلىندە بۇل كورمەگە دەگەن قىزىعۋشىلىقتىڭ جوعارى بولعاندىعىن اتاپ كورسەتتى. گرۋزيا «استانا ەكسپو-2017» كورمەسىنە قاتىسۋىن راستاعان العاشقى مەملەكەتتەردىڭ ءبىرى بولدى. سوڭعى دەرەكتەر بويىنشا استاناداعى كورمەگە گرۋزيادان 10 مىڭنان استام ادام كەلەدى دەپ كۇتىلۋدە.
گرۋزيا ۇلتتىق كۇنىنىڭ اشىلۋ سالتاناتىنا گرۋزيا پرەزيدەنتى گەورگي مارگۆەلاشۆيلي باستاعان ۇلكەن رەسمي دەلەگاتسيا كەلىپ قاتىستى.
ۇلتتىق كۇننىڭ اشىلۋ سالتاناتى گرۋزيادان ارنايى كەلگەن ونەر شەبەرلەرىنىڭ كونتسەرتىنە ۇلاستى. گرۋزين حالقىنىڭ ۇلتتىق مۋزىكاسى, ءبيى مەن فولكلورى بۇكىل الەمگە تانىمال. ونەر شەبەرلەرىنىڭ كونتسەرتى جينالعان كورەرمەندى بەي-جاي قالدىرمادى. ساحنادا تبيليسي مەملەكەتتىك وركەسترىنىڭ سۇيەمەلدەۋىمەن اتاقتى انشىلەر ناني برەگۆادزە, تامارا گۆەردتسيتەلي, ەكي مامالادزە ءان شىرقادى.
«ەنەرگيا كوزى − ادامدار» دەپ اتالاتىن گرۋزيا پاۆيلونى 500 شارشى مەتر الاڭعا ورنالاسقان. پاۆيلونداعى جادىگەرلەر وسى ەلدىڭ ەنەرگەتيكالىق الەۋەتىمەن تانىستىرىپ, سۋ, جەل, كۇن جانە باسقا جاڭعىرمالى ەنەرگيا كوزدەرى ارقىلى ەلەكتر قۋاتىن وندىرۋدەگى كوپتەگەن وزىق تەحنولوگيالاردى دارىپتەيدى. سونىمەن بىرگە, گرۋزيا پاۆيلونىندا قولونەر جارمەڭكەسى اشىلعان. توقىما, زەرگەرلىك بۇيىمدار, كەراميكا, تىگىنشىلىك, شىنى, ەمال جانە سازدان جاسالعان قولونەر بۇيىمدارى كورمەگە كەلۋشىلەرگە كوپتەپ ۇسىنىلادى. وسىنداي مازمۇندى ءارى قىزىقتى باعدارلامامەن ورىلگەن گرۋزيا مەملەكەتىنىڭ كورمەدەگى ۇلتتىق كۇنى ەرەكشە تارتىمدى ءوتتى.
جىلقىباي جاعىپار ۇلى,
«ەگەمەن قازاقستان»
