كوماندالىق سپورت تۇرلەرىنىڭ قيىندىعى كوپ. بوكسشى نەمەسە بالۋان سەكىلدى جالعىز ءوزىڭ دايىندالىپ, قارسىلاستىڭ ءبارىن «قيراتا» سالمايسىڭ. 11 ويىنشىنىڭ بىرەۋى السىزدىك تانىتسا بولدى, سونىڭ ءوزى جالپى ناتيجەگە اسەر ەتەدى. ال ءبىزدىڭ قۇراماداعى جاعداي تىپتەن قيىن. كوماندانى العا جەتەلەيتىن ەڭ بولماسا ءبىر فۋتبولشى جوق. سەنىم ارتقان كاپيتان باۋىرجان يسلامحاننىڭ ءوزى كومانداسىن قيىن جاعدايعا قالدىرىپ كەتتى. وسىدان كەيىن نە ايتۋعا بولادى؟
– قۇرالبەك دوسجان ۇلى, الماتىدا دانيا قۇراماسىمەن كەزدەسكەن قازاقستان قۇراماسىنىڭ ونەرىنە قانداي باعا بەرەسىز؟
– قازاقستان مەن دانيا كەزدەسۋىن تاماشالادىم. مەن بۇل ويىنعا «3» دەگەن باعا قويدىم. دانيا قۇراماسىنىڭ فۋتبولشىلارى وتە جاس, ءارى دارىندى. بولاشاقتارىنان ۇلكەن ءۇمىت كۇتتىرەتىن ويىنشىلار. سوعان قاراماستان, ءبىزدىڭ قۇراما ءوز مۇمكىندىكتەرىنەن تومەن وينادى. باس باپكەر الەكساندر بوروديۋك كەيبىر فۋتبولشىلارعا دۇرىس باعىت بەرمەگەن سەكىلدى. قۇرامانى تاڭداۋدا قاتەلىكتەر جىبەرگەن. عافۋرجان سۇيىمباەۆ «قايراتتا» سول قاپتالدا ويناسا, كەشەگى ويىندا قورعانىستا, وڭ قاناتىندا ونەر كورسەتتى. ەكىنشى تايمدا شومكونى اۋىستىرىپ الاڭعا شىققان يان ۆوروگوۆسكي نەگىزى جارتىلاي قورعاۋشى. سونداي-اق, جالپى قورعانىستا التى فۋتبولشى ءجۇردى دە, شابۋىلعا تەك نوسەرباەۆتى شىعاردى. ويىن تاكتيكاسى ورتاشا بولدى. سەبەبى, فۋتبولدا شەبەرلىك باسىم ءرول وينايدى.
دانيا فۋتبولشىلارى ءبىزدى مەنسىنبەي شىققان سەكىلدى كورىندى. ماتچتىڭ العاشقى 15-مينۋتىندا باسىمدىقتى قازاقستانعا بەرىپ قويدى. الايدا, ءبىزدىڭ فۋتبولشىلار دوپقا كوبىرەك باقىلاۋ جاساسا دا ءوز مۇمكىندىكتەرىن ءتيىمدى پايدالانا المادى. ءارى-بەرى جۇگىرىپ, بوسقا شارشاپ قالعان سياقتى. ال قوناقتار ءبىرىنشى تايمدا ەكى شابۋىل ۇيىمداستىردى. ونىڭ بىرەۋى گولمەن اياقتالدى. فۋتبولدا بوسقا كوپ جۇگىرە بەرۋدىڭ قاجەتى جوق.
– عافۋرجان سۇيىمباەۆتىڭ ءوز پوزيتسياسىندا ويناماعانىن ايتتىڭىز. باپكەر مۇنداي قادامعا نەلىكتەن باردى دەپ ويلايسىز؟
– باس باپكەردىڭ ءوزىنىڭ تاكتيكاسى بولعان شىعار. بىراق, قانداي تاكتيكا بولسىن ءار ويىنشىنىڭ فۋتبولدا ورنى بولادى. عافۋرجان نەگىزى سولاقاي. ەكىنشى تايمدا بەيسەبەكوۆتى شىعاردى. ونى نەگىزى ماتچتىڭ باسىنان ويناتۋ كەرەك ەدى. سوندا دۇرىس بولار ما ەدى دەپ ويلايمىن.
– كاپيتان باۋىرجان يسلامحان قۇرامانى ءبىرىنشى تايمدا-اق قيىن جاعدايعا قالدىرىپ كەتتى. باۋىرجاننىڭ بۇل ءبىرىنشى ارەكەتى ەمەس. نەلىكتەن اسا ماڭىزدى ويىنداردا كاپيتاننىڭ جۇيكەسى ءجيى سىر بەرەدى؟
– يسلامحاننىڭ ىستەگەنى دۇرىس ەمەس. قارسىلاسىڭ قانشالىقتى تەۋىپ توقتاتىپ جاتسا دا, اشۋعا بوي الدىرماعان ءجون. فۋتبولشى دەگەن سالقىنقاندى بولۋى كەرەك. بۇل جەردە باۋىرجان ورتالىق الاڭدا, ەشقانداي قاۋىپتى شابۋىل بولماسا دا, وسىنداي تارتىپسىزدىك جاساپ وتىر. مۇنىڭ ءبارى قازاقستاندا چەمپيوناتىنداعى كەيبىر تورەشىلەردىڭ مۇنداي ارەكەتتەرگە كوز جۇما قاراۋىنان. ىشكى چەمپيوناتتا ابدەن ەركىنسىپ ۇيرەنىپ قالعاندىقتان مۇنداي وسپادار قىلىقتار حالىقارالىق ارەنا دا قايتالانىپ جاتادى.
– الداعى تاعى بىرنەشە ماتچ بار. سول كەزدەسۋلەردە مىنانداي ويىنمەن ۇپاي جيناي الامىز با؟
– ەندى باپكەرلەر شتابى قاي جەردە قاتەلىك كەتكەنىن تالداۋ جاساپ, قورىتىندى شىعارۋى قاجەت. سول قاتەلىكتەردى كەلەسى جولى جىبەرمەۋدى ويلاستىرۋى ءتيىس. ءاردايىم ۇتۋعا مۇمكىندىك بولادى. 1 قىركۇيەكتە استانادا چەرنوگوريانى قابىلدايمىز. سول كەزدە قالاي بولعاندا جەڭىلمەۋدىڭ جاعدايىن جاساۋى ءتيىس. مەن ءاردايىم قۇرامادان ۇلكەن ءۇمىت كۇتەمىن. مۇنىڭ بارلىعى چەمپيوناتقا بايلانىستى. چەمپيونات جوعارى دەڭگەيلى بولسا, فۋتبولشىلاردىڭ شەبەرلىگى وسەدى, شىڭدالادى.
– سوڭعى ويىنعا باس باپكەر شابۋىلشى سەرگەي حيجنيچەنكونى شاقىرمادى. بوروديۋك مۇنىڭ سەبەبىن سەرگەيدىڭ بەلارۋس چەمپيوناتىنداعى ويىن پراكتيكاسىنىڭ ازدىعىمەن بايلانىستىردى.
– كىمدى شاقىرۋ, كىمدى شاقىرمايتىنىن باپكەر ءوزى بىلەدى عوي. دەگەنمەن, بوروديۋكتىڭ ستاديون جاعالاپ ويىن كورمەيتىنى تاڭقالدىرادى. جاقىندا الماتىدا «قايرات» پەن «استانا» كەزدەستى. چەمپيوناتتىڭ ورتالىق ويىنى. بوروديۋكتى ستاديوننان كورمەدىم. باس باپكەر ستاديونعا بارىپ ويىن كورمەسە, فۋتبولشىلاردى قالاي تاڭدايدى؟ بەلارۋس مەملەكەتى دە جاقىن ورنالاسقان. نەگە كومەكشىلەرىنىڭ ءبىرىن جىبەرمەيدى. سول كەزدە سەرگەي حيجنيچەنكونىڭ قانداي فورمادا جۇرگەنىن كورەتىن ەدى عوي. جاتتىقتىرۋشى ءوز جۇمىسىنا سالعىرت قاراسا, ناتيجە قايدان بولسىن؟
اڭگىمەلەسكەن
بەك تولەۋوۆ,
جۋرناليست
استانا
