ۇزدىك فرانتسۋز كومپانيالارى مەن ستارتاپ وكىلدەرىنىڭ باسىن قوسقان الاڭدا ەنەرگيانى ۇنەمدى پايدالانۋدىڭ يننوۆاتسيالىق تەحنولوگيالارى تانىستىرىلدى.
ەكسپو-2017 حالىقارالىق كورمەسىندەگى فرانتسيا پاۆيلونىنىڭ باس كوميسسارى پاسكال لورو ەنەرگيا ءوندىرىسىن وڭتايلاندىرۋ بويىنشا ازىرلەنگەن پاۆيلوننىڭ تاقىرىپتىق بولىمدەرىن ارالاي ءجۇرىپ, تانىستىرىپ شىقتى. قوقىس قالدىقتارىن جيناۋ جانە قايتا وڭدەۋمەن اينالىساتىن Sytcom مەملەكەتتىك اگەنتتىگى قوقىستاردى سۇرىپتاۋدىڭ جاڭاشىل يدەيالارىن ۇسىنىپ وتىرعانىن تۇسىندىرگەن باس كوميسسار تسيركۋليارلىق ەكونوميكا ماڭىزىمەن ساباقتاستىردى.
– قازاقستان مەن فرانتسيا ساياسي, ەكونوميكالىق, ستراتەگيالىق جوسپارلار اياسىندا تىعىز قارىم-قاتىناستا. ەكسپو-2017 كورمەسى اياسىندا ءوز پاۆيلونىمىزدى تانىستىرىپ وتىرعانىمىزعا وتە قۋانىشتىمىز. وزدەرىڭىز كورىپ تۇرعاندارىڭىزداي فرانتسيا پاۆيلونى بىرنەشە تاقىرىپتىق زوناعا بولىنگەن. اتاپ ايتقاندا, ەكوقالا, بولاشاق ەنەرگياسى, ەكولوگيالىق كولىك سالالارى بويىنشا بەلگىلى فرانتسۋز ونەركاسىبىنىڭ كوشباسشى كومپانيالارى سوڭعى تەحنولوگيالىق جاڭالىقتارىن ۇسىنادى, – دەدى پاسكال لورو.
1955 جىلدان بەرى ەلەكتر كولىگىن دامىتۋدى قولعا العان PEUGEOT كومپانياسى كورمە قوناقتارىنا جينالمالى ساموكات, ەلەكتروسكۋتەر, ەلەكتروۆەلوسيپەد سىندى ەكولوگيالىق كولىكتەردىڭ سوڭعى جەتىستىكتەرىن تانىستىردى.
قورشاعان ورتا ماسەلەلەرىن رەتتەۋدە ماڭىزدى ءرول اتقاراتىن فرانتسيا سوڭعى جىلدارى ەلەكتر كولىگىن جاپپاي قولدانىسقا ەنگىزۋدە بەلسەندى جۇمىس ىستەپ كەلەدى. 2015 جىلعى مالىمەت بويىنشا, فرانتسيادا 5 مىڭنان استام ەلەكتر بەكەتى جۇمىس ىستەيدى.
ايا ءومىرتاي,
«ەگەمەن قازاقستان»
