– الەكساندر مىرزا, الەم چەمپيوناتىنا ىرىكتەۋ اياسىنداعى ەرتەڭگى دانياعا قارسى ويىنعا دايىندىقتارىڭىز قانداي؟
– شاكىرتتەرىم 10 ماۋسىمداعى ويىنعا 100 پايىز دايىن بولۋ ءۇشىن تىنباي جاتتىعۋ جاساۋدا. تالعاردا ورنالاسقان بازامىز فۋتبولشىلارعا وتە قولايلى. جۋىردا فۋتبولشىلار دايىندالاتىن ورتالىقتى زامان تالابىنا ساي جوندەپ, پايدالانۋعا بەردى. بۇيىرسا, ءوز جەرىمىزدە, جانكۇيەرلەرىمىزدىڭ الدىندا جاقسى ويىن كورسەتەمىز دەپ ويلايمىن. ۇلتتىق قۇراما فۋتبولشىلارىمەن قاتار, تالعاردا جاستار قۇراماسى دا دايىندالۋدا. ءبىر سوزبەن ايتقاندا, كەزدەسۋگە تاس-ءتۇيىن دايىنبىز.
– بىلتىر كوپەنگاگەندە وتكەن قازاقستان-دانيا اراسىنداعى العاشقى كەزدەسۋدى كورگەن بولارسىز. سىزدىڭشە, سول ويىندا قازاقستان قۇراماسىنا نە جەتىسپەدى؟
– ناقتى مىنا نارسە جەتىسپەدى دەپ تاپ باسىپ ايتا المايمىن. كەز كەلگەن جەڭىلىستەن سوڭ وڭ قورىتىندى جاساۋ كەرەك. ءبىز كوبىرەك جۇمىس ىستەپ, العا قاراي جىلجۋىمىز قاجەت. سوندا عانا جاقسى ناتيجەگە جەتۋگە بولادى.
– دانيا قۇراماسىنىڭ قازىرگى مۇمكىندىگىن قالاي باعالايسىز؟ قاي فۋتبولشىلارى بىزگە قيىندىق تۋعىزۋى مۇمكىن؟
– دانيا قۇراماسى − ەۋروپالىق دەڭگەيدەگى ۇزدىك قۇرامانىڭ ءبىرى. فۋتبولشىلارىنىڭ كوبى ەۋروپانىڭ توپ-5 چەمپيوناتىندا وينايدى. بۇل – دانيا قۇراماسىنىڭ حالىقارالىق دەڭگەيدە تاجىريبەسى بار دەگەن ءسوز. مىسالى, اعىلشىن پرەمەر-ليگاسىنداعى «توتتەنحەمنىڭ» جارتىلاي قورعاۋشىسى كريستيان ەريكسەندى, بۋندەسليگاداعى مەنحەنگلادباحتىڭ, «بورۋسسيا» كلۋبىندا دوپ تەبەتىن قورعاۋشىلار اندرەاس كريستەنسەن مەن ياننيك ۆەستەرگوردى, «اياكس» كومانداسىنىڭ جاس شابۋىلشىسى, جۋىردا عانا ەۋروپا ليگاسىنىڭ فينالىندا ويناعان كاسپەر دولبەرگ جانە تاعى باسقا تاجىريبەلى ويىنشىلاردى اتاپ وتۋگە بولادى.
– 10 ماۋسىم كۇنى قازاقستان ۇلتتىق قۇراماسى قانداي جاعدايدا ءساتتى ويىن كورسەتۋى مۇمكىن؟
– ءبىز ءوز ۇيىمىزدە ياعني, الماتىدا جانكۇيەرلەرىمىزدىڭ الدىندا وينايمىز. بۇل فۋتبولشىلار ءۇشىن وتە ماڭىزدى. ستاديون تولى جانكۇيەر الدىندا شاكىرتتەرىم ايانىپ قالمايدى دەپ ۇمىتتەنەمىن. ءار فۋتبولشى ءوزىنىڭ جاقسى ويىن ورنەگىن كورسەتىپ, تەك جەڭىس ءۇشىن الاڭعا شىعادى.
– دانياعا قارسى ماتچقا دايىندىق بارىسىندا جاستار قۇراماسىمەن كەزدەسۋ وتكىزىپسىزدەر...
– جەتىنشى ماۋسىم كۇنى ەلىمىزدىڭ جاستار قۇراماسىمەن باقىلاۋ ويىن وتكىزىپ, 4:2 ەسەبىمەن جەڭىسكە جەتتىك. ويىن جابىق تۇردە بولدى. سوندىقتان جۋرناليستەردى شاقىرمادىق. بۇل كەزدەسۋ ءبىراز قاتەلىكتەرىمىزدى كورسەتىپ بەردى. دانياعا قارسى ويىندا قاتەلىكتەردى تۇزەيتىن بولامىز. بۇل ويىن ءاربىر جاس فۋتبولشىنىڭ كەلەشەكتە ۇلتتىق قۇراما ساپىندا ويناۋعا ۇمتىلۋ ماقساتىندا جوسپارلانعان. ايتا كەتەرلىگى, بىزدە جاستار قۇراماسىنىڭ جاتتىقتىرۋشىلار شتابىمەن ءوزارا تۇسىنىستىك جاقسى قالىپتاسقان.
– جاس فۋتبولشىلاردىڭ ويىنىن قالاي باعالايسىز؟
– ارينە, ولار ءبىزدىڭ بولاشاقتاعى ءۇمىتىمىز. جاستاردىڭ قازىردەن ۇلتتىق قۇرامانىڭ نەگىزگى فۋتبولشىلارىمەن بىرگە جاتتىعۋى ولاردى ىنتالاندىرىپ, قوسىمشا كۇش بەرەدى. تەك ەڭبەك ەتىپ, تىنباي جاتتىعىپ, ءوز-ءوزىن دامىتاتىن بولسا, بولاشاقتا جاستاردان كوپ ءۇمىت كۇتەمىن.
اڭگىمەلەسكەن
ءالي بيتورە,
«ەگەمەن قازاقستان»
