كورمەنى مادەنيەت جانە سپورت ءمينيسترى ارىستانبەك مۇحامەدي ۇلى اشتى. ەكسپو قارساڭىندا وتكىزىلىپ وتىرعان العاشقى مادەني شارانىڭ ەربولات تولەپبايدىڭ كورمەسى بولعانى وتە قۋانىشتى جايت. بۇگىندە سۋرەتشىنى دۇنيە جۇزىندەگى ونەرسۇيەر قاۋىم تانيدى, باعالايدى. ىسساپارمەن شەت ەلدەردە بولعانىمدا سۋرەتشىنىڭ كارتينالارىنىڭ الەمدەگى ەڭ مىقتى گالەرەيالاردا تۇرعانىن كوردىم. بۇل ءبىز ءۇشىن ماقتانىش», دەدى مينيستر. ال, سىرتقى ىستەر ءمينيسترى قايرات ءابدراحمانوۆ, اكادەميك مىرزاتاي جولداسبەكوۆ, سەنات دەپۋتاتى بىرعانىم ءايتىموۆالار سۋرەتشىنىڭ ونەرى تۋرالى ءوز ويلارىمەن ءبولىستى.
ە.تولەپبايدىڭ تۋىندىلارى قازاقستان, تمد ەلدەرى, ەۋروپا, امەريكا جانە ازيا ەلدەرىنىڭ مۋزەيلەرىندە, گالەرەيالارىندا ساقتاۋلى. الەمنىڭ قىرىقتان اسا ەلىندە جەكە كورمەسىن وتكىزگەن سۋرەتشىنىڭ ەلورداداعى «بەس كۇن» اتتى كورمەسى دە وزىندىك ەرەكشەلىگىمەن دارالاندى. كورمە نە ءۇشىن «بەس كۇن» اتالدى؟ نەگە ونى اناسىنا ارنادى؟ قولتاڭباسىنىڭ وزگەشەلىگىمەن, بوياۋىنىڭ ايقىندىعىمەن ەرەكشەلەنەتىن سۋرەتشىنىڭ دۇنيەگە, تىرشىلىككە, ادامي قارىم-قاتىناستارعا دەگەن كوزقاراسىنا اناسىنىڭ ىقپالى زور بولعان سياقتى. سۋرەتشى بىلاي دەيدى: «انام مارقۇم ءومىر بويى ەمشىلىكپەن اينالىستى. ۇلدار ەدى ەسىمى. ول كەزدە ءبىز بالامىز. كۇندە تاڭەرتەڭ ۇيقىدان تۇرىپ, تاڭەرتەڭگى ءشايدى ىشەيىك دەسەك, ۇيدە كەمىندە 10-15 بەيتانىس كىسى وتىرادى. ءبىز وتباسى بولىپ وڭاشا ءشاي ءىشىپ كورمەپپىز. انام ايتاتىن ادامدار اراسىنداعى قارىم-قاتىناس, جارىق دۇنيە مەن و دۇنيە تۋرالى اڭگىمەلەر قۇلاعىمدا قالىپ قويىپتى. ءوز ىشكى دۇنيەم مەن وزگەلەردىڭ, جالپى ءتۇرلى-ءتۇرلى ادامداردىڭ ىشكى دۇنيەسىن سالىستىرۋ قاسيەتى بالا كۇنىمنەن قالىپتاستى. كورمەدەگى جۇمىستارىم وسى تاقىرىپتىڭ اينالاسىندا».
كورمەنى تاماشالاۋ بارىسىندا ونەر يەسىنىڭ ايەلدىڭ ومىردەگى ميسسياسىن ەرەكشە سەزىمتالدىقپەن, پالساپاشىلدىقپەن بوياۋ تىلىنە كوشىرگەنىنە ءتانتى بولدىق. ول بەينەلەگەن كەيىپكەرلەردىڭ بارلىعى دا ءتۇرلى-ءتۇرلى كوڭىل-كۇيمەن وزىنە باۋرايدى. ءبىر سۋرەتتەگى انا, ەكىنشى ءبىر سۋرەتتەگى كەلىن, ءۇشىنشى ءبىر «اسپانعا ۇشۋ» اتتى سۋرەتتەگى جاس بويجەتكەن, «رەنىش», ء«ۇمىت», «اجىراسۋ» نە «العاشقى ماحاببات», «جاس جۇبايلار» اتتى كارتينالارداعى كەيىپكەرلەردىڭ بارلىعى دا سەزىمتال, سەرگەك, ومىرگە قۇشتار بەينەلەر. بەس كۇن جالعانداعى شىنايىلىق پەن ىزگىلىكتىڭ ناق وزىندەي اسەر قالدىرادى.
سۋرەتشىنىڭ ايتۋىنشا, بۇل ومىردە تراگەديا جوق. تابيعات الەمى دە, جان-جانۋارلار, اڭ-قۇستار الەمى دە سونداي ۇيلەسىمدى, كەرەمەت. ال ادامدار استامشىلىق جاسايدى, كۇناعا باتادى. «ادامدارداعى ىزگىلىكتى وياتۋ ءۇشىن تەك ءدىن ادامدارى عانا ەمەس, ونەر ادامدارى دا ەڭبەك ەتسە, ءبىز كەلەشەگىمىزدى جاقسارتامىز عوي دەپ ويلايمىن. قازاقتىڭ ونەرى وزگە ەلدەردىڭ ەشقايسىسىنىڭ دا ونەرىنەن كەم ەمەس», دەيدى سۋرەتشى. جالپى, كورمەگە جيىلعان جۇرتشىلىق ەربولات تولەپبايدىڭ شىنايى وي-تولعامدارىنا دا, تۋىندىلارىنا دا ريزاشىلىق تانىتقانىنا كۋا بولدىق.
كورمەدەن العان اسەرىمەن ءماجىلىس دەپۋتاتى ساۋىتبەك ابدراحمانوۆ بىلايشا ءبولىستى:
– كورمەنىڭ اتىنىڭ ءوزى كوپ-كوپ ويعا قالدىرادى. ابايدىڭ «ۋايىم – ەر قورعانى, ەسى بارلىق. قيىنى بۇل دۇنيەنىڭ – قولى تارلىق. «ەھە-ەھەگە» ەلىرمە بوزبالالار, بۇل بەس كۇندىك ءبىر مايدان ەر سىنارلىق» دەگەن ءسوزى بار. ەربولاتتىڭ اناسى دا ۇلىنا: «بۇل بەس كۇندىك دۇنيە, وتەدى دە شىعادى», دەپ ايتىپ وتىرادى ەكەن. سۋرەتشى كورمەسى وسى بەس كۇندىك (اپتاعا دا تولمايتىن!) دۇنيەنىڭ سان سىرىن سان قىرىنان ايقارا اشىپ بەرۋىمەن جۇرەك تولقىتادى.
ايگۇل سەيىلوۆا,
«ەگەمەن قازاقستان»
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
