قازىرگى تاڭدا وڭىرىمىزدە جەر استى سۋ قورىن بەكىتۋدى قاجەت ەتەتىن 383 اۋىلدىڭ 244 ەلدى مەكەنىندە اتالعان جۇمىستار اتقارىلعان. وبلىستىڭ 2016-2020 جىلدارعا ارنالعان دامۋ باعدارلاماسىنا سايكەس, 2020 جىلعا دەيىن جەر استى سۋ قورى بەكىتىلگەن ەلدى مەكەندەر سانىن 383-كە جەتكىزۋ جوسپارلانۋدا. بۇل تۋرالى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ ورىنباسارى ءا.ابدىقادىروۆ حابارلادى.
سونىمەن قاتار, «وڭىرلەردى دامىتۋدىڭ 2020 جىلعا دەيىنگى» مەملەكەتتىك باعدارلاماسى اياسىندا, 2017 جىلى اۋىز سۋمەن قامتاماسىز ەتۋ سالاسىندا 26 نىساننىڭ قۇرىلىسىنا 3,1 ملرد. تەڭگە بولىنگەن. بۇل قارجىعا, نەگىزىنەن, سۋ قۇبىرى مۇلدەم جوق 10 ەلدى مەكەنگە (ياعني, 12 335 مىڭ حالىق) جاڭا اۋىز سۋ قۇبىرلارىنىڭ قۇرىلىسى جۇرگىزىلىپ, پايدالانۋعا بەرۋ جوسپارلانسا, 3 ەلدى مەكەندەگى (6,2 مىڭ حالىق) توزىعى جەتكەن اۋىز سۋ جۇيەلەرى جاڭارتىلادى.
ناتيجەسىندە, وبلىستىڭ اۋىز سۋمەن قامتاماسىز ەتۋ دەڭگەيى قالالاردا – 94,2 % (1204,3 مىڭ ادام), اۋىلدىق ەلدى مەكەندەردە - 74,2 % (620 ە.م.) جەتكىزۋ جوسپارلانۋدا.
بۇدان بولەك, وبلىستىڭ قازىعۇرت, سارىاعاش جانە ماقتاارال اۋداندارىنىڭ 800 مىڭنان اسا حالقىن ساپالى اۋىز سۋمەن قامتۋ وزەكتى ماسەلە بولىپ وتىر. بۇل ماسەلەنى شەشۋ ماقساتىندا وگەم وزەنىنەن كولەمى سەكۋندىنا 3-3,5 م3-قا دەيىن سۋدى بۇرىپ, اۋىز سۋ رەتىندە پايدالانۋ قاراستىرىلۋدا.
