ورال قالاسىنىڭ ىرگەسىندەگى جەلتاۋ بيىگىنەن باستالعان ەستافەتاعا بايكەرلەر, بايداركاشىلار جانە ۆەلوسيپەدشىلەر قاتىستى. اۋەلى موتوتسيكل مىنگەن شاباندوزدار ورال-اتىراۋ تراسساسى بويىنداعى «ورال» جازۋىنىڭ تۇسىنان كوك تۋدى جەلبىرەتە ءجۇرىپ, ەستافەتانى «دينامو» سپورت بازاسىنىڭ تۇسىندا ەسكەكشىلەرگە تاپسىردى. بايداركاشىلار شاعان وزەنىندە اعىسقا قارسى ءجۇزىپ, ورتالىق دەمالىس پاركىنە جەتتى. وسى جەردە قازاقستان رەسپۋبليكاسىنا ەڭبەك سىڭىرگەن سپورت شەبەرى, سامبو كۇرەسىنەن ءتورت دۇركىن الەم چەمپيونى ەربولات بايباتىروۆ باستاعان سپورتشىلار تۋدى كۇتىپ الىپ, پ.اتويان اتىنداعى ستاديون الدىنداعى الاڭعا جيىلعان ۆەلوشاباندوزدارعا جاياۋ جۇگىرىپ الىپ جەتتى.
بۇدان كەيىن كوك بايراق ۆەلوكورتەجدىڭ القالاۋىمەن بۇكىل قالانى كەسىپ ءوتىپ, ورال قالاسىنىڭ جاڭا الاڭىنا جەتكىزىلدى. بۇل جەردە «باتىس قامقور», «جاسىل ەل», «ورال ستۋدەنتتەرىنىڭ اليانسى» جاستار ۇيىمدارىنىڭ وكىلدەرى ادەمى فلەشموب جاساپ, كۇتىپ تۇرعان ەدى.
كوك تۋدىڭ جەلبىرەگەنى – تالاي جانعا قۋات بەرگەنى انىق!
قازبەك قۇتتىمۇرات ۇلى,
«ەگەمەن قازاقستان»
ورال
سۋرەتتى تۇسىرگەن
ايباتىر نۇراش
