زامانعا قاراي جوعارى ءبىلىم بەرۋ ءۇردىسىن جەتىلدىرۋ ماقساتىندا قۇرىلىپ, جوعارى دارەجەدە جۇمىس جاساپ كەلە جاتقان نازارباەۆ ۋنيۆەرسيتەتىندە تۇڭعىش دوكتورانتۋرا تۇلەكتەرىنە ديپلوم تاپسىرۋ كەزىندە پرەزيدەنت نۇرسۇلتان نازارباەۆ: «اشىلعانىنا نەبارى جەتى-اق جىل بولعان وقۋ ورداسى ءوزىمىزدىڭ ەلدە دە, باسقا ەلدە دە اسا بەدەلدى وقۋ ورنىنا اينالدى», دەگەن ەدى. سونىڭ دالەلىندەي, اتالمىش ءبىلىم ورداسىندا قازاقستاندىق ءبىلىم بەرۋ سالاسىندا ماڭىزدى وقيعا بولىپ تابىلاتىن جوعارى ءبىلىم بەرۋ كوشباسشىلارىنىڭ ءVى ەۋرازيالىق فورۋمى (EHELF) ءوتتى. 2017 جىلعى فورۋمنىڭ تاقىرىبى «جوعارى ءبىلىم بەرۋدەگى باسقارۋ, كوشباسشىلىق جانە مەنەدجمەنت» دەپ اتالدى.
فورۋمعا قاتىسۋشىلارعا ارنالعان بەينەجولداۋدا مەملەكەتتىك حاتشى گۇلشارا ابدىقالىقوۆا EHELF جۇمىسىنا تابىس تىلەدى.
بۇل القالى جيىن ءىس-شارالارىنىڭ باعدارلاماسىندا حالىقارالىق جانە وتاندىق ساراپشىلارى, جوعارى وقۋ ورىندارى جانە بيزنەس قاۋىمداستىق وكىلدەرى پىكىر الماستى. پلەنارلىق ماجىلىستە نازارباەۆ ۋنيۆەرسيتەتىنىڭ تاجىريبەسىن ترانسلياتسيالاۋ ماسەلەسى ايتىلىپ, سەمينارلاردا تالقىلاندى. باسقوسۋعا قازاق ەلىنىڭ, ۇلىبريتانيا, قىتاي, اقش, اۆستراليا, تاجىكستان, قىرعىزستان جانە رەسەي سياقتى الىس جانە جاقىن شەت ەلدەردەن كەلگەن 300-دەن استام زيالى قاۋىم قاتىسقانىن ايتا كەتسەك دەيمىز.
ءىس-شارا بارىسىندا قاتىسۋشىلار ءارتۇرلى ەلدەردە جوعارى ءبىلىم بەرۋدەگى كوشباسشىلىققا قول جەتكىزۋ جانە تابىستى مەنەدجمەنتتى قامتاماسىز ەتۋ ماسەلەلەرى بويىنشا ءوز پىكىرلەرىمەن, تاجىريبەلەرىمەن ءبولىستى. جوو-لارداعى اكادەميالىق ساپا, باسقارۋدى جەتىلدىرۋ, قازىرگى زامانعا ساي كادرلاردى دايارلاۋ جانە جوعارى ءبىلىمدى دامىتۋدىڭ باسقا دا وزەكتى ماسەلەلەرى تالقىلاندى.
پلەنارلىق ءماجىلىستىڭ سپيكەرلىگىن BoardFocus Advisory اتقارۋشى ديرەكتورى دجۋديت ماككورميك (اۆستراليا); Magna Charta Observatory باس حاتشىسى دەۆيد لوكك ( ۇلىبريتانيا); كەمبريدج ۋنيۆەرسيتەتى ءبىلىم بەرۋ فاكۋلتەتىنىڭ ءبىلىم بەرۋ يننوۆاتسيالارى ورتالىعىنىڭ ديرەكتورى كولين ماكلافلين ( ۇلىبريتانيا); گونكونگ ءبىلىم بەرۋ ۋنيۆەرسيتەتىنىڭ ۆيتسە-پرەزيدەنتى لۋي تاي-لوك اتقاردى.
ءبىلىم مەن عىلىمنىڭ جاڭا جەتىستىكتەرىن جيناقتاعان نازارباەۆ ۋنيۆەرسيتەتىنىڭ تاجىريبەسىن ترانسلياتسيالاۋ بويىنشا سەمينارلاردا كوپتەگەن ويلار ايتىلىپ, تياناقتالدى. سول سەكىلدى, اكادەميالىق ستاندارتتاردى قولداۋداعى سوڭعى ۇردىستەر تالقىلاندى. نازارباەۆ ۋنيۆەرسيتەتىنىڭ اكادەميالىق ساپانى قامتاماسىز ەتۋ جانە ارتتىرۋ سالاسىنداعى تاجىريبەسى جينالعان جۇرتشىلىق نازارىنا ۇسىنىلدى.
ءبىلىمنىڭ تۇتاستىعى پروبلەمالارىن تالقىلاۋ بارىسىندا ۋنيۆەرسيتەت وكىلدەرى تۇلەكتەردىڭ تابىسقا جەتۋى ءۇشىن قاجەتتى داعدىلار مەن قۇندىلىقتاردى ورنىقتىرۋ ماقساتىندا ستۋدەنتتەرمەن وقۋدان تىس جۇمىستاردى جانداندىرۋ جانە جاڭا ءبىلىم داعدىلارىن ەنگىزۋ باعىتىنداعى تاجىريبەلەرىمەن دە ءبولىستى. سەمينارلار ۇستىندە پرەزيدەنت ن.نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنداعى ناقتى تاپسىرمالارى اڭگىمە ارقاۋىنا اينالىپ, قايتا جاڭعىرۋ مەملەكەتتىڭ مەرەيىن اسىراتىنىنا باسا نازار اۋدارىلدى. بۇعان قوسا, «جاھاندىق الەمدەگى زاماناۋي قازاقستاندىق مادەنيەت» باعدارلاماسىنىڭ جوباسىنا ارنايى توقتالدى.
بۇل جولعى جوعارى ءبىلىم بەرۋ كوشباسشىلارىنىڭ جىل سايىنعى ەۋرازيالىق فورۋمى «كىتاپحانالىق ءوزارا ارەكەتتەسۋ-2017: ۋنيۆەرسيتەت كىتاپحاناسىن دامىتۋداعى زاماناۋي الەمدىك ۇردىستەر («Library Connect-2017»)» جانە «ۋنيۆەرسيتەت كىتاپحانالارىن دامىتۋداعى زاماناۋي ترەندتەر: تاجىريبە, پروبلەمالار جانە پەرسپەكتيۆالار-2017» اتتى عىلىمي-پراكتيكالىق كونفەرەنتسيالارعا ۇلاستى. سونىمەن, جوعارى ءبىلىم بەرۋ ءىسىن باسقارۋ, كوشباسشىلىق جانە مەنەدجمەنتى تالقىلانعان القالى فورۋم جۇمىسىنداعى قوزعالعان ماسەلەلەر الداعى قولدانىستا ناتيجەلى جۇمىس ىستەۋى ءتيىس.
سۇلەيمەن مامەت,
«ەگەمەن قازاقستان»
