«بىلتىر كۇزدە وبلىس اكىمى دانيال احمەتوۆ اۋدانعا ارنايى كەلىپ, الاكولگە بايلانىستى جيىن وتكىزگەن بولاتىن. سول جيىندا كولگە اباتتاندىرۋ جۇمىستارىن دۇرىس جۇرگىزبەيتىن, سانيتارلىق تالاپتاردى دۇرىس ساقتامايتىن كاسىپكەرلەردىڭ دەمالىس بازاسىن ىسكە قوسۋعا 2017 جىلى رۇقسات بەرىلمەيتىنىن ايتقان-دى. قازىرگى ۋاقىتتا مۇنداعى 147 دەمالىس بازاسىنىڭ 43-ءى تۋريستەردى قابىلداۋعا دايىن. قالعاندارى 1 شىلدەگە دەيىن اياقتايمىز دەپ ۋادە بەرىپ وتىر. ەگەر وسى مەرزىمگە دەيىن اياقتامايتىن بولسا, ولاردىڭ دەمالىس ورىندارى اشىلمايتىن بولادى», دەدى ءۇرجار اۋدانى اكىمى سەرىك زاينۋلدين.
الاكولدى اباتتاندىرۋ ءۇشىن وبلىستىق بيۋدجەتتەن 500 ميلليون تەڭگە بولىنگەنى بەلگىلى. اۋدان باسشىسىنىڭ ايتۋىنشا, بۇل قارجىنىڭ 150 ميلليونىنا ۇلكەن ساياباق سالىنىپ جاتىر. قۇرىلىسى 20 ماۋسىمعا دەيىن اياقتالادى. سونىمەن قاتار, الاكولدە زاماناۋي تالاپتارعا سايكەس كەلەتىن دۇڭگىرشەكتەر مەن ۇلكەن جاعاجايدىڭ قۇرىلىسى قىزۋ جۇرگىزىلىپ جاتىر. جاعالاۋعا سەكسەن ءۇش بەينەكامەرا ورناتىلادى, ءتورت پوليتسيا, ەكى مەديتسينالىق بەكەت بوي كوتەرەدى. وتىزعا جۋىق پوليتسەي تاۋلىك بويى قىزمەت كورسەتەدى. جەتى شاقىرىمنان استام جول اسفالتتالىپ, ەكى شاقىرىمنان استام جاياۋ جۇرگىنشىلەر جولى سالىنادى. تاعى ءبىر جاعىمدى جاڭالىق, مۇندا اۆتوبەكەت پەن اۆتوتۇراق ىسكە قوسىلادى. سەرىك زاينۋلدين اۋدان تۇرعىندارى الاكولدىڭ جاعاسىنا 760 مەتر اۋماققا ءوز ەرىكتەرىمەن گۇل جانە اعاش كوشەتتەرىن وتىرعىزعانىن ايتىپ, بۇل جەردەگى جۇمىستاردىڭ 1 شىلدەگە دەيىن تولىق اياقتالاتىنىن جەتكىزدى. ال سۋعا ءتۇسۋ ماۋسىمى 20 ماۋسىمعا قاراي باستالادى.
ازامات قاسىم,
«ەگەمەن قازاقستان»
شىعىس قازاقستان وبلىسى
