قازاقستاندا العاش رەت وتكىزىلگەلى وتىرعان «پينگ-پونگ حانشايىمى» ءتۋرنيرىنىڭ العاشقى ىرىكتەۋ ويىندارى 3-28 شىلدە ارالىعىندا قازاقستاننىڭ بارلىق ايماقتارىندا وتسە, فينال ويىندارى 22-24 تامىز ارالىعىندا الماتى قالاسىندا وتپەك. تۋرنير قورتىندىسى بويىنشا جەڭىمپاز اتانعاندار پەكين قالاسىنداعى سپورت اكادەمياسىنىڭ جاتتىقتىرۋشىلارىنان ۇستەل تەننيسىنەن ارنايى شەبەرلىك سىنىبىنان ءوتۋ مۇمكىندىگىنە يە بولادى.
جوبا ۇيلەستىرۋشىسى مايرا ءالجانوۆا ءوز سوزىندە: «قورىمىزدىڭ 13 جىلدىق تاريحىندا «پينگ-پونگ حانشايىمى» ءتۋرنيرىنىڭ قادام باسۋى بارشامىزعا كوپتەن كۇتكەن باستاما بولدى. بالالار ۇيلەرىنىڭ جاس قىزدارى ءۇشىن سپورتتا, ونىڭ ىشىندە, ۇستەل تەننيسىندە ءوز باقتارىن سىناپ كورۋ ارمان عانا ەمەس, مۇمكىندىگى مول ۇلكەن جوبا دا. جارىس جەڭىمپازدارىنا قىتاي ەلىنە ساياحاتتاپ قايتۋعا مۇمكىندىك بەرەتىن بۇل جوبانىڭ بىردەن ءبىر ماقساتى – بالالاردىڭ سپورتقا دەگەن قىزىعۋشىلىعىن ىندالاندىرۋ», دەپ اتاپ ءوتتى.
وسى ورايدا, قحر باس كونسۋلدىعى ساياسي ءبولىمىنىڭ باسقارۋشىسى چجان سياوتسين: «بۇل تۋرنير ءار بالانىڭ جەكە تۇلعا رەتىندە قالىپتاسۋىنا ىقپال ەتەرى ءسوزسىز. سەبەبى, بالالاردىڭ جەڭىسكە دەگەن زور تالپىنىسى, سەنىمى بار», دەدى
ء«بىز وسىنداي كەرەمەت ءتۋرنيردى ۇيىمداستىرىپ وتىرعان «باۋىرجان» قورىن وسىنداي جوباعا ات سالىسۋعا مۇمكىندىك بەرگەندەرىنە العىس بىلدىرەمىز. سپورت – كەلەشەگى كەمەل ءىس», – دەي كەلە, «حۋاۆەي تەكنولودجيز قازاقستان» جشس-ءنىڭ قوعاممەن بايلانىس ءبولىمىنىڭ باسشىسى اندرەي جەلتيكوۆ وسىنداي ماقساتى مەن بولاشاعى جارقىن جوبالاردى قولداۋعا ءازىر ەكەندىكتەرىن ءبىلدىردى.
سونىمەن قاتار, تۋرنير ۇيىمداستىرۋشىلارى قازاقستاندىق جاستاردىڭ سپورتقا دەگەن قىزىعۋشىلىقتارىن وياتۋ ماقساتىندا وسى جوبا اياسىندا ەلىمىزدىڭ تۇكپىر-تۇكپىرىندەگى 100 جەتىمدەر ۇيىنە 100 تەننيس ۇستەلى مەن جابدىقتارىن سىيعا تارتپاق. ءبىر اي ىشىندە بارلىق بالالار ۇيلەرىنە ورناتىلىپ شىعاتىن تەننيس ۇستەلدەرى ارقىلى بالالار ءۇيىنىڭ تاربيەلەنۋشىلەرى وليمپيادالىق سپورت تۇرىنە ەنەتىن ۇستەل تەننيسىن جەتە مەڭگەرۋگە مۇمكىندىك الماق.
قر ۇستەل تەننيسى فەدەراتسياسىنىڭ اتقارۋشى باسشىسى مالىك بەيساليەۆ ءتۋرنيردىڭ بارلىق كەزەڭدەرىنىڭ جوعارعى دەڭگەيدە وتۋىنە اتسالىساتىندارىن, فينال ويىندارىنا ارنايى زال دايىندالىپ, كاسىبي تورەشىلەردىڭ شاقىرتىلعانىن جەتكىزدى.
7-10 جاس پەن 11-15جاس ارالىعى بويىنشا ەكى كەزەڭمەن وتەتىن ءتۋرنيردىڭ الماتى قالالىق «نۇر وتان» پارتياسى توراعاسىنىڭ ورىنباسارى قايىم-مۇنار تابەەۆ ىرىكتەۋ ويىندارىنىڭ باستى نازاردا بولاتىنىن ايتا كەلە: «نۇر وتان» پارتياسى بارلىق يگى باستامالاردى قولداۋعا تىرىسادى. ءوز تاراپىمىزدان اقپاراتتىق جانە اكىمشىلىك قولداۋ كورسەتىپ بارلىق ايماقتاردا جاڭا تۇساۋى كەسىلگەن جوبانىڭ ءساتتى وتۋىنە ءوز ىقپالىمىزدى تيگىزەمىز», دەدى.
جەتىم بالالار اراسىنداعى ۇستەل تەننيسى دارىندارىن تاۋىپ, قازاقستاندىق تەننيس دەڭگەيىنىڭ ارتۋىنا ءبىرشاما ۇلەس قوسۋدى ماقسات تۇتقان اتالمىش ءتۋرنيردىڭ سالتاناتتى اشىلۋ ءراسىمى الماتى وبلىسىنىڭ №1 بالالار ۇيىنە العاشقى تەننيس ۇستەلىن تابىستاۋ راسىمىمەن جالعاستى. شارا بارىسىندا العاشقى ويىن وتكىزىلىپ, بولاشاق پينگ-پونگ حانشايىمدارى سىنالدى.
ميرا بايبەك,
«ەگەمەن قازاقستان»
