اشۋى جوق كىسى

ادامدار كەيدە بولمايتىن نارسەگە قيقىلداسىپ, كەشەگى سىيلاس اعايىندار ءبىر-ءبىرىنىڭ جاعاسىنان الۋعا دەيىن بارىپ جاتادى. كەيىن اقىل توقتاتىپ, اشۋىن سابىر جەڭگەننەن كەيىن: ء“وي, بولماشىعا بولا اعايىننان ايىرىلىپ قالا جازداپپىن عوي”, دەپ وكىنەتىنى بار. تاعى دا قايتالارىن سەزبەيدى. ونىسىن اقتاپ الاتىن ماتەلى دە داپ-دايىن. ء“بىر اتىم ناسىبايعا بولا دا كوڭىل قالادى”, دەپ قويادى. ادامداردىڭ ءبارى وسىنداي شىعار دەپ ويلايسىڭ عوي. ءوزىڭ دە سونىڭ ىشىندەسىڭ. بايا-شايا بو­لىپ جاتقانىڭ. جوق, ولاي ەمەس ەكەن. سابىرىنان ەش توگىلمەيتىن ادامدار دا بار بولىپ شىقتى. عالىمجان دەگەن جۋرناليست دو­سىم بار. توننىڭ ىشكى باۋىنداي ارالاسىپ جۇرگەننەن كەيىن اكە-شەشەسىنىڭ الدىن تالاي كوردىك. اكەسى ورەكەڭ, وردابەك زيا­بەك­ ۇلىمەن تالاي مارتە داستار­قان­داس بولدىق. جىميىپ قانا وتى­راتىن كىسى. قاشان بارساڭ دا وسى قالپىنان تانبايدى. بالالا­رى­نا, قۇداي قوسقان قوساعى راحيا شەشەمىزگە وتىرىك بولسا دا ءبىر كەيىگەنىن كورمەپپىز. كەيىنىرەك, جۋرناليستىك اۋەستىك جەڭە باس­تادى. وسى كىسىدە اشۋ دەگەننەن مىسقالداي بولسا دا بار ما ەكەن دەپ. بايقاي المادىق. سۇراس­تىر­دىق. بىلەتىندەردەن. “ولار: «بۇل كىسى ەجەلدەن وسىلاي عوي, اشۋ­لانۋدى بىلمەيدى”, دەيدى. ونداي بولسا جاسىق بىرەۋ شىعار-اۋ دەپ وي ءتۇيۋىڭىز مۇمكىن. ونداي دا ەمەس. جاقسى-اق قىزمەتتەردىڭ قۇ­لاعىن ۇستاعان. ءتىس دارىگەرىنەن ۇلكەن كەڭشاردىڭ باس زووتەحنيگى بولىپ وسكەن. ەكەۋىنىڭ دە وقۋىن تامامداعان عوي. ماقتاارالدا, مانكەنتتە, ءسۇت­كەنتتە جۇمىس جاساعان. زەينەتكەرلىككە شىققان سوڭ تەمىر­لانعا كوشىپ كەلگەن. اۋدان ورتا­لىعىنىڭ جوعارى جاعىنان جاي العان. ىرگەسىن سۇلۋ ارىس وزەنى كوكتەي وتەتىن ورداباسى اۋدانى سۋعا باي جەر. ورەكەڭنىڭ جەرىنىڭ تومەنگى ەتەگىنەن ورىس ارىق, قىر بەتكەيىنەن نايمان ارىق وتەدى. سۋ – تىرشىلىك. ورەكەڭ اقسا­قال با­لا­لارىمەن, نەمەرەلەرىمەن بىرلەسىپ باۋ ەگىپ تاستاعان. كوكتەم, جاز بارساڭىز بۇرقى­را­عان الما ءيىسى يران باعىنداي ەسى­ڭ­ىزدى الا­دى. سالەم سالعانداي ءيىلىپ تۇر­عان كەلىنشەكتالدىڭ سايا­سى التى قانات اق ورداداي. ورە­كەڭ, مىنە, وسى جەرگە تاپشان ورناتىپ, ور­دا­لى قاۋىمىمەن تى­نىستاپ وتى­رادى. جىلقى ۇس­تايدى. قىمىز ىشەدى. ءىرى قارا, ۇساق مال با­ر­شى­لىق. تۇيەتاۋىق, ۇيرەك دەگەن­دە­رىڭىز بۇل ۇيگە تاڭسىق ەمەس. عالىمجان دوس ايتادى. «اكەي بىلدەي ءبىر كەڭشاردىڭ باس زووتەحنيگى بولا ءجۇرىپ, كەيبىرەۋلەردەي مەملەكەتتىڭ مەنشىگىنە قول سالعان ەمەس. “بالالارىما ارام اس جەگىزبەيمىن” دەيتىن. ونىسى دۇرىس تا شىعار, بىراق باس زوو­تەحنيگىنىڭ كەلىنشەگى كەرزى ەتىگى ساتالا-ساتالا بولىپ شارۋا­شى­لىقتىڭ بۇزاۋشىسى بولعانىن كىم كورگەن. ءبىزدى وقىتقان – تاۋ­ىق. انام مىڭعا دەيىن تاۋىق, تۇيەتاۋىق وسىرگەن. وتباسىندا 8 بالا بولدىق. ءبارىمىزدى سونىڭ جۇمىرتقاسىمەن وقىتتى». ءسويتىپ: “بالالارىما ارامنان اس جەگىزبەيمىن” دەيتىن ورە­كەڭ كوشتەن قالماپتى. تۇقى­مى­نىڭ ءوزى ءبىر اۋىل. نەمەرەلەرى شۇرقىراپ اتا-اجە دەپ جاتادى. شوبەرە دە كوردى. نەمەرەسىنىڭ الدى اسقار بەيجىڭدە دارىگەر ماماندىعىنا وقىپ جاتىر. بىرگە بارعان قۇرداستارىنان جەكە-دا­را تۇسكەن. وقىتۋشىلارى مىق­­تى مامان بولادى دەپ ماقتايدى ەكەن. ورەكەڭمەن ۋاقىتتى كەڭ سالىپ اڭگىمەلەسكەنىم بار ەدى. – ماڭگىلىك ەشكىم جوق, – دەگەن. – قىسقا عانا عۇمىردا كىسى­نىڭ كوڭىلىن قالدىرىپ, عايبات سويلەگەندى جاقتىرا بەرمەيمىن. اللا تاعاللا ادامعا ءومىر بەردى. قىزىعىن كورسىن دەپ ۇر­پاعىن كوبەيتتى. شۋاعىنا بولە­­­­نىپ ءجۇر­گەنگە نە جەتسىن. ادامعا باسقا نە كەرەك. ...وتىرىك ايتپايتىن, بىرەۋدىڭ حاقىسىن جەمەيتىن, ەلگە وي­لاي­تىنى جاقسىلىق, بۇل ومىرگە ادام بولىپ كەلىپ, ادامدىعىنا سىزات تۇسىرمەي وتكەن ورەكەڭنىڭ دە بۇل دۇنيەدەن وتكەنىنە ءبىر جىل بولدى. تەمىرلانعا بارعان سايىن وسى اشۋى جوق, الدى كەڭ, جايساڭ اعانى كوڭىل ىزدەيدى. باقتيار تايجان, وڭتۇستىك قازاقستان وبلىسى.