بۇركىتشى قىز جايلى فيلم «وسكار» سىيلىعىنا ۇمىتكەرلەر تىزىمىنە ەندى

موڭعوليادا قۇسبەگىلىكپەن اينالىساتىن 13 جاستاعى قازاق قىزى ايشولپان نۇرعايىپ جايلى دەرەكتى فيلم «وسكار» كينوسىيلىعىنا ۇمىتكەرلەر تىزىمىنە ەندى, – دەپ حابارلادى Tengrinews.kz. ايشولپان بىرنەشە جىل بۇرىن بۇركىتشىلەر اراسىندا ۇيىمداستىرىلعان ۇلكەن جارىسقا قاتىسقاننان كەيىن تانىمال بولا باستادى. وسىدان كەيىن شەتەلدىڭ ءتۇرلى اقپارات قۇرالدارى, سونىڭ ىشىندە BBC, CNN تەلەارنالارى قازاق قىزىنا قىزىعۋشىلىق تانىتقان ەدى. قازاق قىزى ءفيلمنىڭ رەجيسسەرىمەن قالاي تانىسقانىن ايتىپ بەردى. ونىڭ ايتۋىنشا, بۇركىتشى قىزدىڭ سۋرەتىن رەجيسسەر وتتو بەللگە فوتوگراف اشەر سۆيدەنسكي كورسەتكەن. «قازىر جاسىم 15-كە كەلدى, ال قىرانىم «اق قاناتتارىنىڭ» جاسى – 3-تە. ەندى سىڭلىمە دە اڭشىلىقتىڭ قىر-سىرىن ۇيرەتۋدى جوسپارلاپ وتىرمىن. ءوزىندى ۇلكەن ەكراننان كورگەن وتە قىزىق ەكەن. وسىدان كەيىن بارىپ ەر ادامداردىڭ ماعان دەگەن كوزقاراسى وزگەرە باستادى. بۇگىنگە دەيىن «بۇركىتشىلىكپەن اينالىسۋ – ايەل زاتىنىڭ ءىسى ەمەس» دەپ ايتىپ كەلەتىن», – دەدى ايشولپان. ايتا كەتەيىك, «وسكار» كينوسىيلىعىنىڭ 5 نومينانتى 2017 جىلدىڭ 24 قاراشاسىنا دەيىن بەلگىلى بولادى.