ءومىر بويى ىزدەنەتىن ماماندىق

وسى تۇرعىدان العاندا ءاربىر مۇعالىم ءوزىنىڭ مىندەتىنە ۇلكەن جاۋاپكەرشىلىكپەن قاراپ, ار-ۇياتىمەن ەڭبەك ەتسە ءبىلىم سالاسىندا ولقى تۇستار بولماس تا ەدى. وقۋشىنى تۇلعا دەيتىن بولساق, ءار تۇلعادا دارالىق قاسيەت, بەيىم, قابىلەت, قىزىعۋشىلىق بولادى. ارينە ونى اشاتىن, باعىت-باعدار بەرەتىن مۇعالىم. وقۋشىعا تاربيە مەن ءبىلىم بەرەتىن مۇعالىم, ەڭ الدىمەن ءوزى ادەپ قاعيدالارىن جەتىك بىلەتىن جان بولۋى شارت. 45 مينۋت ساباعىن شەبەر وتكىزگەنىمەن, ادامگەرشىلىك-رۋحاني تۇرعىدان جۇتاڭ جان ەشقاشاندا سىيلى بولماق ەمەس. سوڭعى كەزدە اۋىلداعى مۇعا­لىمدەر قاتارى ەگدەلەنىپ بارا جاتقانى جاسىرىن ەمەس. قالا مەكتەپتەرىنە قاراعاندا, اۋىلداعى 50-دەن اسقان مۇعالىمدەردىڭ ءبىرى رەتىندە بىزدەردىڭ تىڭ يدەيا مەن باستامالارعا كەلگەندە ءمۇم­كىندىكتەرىمىز شەكتەۋلى. مۇعالىم ماماندىعى قادىرىنىڭ تومەندەۋىنە بىرقاتار جوو-دا تىكەلەي كىنالى دەۋگە بولادى. جەكەمەنشىك وقۋ ورىندارىنىڭ ديپلومدى ما­ماندارىنىڭ بىلىكتىلىك دەڭگەيى وتە تومەن ەكەندىگىن ءومىردىڭ ءوزى كور­سەتىپ وتىر. كەزدەيسوق مۇعالىم­دەردىڭ بىرنەشەۋىنىڭ كەز كەلگەن مەكتەپتە ءجۇرۋى وسىعان دالەل بولا الادى. بيىل جاڭارتىلعان مازمۇنداعى ءبىلىم بەرۋ بويىنشا «ساۋات اشۋ» ءپانى ەنگىزىلدى. بۇرىن 100 جىلدان استام تاريحى بار «الىپپەمەن» ءبىز دە, ءبىزدىڭ اتا-انالارىمىز دا, كەيىنگى ۇرپاق تا ءبىلىم الدى. سوڭعى جىلدارى «الىپپە» وڭدەلدى. «الىپپە» بىرنەشە جىل سۇزگىدەن وتكەن, جيناقى وقۋلىق بولاتىن. ال «ساۋات اشۋ» وقۋلىعىندا «ءوزىن ءوزى تانۋ», «دۇنيە تانۋ» پاندەرىندەگى بولۋى ءتيىس اڭگىمەلەر, ولەڭدەر كەزدەسەدى. «تس» ارپىنە مىسالعا رەتسەپت كەرەك بولار, ءمازىر دە جاقسى اۋدارما ەكەندىگى ءسوزسىز. جالپى العاندا 1-سىنىپ مۇعالىمىنە دە, وسى سىنىپ وقۋشىلارىنا دا جۇكتەمە سالماق كوپ. اتا-انالاردىڭ رەنجۋى دە بەكەر ەمەس. اعىلشىن ءتىلى, ورىس ءتىلى پاندەرى مەن وقۋلىقتارى تۋرالى اڭگىمە تىپتەن بولەك. ەڭ الدىمەن, مەكتەپتەردەگى ماتەريالدىق-تەحني­كالىق بازا, مۇعالىم كادر­لاردىڭ ساپاسى ەسكەرىلۋى كەرەك. ەلىمىزدەگى ءارتۇرلى باسپالار­دان شىققان كىتاپتاردىڭ, ادىستەمەلىك قۇرالداردىڭ كوپشىلىگى كىتاپ­حانالاردا پايدالانىلماي جاتىر. ونىڭ ورنىنا كومپيۋتەر سىنىپتارى, اۋىل بالالارىنىڭ بەيىمىنە قاراي سپورتتىق جاتتىعۋ الاڭدارى ت.ب سالىنسا – اۋىل بالالارىنىڭ دەنى ساۋ ۇرپاق بولىپ قالىپتاسۋىنا, بەيىندەرىن ۇشتاۋىنا بىردەن-ءبىر كومەك بولارى انىق. وقىلمايتىن وقۋلىق, ۇلكەندەر تاراپىنان كەتكەن ولقىلىقتاردان بۇگىنگى ۇرپاق زارداپ شەكپەۋى ءتيىس. گۇلجان توقمۋرزينا, قاراباۋ ورتا مەكتەبىنىڭ مۇعالىمى اتىراۋ وبلىسى, قىزىلقوعا اۋدانى