قازاقستاننىڭ ەڭ تازا قالاسى انىقتالدى

جاقىندا OLX سەرۆيسى جۇرگىزگەن زەرتتەۋ ناتيجەسىندە قازاقستاننىڭ ەڭ تازا جانە ەڭ لاس قالالارى انىقتالدى. «ءمىنسىز قالا» جوباسى اياسىندا قازاقستاندىقتار اراسىندا ەڭ تازا قالانى انىقتاۋ ماقساتىندا ساۋالناما جۇرگىزىلدى. تۇرعىندار قالاداعى تازالىققا 1-دەن 7-گە دەيىنگى شكالا بويىنشا باعا بەردى. زەرتتەۋدە كوشەلەردەگى تازالىق پەن ءتارتىپ, اۋانىڭ تازالىعى جانە كوممۋنالدىق قىزمەتتەر نازارعا الىندى. بۇل جولعى زەرتتەۋدىڭ وزگەلەردەن ءبىر ايىرماشىلىعى – رەيتينگتە ساراپشىلاردىڭ ەمەس, قالا تۇرعىندارىنىڭ پىكىرى ەسكەرىلگەن. ساۋالناماعا سايكەس, ەلىمىزدىڭ ەڭ ءىرى 20 شاھارىنىڭ ىشىندە قوستاناي ەڭ تازا قالا اتاندى. جالپى رەيتينگتە ول 21 بالدىڭ 13,8-ءىن جيناعان. اسىرەسە, قوستانايلىقتاردىڭ اۋانىڭ تازالىعىنا كوڭىلى تولادى ەكەن. كوممۋنالدىق قىزمەتتەردىڭ جۇمىسىن 3,7 بالعا باعالاعان. تازالىق جاعىنان ەكىنشى ورىندا – ورال قالاسى. جالپى ۇپايى – 13,7. ۇشتىككە 13,6 بالمەن تالدىقورعان قالاسى ەندى. ال ەلىمىزدىڭ باس قالاسى – استانا ۇزدىك بەستىككە دە كىرە المادى. ەلوردامىز كوكشەتاۋمەن بىرگە التىنشى ورىندا تۇر. قوس قالادا 13,1 بالدان بار. ال 4 جانە 5 ورىنداردا – شىمكەنت (13,5) پەن پەتروپاۆل (13,3). ەڭ تازا 10 قالانىڭ ىشىنە تاراز (12,6), اقتاۋ (11,9), پاۆلودار (11,7) جانە رۋدنىي (11,6 بالل) كىرگەن. تازالىقتىڭ جالپى رەيتينگىندە ەڭ تومەن بالل جيناعان قالالار قاتارىندا سەمەي (9,5) مەن تەمىرتاۋ (7,5) بار. قاراعاندى مەن وسكەمەن دە (ەكەۋىندە دە –9,6 بالدان) وزگەلەرمەن سالىستىرعاندا, لاس بولىپ شىقتى. الماتى قالاسى ءتىپتى, وندىققا دا كىرە المادى.