ۇكىمەت اگروونەركاسىپ كەشەنىن دامىتۋ باعدارلاماسىن ازىرلەدى

ۇكىمەتتىڭ 2017-2021 جىلدارداعى جاڭا اوك دامىتۋ مەملەكەتتىك باعدارلاماسى اۋىل تۇرعىندارىنىڭ قارجىلىق رەسۋرستارعا قولجەتىمدىلىگىن ارتتىرۋعا مۇمكىندىك بەرەدى 2017-2021 جىلدارداعى جاڭا اوك دامىتۋ مەملەكەتتىك باعدارلاماسىنىڭ اياسىندا ۇكىمەت وتاندىق اۋىلشارۋاشىلىق وندىرۋشىلەرىن شاعىن نەسيەمەن قولداۋ شارالارىن كەڭەيتەدى. قر پرەمەر-ءمينيسترىنىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ ءوز سوزىندە «قازاگرو» ۇبح» اق جەلىسى بويىنشا نەسيەلەۋ قايتا قاراستىرىلاتىنىن جەتكىزدى. سونىمەن قاتار, اۋىلشارۋاشىلىق ونىمدەرىن وندىرۋشىلەردىڭ بارلىق كاتەگوريالارىن نەسيەلىك رەسۋرستارمەن قامتۋدى كەڭەيتۋ جوسپارلانعان. تاعى ءبىر ايتا كەتەرلىگى, مەملەكەتتىك باعدارلاما اياسىندا مال شارۋاشىلىعىن سۋبسيديالاۋ باعدارلاماسىن جەتىلدىرۋ قاراستىرىلۋدا, سونداي-اق وسىمدىك شارۋاشىلىعىن سۋبسيديالاۋ تيىمدىلىگىن ارتتىرۋ كوزدەلۋدە. ەلباسى ن.نازارباەۆتىڭ تاپسىرماسى بويىنشا اگرارلىق سەكتوردى جەدەل دامىتۋ مىندەتى العا قويىلعانى بەلگىلى. وسىعان بايلانىستى ەل ۇكىمەتى 2017-2021 جىلدارعا ارنالعان اگروونەركاسىپ كەشەنىن دامىتۋ مەملەكەتتىك باعدارلاماسىن ازىرلەدى. سونىڭ ناتيجەسىندە تاياۋ بەس جىل ىشىندە اۋىل شارۋاشىلىعى ونىمدەرىن ءوندىرۋ مەن وڭدەۋ ەكونوميكانى ءارتاراپتاندىرۋ مەن ءوسىمنىڭ نەگىزگى درايۆەرى بولۋعا ءتيىس. قر ۇكىمەتىنىڭ وتىرىسىندا 2017-2021 جىلدارداعى جاڭا اوك دامىتۋ مەملەكەتتىك باعدارلاماسىن تالقىلاۋعا اقتوبە وبلىسىنىڭ اكىمى بەردىبەك ساپارباەۆ, الماتى وبلىسىنىڭ اكىمى اماندىق باتالوۆ, «تايىنشا-استىق» جشس باس ديرەكتورى اناتولي رافالسكي, «رزا» اق پرەزيدەنتى سامۇرات يماندوسوۆ, «اگروترەيدينگ» جشس ديرەكتورى سەرگەي ميلەنكو, «اگروترەيدينگ» ديرەكتورلار كەڭەسىنىڭ توراعاسى دين كيم قاتىستى. ارنۇر اسقار, «ەگەمەن قازاقستان»