ءۇندىستاننىڭ گوا شتاتى قولما-قول اقشادان باس تارتادى

ءۇندىستاننىڭ تۋريستىك گوا شتاتى قولما-قول اقشا قابىلدامايتىن وسى ەلدىڭ العاشقى شتاتى بولماق. جاڭا جىلدان باستاپ بارلىق تولەم ۇيالى تەلەفون نەمەسە بانك كارتاسى ارقىلى عانا جۇزەگە اسىرىلادى. بۇل تۋرالى شتاتتىڭ باس حاتشىسى رادجەش كۋمار شريۆاستاۆا مالىمدەدى, دەپ حابارلادى تاسس اقپارات اگەنتتىگى. «بارلىق ترانزاكتسيانى ۇيالى تەلەفون نەمەسە ساتىپ الۋشىعا تيەسىلى بانك ەسەپشوتى ارقىلى جۇزەگە اسىرۋعا بولادى», – دەدى كۋمار شريۆاستاۆا. ول الداعى ۋاقىتتا گوا ايماعىندا ءاميان ۇستاۋدىڭ قاجەتى بولمايتىنىنا جانە ۇرىلاردىڭ مۇلدەم جوعالارىنا سەنىم ارتىپ وتىر. كەز كەلگەن تاۋارعا, ءتىپتى بالىق, ەت, كوكونىس ساتىپ الۋ ءۇشىن دە ۇيالى تەلەفوننان ارنايى كودتى تەرۋ كەرەك. بانكوماتتار ادەتتەگىدەي جۇمىس ىستەۋدى جالعاستىرا بەرەدى. دۇكەندەر مەن قوناق ۇيلەردە نەسيەلىك كارتامەن تولەم جاساۋعا بولادى. شتات وسىلايشا «اقشاسىز قوعامعا» اينالۋدى ماقسات ەتىپ وتىر. ءۇندىستان بيلىگى الاياقتارعا قارسى كۇرەس ماقساتىندا 8 قاراشا كۇنى قولدانىستان 500 جانە 1000 ءرۋپيدى (2500-5000 تگ) الىپ تاستاعان بولاتىن. گوا – 1,5 ميلليون حالقى بار ايماق. مۇنداعى تۇرعىنداردىڭ تۇرمىستىق جاعدايى جاقسى.