جاھاندىق باستامالار گالەرەياسى

كەشە ەلباسى كىتاپحاناسىندا قازاقستان رەسپۋبليكاسىنىڭ تۇڭعىش پرەزيدەنتى كۇنىنە جانە ەل تاۋەلسىزدىگىنىڭ 25 جىلدىعىنا ورايلاستىرىلعان مەملەكەت باسشىسى نۇرسۇلتان نازارباەۆتىڭ جاھاندىق قاۋىپسىزدىكتى نىعايتۋعا, سونداي-اق, ىقپالداستىقتى كۇشەيتۋگە باعىتتالعان يدەيالارى مەن بىتىمگەرشىلىگى ارقاۋ بولعان «جاھاندىق باستامالار» گالەرەياسى اشىلدى. ەل تاۋەلسىزدىگىنىڭ 25 جىلدىعى مەرەيتويىنا وراي 25 تاقىرىپتىق ءىس-شارا بەلگىلەنگەندىگىن ەلباسى كى­تاپ­­حاناسى ديرەكتورىنىڭ ورىنباسارى جاپسارباي قۋانىشەۆ ەرەكشە اتادى. ونىڭ ايتۋىنشا, ۇستىمىزدەگى جىلدىڭ 21-ءشى قاراشاسىنان باستالاتىن شارالار كەلەسى ايدىڭ 15-ىنە دەيىن كۇنبە-كۇن وتكىزىلىپ تۇرادى. بۇل كۇندەرى ءاربىر تاقىرىپ بويىنشا فوتو, بەينە جانە مۇراعاتتىق قۇجاتتار كەلۋشىلەر نازارىنا ۇسىنىلادى. كەشەگى كۇننىڭ تاقىرىبى ەلباسىنىڭ جاھاندىق باستامالارىنا ارنالسا, ونىمەن تانىسۋ ءۇشىن الماتى جانە استانا قالالارىنان وقۋشىلار شاقىرتىلعانى بەلگىلى بولدى. ەلىمىزدە ورىن العان ماڭىزدى وقيعالارعا ارنالعان 40-قا تارتا كىتاپ سورەگە قويىلىپ, وقىرمانعا ۇسىنىلىپ وتىر. كىتاپحانا جۇمىسى ءبولىمىنىڭ جەتەكشى ساراپشىسى ايدىنكول كوشكەنوۆا سول كىتاپتاردىڭ بىرقاتارىمەن تانىستىرىپ تا ءوتتى. اتاپ ايتقاندا, سورەگە ك.بوزتاەۆتىڭ سەمەي جەرىندە العاشقى اتوم بومباسىنىڭ جارىلۋىنا 50 جىل تولۋىنا جانە ە.ياكۋبوۆسكايانىڭ سىناق پوليگونىنا 60 جىل تولۋىنا وراي جازىلعان دۇنيەلەرى قويىلعان. سونىمەن قاتار, مۇندا يۋ.كۋيديننىڭ قازاقستاننىڭ يادرولىق قاسىرەتى فوتوالبومى 40 جىلدان استام ۋاقىتقا سوزىلعان يادرولىق جارىلىستىڭ قاسىرەتىن اشىپ كورسەتەدى. بۇدان باسقا, سورەگە الەمدىك جانە ءداستۇرلى دىندەر ليدەرلەرىنىڭ ءبىرىنشى سەزىنە ارنالعان كىتاپ تا بار. جيناقتا قۇجاتتار, سويلەگەن سوزدەر مەن قۇتتىقتاۋلار كورىنىس تاپقان. جانە قازاقستان مەن ەقىۇ اراسىنداعى ىنتىماقتاستىعىن سارالاۋعا ارنالعان مونوگرافيا دا قالىڭ وقىرمانعا ۇسىنىلىپتى. جالپى, كىتاپتار اراسىندا جاڭا ستراتەگيالىق كوكجيەكتەرگە جول اشقان ەلباسىنىڭ بەيبىت ومىرگە ۇندەيتىن «الەم. ءححى عاسىر» مانيفەسىن, ازياداعى ءوزارا ىقپالداستىق جانە سەنىم شارالارى جونىندەگى كەڭەسى, ەۋرازيالىق ەكونوميكالىق وداقتى, شانحاي ىنتىماقتاستىق ۇيىمىن قۇرۋ يدەيالارىن اشىپ كورسەتەتىن تۋىندىلار دا قويىلعان. سونداي-اق, كەلۋ­شى­لەر­گە ۇلكەن ەكران ارقىلى مۇراعات ماتەريالدارى مەن ەلباسى باستامالارى تۋرالى فيلم ۇسىنىلدى. تاعى ءبىر ايتا كەتەرلىگى, ەلباسى كىتاپحاناسىندا «باستاما جانە ارىپتەستىك» ينتەراكتيۆتى ۇستەلى ارقىلى كەلۋشىلەر وزدەرىنە قاجەتتى اقپاراتتاردى الا الدى. وسىنداي ءاربىر ۇستەلدە تاقىرىپتىق مالىمەتتەر مولىنان ورنالاستىرىلعان. ديرەكتور ورىنباسارى ج.قۋانىشەۆ رەتى كەلگەندە بۇل جيناقتالعان مالىمەت­تەر­دىڭ بارلىعى 25 جىلدا ەلىمىزدىڭ الەۋمەتتىك-ەكو­نوميكالىق, قوعامدىق-ساياسي جەتىستىكتەردىڭ جوعارى دەڭ­گەيدە جانە ونىڭ حالىقارالىق قوعامداستىق تاراپىنان قولداۋ تاۋىپ وتىرعاندىعىنىڭ ءبىر ايعاعى ەكەندىگىن العا تارتتى. «ەلباسىنىڭ جاھاندىق باستامالارى بەيبىت الەم ورناتۋ. ادامزات ءوز-ءوزىن ساقتاعىسى كەلسە, بارلىق ماسەلەلەردى بەيبىت جولمەن شەشە ءبىلۋى كەرەك. يادرولىق قارۋدان باس تارتقان ابزال. سوندىقتان دا ەلباسى ساياساتى دۇنيە جۇزىندە ءوزىنىڭ قولداۋىن تاۋىپ جاتىر. وسى جيىرما بەس جىلدىڭ ىشىندە اتقارىلعان ىستەردىڭ عاسىرعا تۇراتىنداي اۋقىمدىق كورىنىسى», دەدى ول ءوز سوزىندە. جالپى, قازاقستان رەسپۋبليكاسىنىڭ تۇڭعىش پرەزيدەنتى كۇنىنە جانە ەلىمىز تاۋەلسىزدىگىنىڭ 25 جىلدىعىنا وراي سەگىز كورمە ۇيىمداستىرىلىپ وتىر. وعان جەكە كۋالىگى بار كەز كەلگەن ادام كىرىپ, تاماشالاۋىنا مۇمكىندىگى بار. ءتىپتى, بۇل ءۇشىن ۇستىمىزدەگى جىلدىڭ 28 قاراشاسى مەن 23 جەلتوقسانى ارالىعىندا اشىق ەسىك كۇندەرى دەپ جاريالانىپ وتىر. اسقار تۇراپباي ۇلى, «ەگەمەن قازاقستان»