«بارىس» ءوز ايدىنىندا «ادميرال» كومانداسىنان جەڭىلدى

قۇرلىقتىق حوككەي ليگاسىنىڭ تۇراقتى چەمپيوناتىندا استانانىڭ «بارىسى» ءوز ايدىنىندا ۆلاديۆوستوكتىڭ «ادميرال» كومانداسىن قابىلداپ, 1:4 ەسەبىمەن جەڭىلدى. ويىن ايدىن يەلەرىنىڭ شابۋىلىمەن باستالدى. كەزدەسۋدىڭ نەبارى 3-مينۋتىندا استانالىقتار كەم باركەردىڭ كومەگىمەن ەسەپ اشتى. دەگەنمەن, وسىدان كەيىن وسالدىق تانىتقان ەدۋارد زانكوۆەتس شاكىرتتەرى 8-مينۋتتا ءوز قاقپالارىنا شايبا جىبەرىپ الدى. ناتيجەلى سوققىنىڭ اۆتورى – دجەيمس رايت. ماتچتىڭ ەكىنشى كەزەڭى تولىعىمەن قوناقتاردىڭ باقىلاۋىندا ءوتتى. الدىمەن, 22-مينۋتتا ماكسيم كازاكوۆ مەرگەندىگىمەن كوزگە ءتۇسىپ, ءوز كومانداسىن العا شىعارسا, 26-مينۋتتا دجەيمس رايت دۋبل يەسى اتاندى. مۇنىمەن دە توقتاماعان «ادميرال» حوككەيشىلەرى ارادا بىرەر مينۋت وتەر-وتپەس تاعى ءبىر شايبانى سوقتى. اتاپ ايتقاندا, پاۆەل ماكارەنكو 28-مينۋتتا كەزدەسۋدىڭ سوڭعى نۇكتەسىن قويدى. ەنشىسىندە 45 ۇپايى بار «بارىس» «شىعىس» كونفەرەنتسياسىندا 8-ورىندا كەلەدى. كەلەسى كەزدەسۋىن استانادا 27 قاراشا كۇنى «امۋر» كومانداسىمەن وتكىزەدى.