بۇگىن سىرتقى ىستەر مينيسترلىگىندە تاۋەلسىزدىكتىڭ 25 جىلدىعى مەرەيتويى قارساڭىندا «تاۋەلسىزدىك تۋى استىندا» تاريحي-دەرەكتى كورمە اشىلدى. ونىڭ وتۋىنە اتالعان ۆەدومستۆو مەن قازاقستان رەسپۋبليكاسى پرەزيدەنتىنىڭ مۇراعاتى ۇيىتقى بولدى.
ءىس-شارانىڭ اشىلۋىنان كەيىن باق وكىلدەرىنە ارنالعان بريفينگتە ءسوز العان سىرتقى ىستەر ءمينيسترىنىڭ ورىنباسارى رومان ۆاسيلەنكو شيرەك عاسىر ىشىندە قازاقستاننىڭ مەملەكەت رەتىندەگى قالىپتاسۋ كەزەڭدەرىن, قول جەتكىزگەن جەتىستىكتەرىن ايقىندايتىن قۇندى قۇجاتتار مەن فوتوسۋرەتتەر قويىلعان كورمەنىڭ ماڭىزى ايرىقشا ەكەنىن اتاپ ءوتتى. سونداي-اق, ول: «بۇل رەتتە, مەن ەڭ الدىمەن, قازاقستان رەسپۋبليكاسى پرەزيدەنتى مۇراعاتىنىڭ ديرەكتورى بوريس جاپاروۆقا, مۇراعات قىزمەتكەرلەرىنە وسىنداي يگى شارانى وتكىزۋ ءۇشىن ۇلكەن نيەتتەستىك تانىتقانى, جۇرت نازارىنا ۇسىنىلعان قۇجاتتار توڭىرەگىندە ۇلكەن زەرتتەۋ جۇمىستارىن جۇرگىزگەنى ءۇشىن ريزاشىلىعىمدى بىلدىرگىم كەلەدى», – دەدى.
بوريس جاپاروۆ تاۋەلسىزدىك جىلدارى مەملەكەت الدىندا ۇلكەن مىندەتتەر قويىلعانىن, ول مىندەتتەردى شەشۋ, ەكونوميكانى تۇراقتاندىرۋ, العا قاراي دامىتۋ ناقتى دەموكراتيا مەن نارىقتىق قاتىناستارعا نەگىزدەلۋىمەن ەرەكشەلەنگەنىن جەتكىزدى.
«قازاقستان ءوز تاۋەلسىزدىگىن جاريالاعان كۇننەن باستاپ, حالىقارالىق ۇيىمدارعا ءوز ەركىمەن مۇشە بولۋ مۇمكىندىگىن الدى. 1992 جىلدىڭ 30 قاڭتارىندا ەۋروپاداعى قاۋىپسىزدىك جانە ىنتىماقتاستىق ۇيىمىنا مۇشەلىككە ءوتتى. ال 1992 جىلدىڭ 2 ناۋرىزىندا ەلىمىز بۇۇ-نىڭ تولىق مۇشەسى بولدى. 1993 جىلدىڭ قازان ايىندا قازاقستان ەكونوميكالىق ىنتىماقتاستىق ۇيىمىنا مۇشەلىككە كىرسە, 1994 جىلدىڭ 24 مامىرىندا ارنايى قۇجاتقا قول قويا وتىرىپ, ەلىمىز ناتو-نىڭ «بەيبىتشىلىك جونىندەگى ارىپتەستىگى» ۇيىمىنىڭ 19-شى مۇشەسى بولدى. جالپى, XX-شى عاسىردىڭ سوڭىنداعى تاريحي كەزەڭدە قازاقستان ادامزاتتىڭ, جالپى دۇنيەنىڭ قاسىرەتىنە اينالعان سەمەي يادرولىق سىناق الاڭدارىن جابۋ, كەڭەس وداعىنىڭ ەنشىسىنەن وتكەن يادرولىق قارۋلار مەن ونىڭ جەتكىزۋ قۇرالدارىنان ءوز ەركىمەن باس تارتۋ ارقىلى الەمگە بەيبىتسۇيگىش مەملەكەت رەتىندە تانىلدى», – دەدى بوريس جاپاروۆ.
سونىمەن قاتار, ول ەلىمىزدىڭ دەربەس مەملەكەت رەتىندە قالىپتاسۋى مەن حالىقارالىق قاۋىمداستىقتا جەتكەن جەتىستەرىنىڭ تاريحى قازاقستان رەسپۋبليكاسى پرەزيدەنتى مۇراعاتىنىڭ قورلارىندا ساقتالعان قۇجاتتاردا تولىقتاي كورسەتىلگەنىن ايتتى.
«وندا رەسمي-حرونيكالىق قۇجاتتارمەن قاتار, ساياسي جانە قوعامدىق ۇيىمداردىڭ ماتەريالدارى, تاۋەلسىزدىك كەزەڭىنىڭ مەرزىمدى باسىلىمدارى دا بار. سىزدەردىڭ نازارلارىڭىزعا «تاۋەلسىزدىك تۋى استىندا» دەگەن تاقىرىپپەن ۇسىنىلىپ وتىرعان كورمەدە تاۋەلسىزدىك العان جىلداردان باستاۋ الاتىن مەملەكەتتىلىكتىڭ قالىپتاسۋ تاريحىن تولىق اشىپ كورسەتەتىن قۇجاتتار ورنالاستىرىلدى», – دەدى ول ءوز سوزىندە.
كورمە 5 بولىكتەن تۇرادى. ولاردا قازاقستاننىڭ مەملەكەتتىك نىشاندارى, قازاقستاننىڭ تۇڭعىش پرەزيدەنتى, ەل پارلامەنتى, ۇكىمەتى, ۇلتتىق ۆاليۋتانىڭ اينالىمعا ەنۋى, قازاقستان حالقى اسسامبلەياسىنىڭ, سىرتقى ساياسي ۆەدومستۆونىڭ قۇرىلۋى, ديپلوماتيالىق بايلانىستاردىڭ ورناۋى, قازاقستاننىڭ بۇۇ-عا قابىلدانۋى, سونداي-اق, ەلىمىزدىڭ شەت مەملەكەتتەرمەن ساياسي-ەكونوميكالىق بايلانىس ورناتۋى تۋرالى قۇندى ماتەريالدار, قازاقستان پرەزيدەنتىنىڭ ءتۇرلى شەتەلدىك ارىپتەستەرىمەن سۇحباتتارى جانە حالىقارالىق جيىنداردا جاساعان باياندامالارى, پرەزيدەنت جارلىقتارى, شەت مەملەكەت باسشىلارىنىڭ ەلىمىزدى تاۋەلسىز مەملەكەت رەتىندە تانۋى تۋرالى حاتتارى قويىلعان.
ءلايلا ەدىلقىزى,
«ەگەمەن قازاقستان».
سۋرەتتەردى تۇسىرگەن ورىنباي بالمۇرات
