جاڭا انيماتسيالىق فيلم شىعادى

«مۇزبالاق» انيماتسيالىق ءفيلمى كورەرمەنگە كەلەر جىلى جول تارتپاق, دەپ حابارلادى قازاقفيلمنىڭ رەسمي ينتەرنەت-رەسۋرسى. 60 مينۋتتىق انيماتسيالىق ءفيلمدى جارىققا شىعارۋ ءۇشىن ءۇش جىل تاپجىلماي ەڭبەك ەتۋ كەرەك. 22 ادامنان تۇراتىن شىعارماشىلىق توپ شامامەن 85 مىڭ سۋرەت سالۋى ءتيىس. ءفيلمنىڭ رەجيسسەرلەرى تىلەك تىلەۋعازى مەن تۇردىبەك مايدان دايىندىق جۇمىستارى 2015 جىلدىڭ قىركۇيەگىندە باستالعانىن جەتكىزدى. انيماتسيالىق فيلم 2017 جىلدىڭ تامىز ايىندا دايىن بولماق. رەجيسسەردىڭ پىكىرىنشە, شەت ەلدىك ونىمدەرگە قاراعاندا وتاندىق فيلمدەردىڭ بەرەرى مول. پاتريوتتىق سەزىمدى وياتىپ, ءداستۇردى دارىپتەپ, ۇلتتىق يدەولوگيانى ناسيحاتتايتىن بىردەن ءبىر قۇرال - انيماتسيالىق فيلمدەر. «مۇزبالاق» كورىنىسىنىڭ جەلىسىندە ادامنىڭ بۇركىتتى العاش رەت قولعا ۇيرەتۋى باياندالادى. وندا قىران قۇستىڭ قازاق اراسىنداعى ەرەك ورنى مەن قاسيەتى كورسەتىلەدى. دايىندىق بارىسىندا قازاقستاننىڭ كورىكتى جەرلەرى زەرتتەلىپ, ۇلتتىق ناقىشتا كەيىپكەرلەردى كورسەتۋگە اسا كوڭىل بولىنگەن. «ارينە, فيلم ۇلتتىق بولعاننان كەيىن, قازاقي بولعاننان كەيىن ونىڭ ءستيلىن دە قازاقي ەتىپ شىعارۋ كەرەك بولدى. دەمەك, كورىنىستەردىڭ تەرەڭدىگىن, قازاق جەرىنىڭ بايلىعىن, كەڭدىگىن, ادەمىلىگىن, سۇلۋلىعىن كورسەتۋ كەرەك. سول ءۇشىن وسى كورىنىستەرگە بارىمىزدى سالىپ, ارنايى ەكسپەديتسيامەن شىعىپ, فوتوعا ءتۇسىرىپ, سونى زەرتتەگىننىڭ بارلىعىن, تۇيگەنىمىزدى وسى فيلمگە سالىپ وتىرمىز», - دەدى «مۇزبالاق» انيماتسيالىق ءفيلمىنىڭ قويۋشى-سۋرەتشىسى اداي ءابىلدانوۆ. سونىمەن قاتار, «قازاقفيلم» كينوستۋدياسىندا «كۇلتەگىن» تولىقمەترلى ءمۋلتفيلمىنىڭ وندىرىسكە دايىندىق جۇمىستارى باستالدى. بۇل جوبا اداي ءابىلدانوۆتىڭ رەجيسسەرلىك ەتۋىمەن جارىق كورمەك. الداعى ۋاقىتتا ونىڭ شىعۋ ۋاقىتى بەلگىلى بولادى.