ادىلبەكتى سىيلايمىن, ال رينگتە جاقسى قارسىلاس بولامىز – ءالىمحان ۇلى

پاۆلودار قالاسىندا بوكستان قازاقستان چەمپيوناتىنىڭ 5-ءشى كۇنى ارتتا قالدى. بۇل كۇنى شارشى الاڭعا 52, 56, 60, 64, 69, 75, 81 جانە 91 كگ سالماق دارەجەسىندەگى بوكسشىلار شىعىپ, جارتىلاي فينالدىڭ جولدامالارىن ساراپقا سالدى, دەپ حابارلادى قازاقپارات. ريو-دە-جانەيرو وليمپياداسىنان كەلگەننەن كەيىن, 75 كەلى سالماقتان 81 كەلىگە اۋىسقان جانىبەك ءالىمحان ۇلى شيرەك فينالدىق باسەكەسىن مەرزىمىنەن بۇرىن اياقتاپ, تىلشىلەرگە بەرگەن سۇحباتىندا كاسىپقوي بوكسقا اۋىسۋ ماسەلەسى ەل بىرىنشىلىگىنەن كەيىن بەلگىلى بولاتىنىن ايتتى. «جاڭا سالماق ماعان اسا ءبىر قيىندىق تۋدىرىپ جاتقان جوق. بۇل سالماققا دا جاقسى دايىندىقپەن كەلدىم. وزدەرىڭىز بىلەسىزدەر, 81 كەلى سالماقتا وسىعان دەيىن وليمپيادانىڭ ەكى دۇركىن كۇمىس جۇلدەگەرى ادىلبەك نيازىمبەتوۆ ونەر كورسەتىپ كەلدى. ول ريودا جۇلدەگەر بولعانى ءۇشىن ەل بىرىنشىلىگىنەن بوساتىلعان. مەن ادىلبەكتى اعا رەتىندە وتە قاتتى سىيلايمىن. ال رينگتە جولىعىپ جاتساق, ءبىر-بىرىمىزگە جاقسى قارسىلاس بولاتىنىمىزعا دا سەنەم. ال كاسىپقوي بوكسقا اۋىسۋ ماسەلەسى ەل بىرىنشىلىگى اياقتالعان سوڭ بارىپ, بەلگىلى بولادى. ءدال بۇگىن, ەرتەڭ ەشنارسە ايتا المايمىن», – دەدى جانىبەك ءالىمحان ۇلى. ەستەرىڭىزگە سالا كەتەيىك, پاۆلوداردا ءوتىپ جاتقان ەل بىرىنشىلىگى 27 قاراشا كۇنى ءوز مارەسىنە جەتەدى. ۇزدىك شىققان بوكسشىلار ۇلتتىق قۇراماعا قابىلدانادى.