ەلباسى تاۋەلسىزدىك تۇسىنداعى ءوڭىر تابىستارىن وڭ باعالادى
بۇعان دەيىن شىعىس قازاقستان, الماتى وبلىستارىندا بولعان نوسەر مەن سەل كەزىندە ەل حالقىنىڭ اۋىزبىرشىلىگى تۇڭعىش رەت سىناقتان ءوتىپ ەدى. مىنە, سونداي مارتتىك پەن دارحاندىقتىڭ, اۋىزبىرشىلىكتىڭ تاپتىرماس ۇلگىسى باتىس قازاقستان وڭىرىندەگى كوكتەمگى تاسقىندا تاعى دا الدىمىزدان شىقتى. بۇل – قازاقستان حالقىنىڭ ءوزارا دوستىعى مەن تۋىسقاندىعىنىڭ جانە ءبىر-بىرىنە دەگەن سۇيىسپەنشىلىگىنىڭ ايقىن دالەلى.
ن.نازارباەۆ.
حالقىمىز كوكتەن سىركىرەپ توگىلگەن جاڭبىردى نۇرعا بالايدى. شولىركەپ جاتقان دالا مەن ەلگە جاڭبىر جاۋعان كۇنى جولاۋشى كەلە قالسا: «نۇر الا كەلدىڭىز», دەپ توبەلەرىنە كوتەرىپ الىپ, بار سىي-قۇرمەتتەرىن الدىنا جايادى. ەلباسى رەسپۋبليكامىزدىڭ باتىستاعى قاقپاسى – باتىس قازاقستان وبلىسىنا ساپارمەن كەلەر قارساڭدا بىرنەشە كۇن بويى اقجايىق اسپانىن قارا بۇلت تورلاپ, ءۇش-ءتورت كۇن قاتارىنان جاڭبىر جاۋىپ تۇرعان-دى. ال, ءدال كەشە, مەملەكەت باسشىسى نۇرسۇلتان نازارباەۆتىڭ ۇشاعى ورال اۋەجايىنا ءتومەندەگەن ساتتە بۇلت سەيىلىپ, جايما-شۋاق جاز قايتا كەلىپ ورناعانداي بولدى. ەل پرەزيدەنتىن جايدارى دا جىلى جۇزبەن قارسى العان مىڭداعان باتىسقازاقستاندىقتار: قۇرمەتتى نۇرسۇلتان ءابىش ۇلى! ءسىز بىزگە نۇر دا, جىلى شۋاق تا الا كەلدىڭىز, دەپ شىن جۇرەكتەن شىققان ريزاشىلىقتارىن ءبىلدىرىپ جاتتى.
مۇندا ەلباسى بىردەن بيىلعى كوكتەمگى سۋ تاسقىنى كەزىندە زارداپ شەككەن تۇرعىندارمەن كەزدەسىپ, ءسوز سويلەدى. زەلەنوۆ اۋدانىنىڭ ورتالىعى پەرەمەتنىي كەنتىندە ەلباسى وي مەن ءسوز ءتۇيىنىن تومەندەگىشە تارقاتتى. قۇرمەتتى باتىسقازاقستاندىقتار, تاۋەلسىزدىك باعا جەتپەس ساياسي قۇندىلىق قانا ەمەس, سونىمەن بىرگە, ول كەز كەلگەن ۋاقىتتا تۇتقيىلدان تاپ بەرەتىن سىن دا, سىناق تا بولىپ تابىلادى. تاۋەلسىز ەلىمىز سونداي سىناقپەن بيىل تۇڭعىش رەت بەتتەستى. ول – ورال وڭىرىندە, بۇكىل رەسپۋبليكا اۋماعى بويىنشا العاندا بۇرىن-سوڭدى بولىپ كورمەگەن جويقىن سۋ تاسقىنى. وسى تابيعات اپاتىنىڭ جاي-كۇيى العاشقى كۇننەن نازارىمىزدا بولدى. ونىڭ زارداپتارىن جويۋ ءۇشىن ورتالىقتان 18 ميلليارد تەڭگە قاراجات ءبولىندى.
وسىنداي سىني ساتتە توعىز مىڭنان استام ادام اپات ايماعىنان كوشىرىلدى. تاسقىننىڭ سالدارى 1500-دەن استام تۇرعىن ءۇي مەن الەۋمەتتىك-تۇرمىستىق نىسانداردىڭ ىستەن شىعۋىنا اكەلىپ سوقتىردى. مىنە, بۇگىن ءبارىمىز كۋا بولىپ تۇرعانىمىزداي, وتە قىسقا ۋاقىت ارالىعىندا, نەبارى ءۇش ايدىڭ ىشىندە تۇرعىن ءۇي قالاشىقتارى بوي تۇزەدى. بۇعان دەيىن شىعىس قازاقستان, الماتى وبلىستارىندا بولعان نوسەر مەن سەل كەزىندە ەل حالقىنىڭ اۋىزبىرشىلىگى تۇڭعىش رەت سىناقتان ءوتىپ ەدى. مىنە, سونداي مارتتىك پەن دارحاندىقتىڭ, اۋىزبىرشىلىكتىڭ تاپتىرماس ۇلگىسى باتىس قازاقستان وڭىرىندەگى كوكتەمگى تاسقىندا تاعى دا الدىمىزدان شىقتى. بۇل – قازاقستان حالقىنىڭ ءوزارا دوستىعى مەن تۋىسقاندىعىنىڭ جانە ءبىر-بىرىنە دەگەن سۇيىسپەنشىلىگىنىڭ ايقىن دالەلى. تەك جەكە تۇرعىندار ارنايى ەسەپ-شوتقا 2 ميلليارد تەڭگەگە جۋىق قاراجات اۋدارىپتى. ءسويتىپ, ءبىز بيىل تاۋەلسىزدىكتىڭ جيىرما جىلدىعى قارساڭىندا قازاقستان حالقىنىڭ بىرلىگى مەن ىنتىماعىن تورتكۇل دۇنيەگە پاش ەتە بىلدىك. قونىس قۇتتى بولسىن, وتباسىلارىڭا اماندىق پەن باقىت تىلەيمىن.
وسىلاي دەدى دە ەلباسى «مۇنايشى» اتاۋىن يەلەنگەن زەلەنوۆ اۋدانى ورتالىعىنداعى جاڭا قالاشىقتاعى وقتاي ءتۇزۋ كوشەلەرگە سۇيسىنە كوز تاستادى. مۇندا جاڭادان بوي كوتەرگەن توعىز كوشەگە تاۋەلسىزدىك تالاپتارىنا ساي كەلەتىن اتاۋلار بەرىلىپتى. مىنە, قاراڭىزشى, قۇلاق ءتۇرىپ كورىڭىزشى! مۇنداعى ورتالىق كوشەلەردىڭ ءبىرى – تاۋەلسىزدىكتىڭ جيىرما جىلدىعى اتاۋىن يەلەنىپتى. ءارى قاراي, قازاقستان حالقى اسسامبلەياسى, جاڭا قونىس, كەڭ دالا, بولاشاق, ارۋانا, مەرەي, نۇرلى بولىپ جالعاسىپ كەتە بەرەدى. كەشەگى كەڭەستىك ساياساتتا قالا مەن اۋىلدىڭ اراسىنداعى ايىرماشىلىقتى جويۋ دەگەن وتە كۇردەلى ءماسەلە ءجيى ايتىلاتىن. الايدا, كسرو-نىڭ جەتپىس جىلدىق تاريحىندا بۇل ماسەلە اباي اتامىزشا ايتقاندا, «باياعى جارتاس – ءبىر جارتاس» كۇيىندە قالىپ قويعانى بەلگىلى.
نۇرسۇلتان نازارباەۆ زەلەنوۆ اۋدانىنداعى جاڭا قونىس يەلەرىمەن كەزدەسۋدە اتاپ كورسەتكەندەي, شەشىلمەستەي كورىنگەن بۇل ءماسەلە تەك تاۋەلسىز, ەگەمەن ەل جاعدايىندا مۇمكىن بولىپ وتىر. سونىڭ ايقىن ءبىر دالەلى, بۇرىنعى تىلمەن ايتقاندا, وتىن-سۋى, بۇگىنگى تىلمەن ايتقاندا, گازى مەن جىلۋى, بارلىق سانيتارلىق-گيگيەنالىق قوندىرعىلارى بار ءۇيلەردىڭ اۋىلداردا سالىنا باستاۋى. وسىنداي يگىلىكتى تاسقىن سۋ زارداپتارىنا ۇشىراعان زەلەنوۆ اۋدانىنداعى 92, تاسقالا اۋدانىنداعى 72 وتباسىنىڭ كورە باستاعانى قانداي عانيبەت. بۇل جەردە وبلىس ورتالىعىنداعى 500 وتباسىنا ارنالىپ تۇرعىزىلعان ءارى قازىر قۇرىلىسى اياقتالىپ قالعان كوپ قاباتتى تۇرعىن ءۇي كەشەندەرى بولەك ءبىر اڭگىمەنىڭ سىباعاسى بولماق. شاعالاداي ساپ ءتۇزەگەن قازاقستاننىڭ رەسەيمەن شەكارالاس اۋداندارىنداعى جاڭا قالاشىقتار جونىندە ءوز وي-پىكىرىن گازەت تىلشىسىنە رەسەي فەدەراتسياسىنىڭ ساراتوۆ وبلىسىنا قاراستى وزينكي اۋدانىنىڭ باسشىسى ا.گالياشكينا بىلايشا ءبىلدىردى.
– مەن كەڭەستىك كەزەڭدە بيىل كوكتەمدە سۋ تاسقىنىنا ۇشىراعان زەلەنوۆ اۋدانىندا باسشىلىق قىزمەتتە بولدىم. سول كەزدەگى ۇلكەن لاۋازىم – اۋپارتكومنىڭ ءبىرىنشى حاتشىسىنىڭ ورىنتاعى ماعان سەنىپ تاپسىرىلدى. سەنىم ۇدەسىنەن شىعۋعا ۇمتىلىپ, جاستىق كۇش-جىگەرىمىزدى اياماي قىزمەت جاسادىق. الايدا, قازىرگى ءتاۋەلسىز قازاقستان جاعدايىنداعىداي اۋدانداردىڭ قارىشتى دامۋى ءبىزدىڭ ءوڭىمىز تۇگىلى, تۇسىمىزگە دە كىرمەيتىن. وزىمە جاقسى تانىس تاسقالا جانە زەلەنوۆ اۋداندارىندا تابيعات اپاتى كەزىندە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پەن كورشى ەلدىڭ ۇكىمەتى تاراپىنان كورسەتىلگەن شەكسىز قولداۋ مەن كومەكتەن مەن ءوز وتانىمداي بولىپ كەتكەن كورشىلەس مەملەكەتتىڭ وراسان زور الەۋەتىن تانىپ تۇرعاندايمىن. بۇل ءۇشىن ءاربىر قازاقستاندىقتىڭ لايىقتى ماقتانىش سەزىمىنە بولەنە الاتىنى انىق. ارينە, كورشىلەردەگى جەتىستىكتەردى قىزعانبايمىز. وعان قىزىعامىز. شىنىن ايتقاندا, ءدال قازىر مەن زەلەنوۆ پەن تاسقالاداعى تاقتايداي ءتۇزۋ, ءسانى مەن سالتاناتى كەلىسكەن كوشەلەردى كورىپ, ەرەكشە تولقۋ ۇستىندە تۇرمىن. جارايسىڭدار, قازاقستاندىقتار!
ءادىلىن ءارى اشىعىن ايتىڭىزشى, قۇرمەتتى وقىرمان. وسىلايشا شىن جۇرەكتەن اعىنان جارىلا ايتىلعان وي-پىكىردى ايتپاي, جازباي, ەلەمەي كەتۋ مۇمكىن بە؟ مۇمكىن ەمەس قوي. سوندىقتان دا ءبىز بۇل ارادا «سىرت كوز – سىنشى» دەگەندەي, انتونينا الەكسەەۆنانىڭ قالتقىسىز لەبىزىن قوسا ايتا كەتكەندى ءجون كوردىك.
ەلباسىنىڭ جاڭا قونىس يەلەرىمەن كەزدەسۋى كەزىندە ەل اقساقالدارى اتىنان اسىلبەك سۇلتانعاليەۆ ءسوز الىپ, «سابىر ءتۇبى – سارى التىن» دەگەن حالىقتىق قاعيدانىڭ ومىرشەڭدىگى بۇگىن تاعى ءبىر دالەلدەنىپ وتىرعانىن ايتتى. جويقىن تاسقىن سۋ جولىنداعىنىڭ ءبارىن جايپاپ-ءتوستەپ كەلىپ قالعاندا ابىرجىعانىمىز راس. الايدا, مەملەكەت باسشىسى مەن بارشا قازاقستاندىقتاردىڭ قولداۋىن سەزىنگەن ساتتە مۇنداي كوڭىل-كۇي اۋانىنان تەز ارىلدىق. قاشاندا امان-ساۋ بولىڭىز, نۇرسۇلتان ءابىش ۇلى. ەلدىڭ تىنىشتىعى ەلباسىنىڭ اماندىعىنا دا بايلانىستى. وسى ءبىر ساتتە ءبىز وزىڭىزدەي ەل ءۇشىن تۋعان ۇلدى دۇنيەگە كەلتىرگەن اناڭىز ءالجاننىڭ رۋحىنا دا باس يگىمىز كەلەدى», – دەپ تۇيىندەدى اقساقال ءوز ويىن.
– قۇرمەتتى نۇر-اعا! مەنىڭ اتى-ءجونىم ناتاليا تاتتىعۇلوۆا. اكەم – بەلارۋس, انام – ورىس قىزى. ءوزىم قازاقتىڭ كەلىنىمىن, – دەپ ءسوز باستادى بۇدان سوڭ ارنايى ورناتىلعان تۇعىرعا كوتەرىلگەن «مۇنايشى» قالاشىعىنىڭ تاعى ءبىر جاڭا تۇرعىنى. – وتباسى يەسى ەكەۋمىز ءمولدىر, قازى, قاراساي, ماحاببات جانە سەزىم ەسىمدى ۇل-قىزداردى دۇنيەگە اكەلىپ, قازاق حالقى سانىنىڭ وسۋىنە ۇلەس قوسىپ جاتىرمىز. قازاقستان – مەنىڭ وتانىم. مەن ءوز باقىتىمدى وسى توپىراقتان تاپتىم. بىزگە جاڭادان تۇرعىزىلعان كوشەلەردىڭ بىرىنەن كەڭ دە جايلى ءۇي بەرىلدى. بۇل, ەڭ الدىمەن, جاس, كوپ بالالى وتباسىلاردى قولداۋ مەن قامقورلىق كورسەتۋگە باعىتتالعان ءسىزدىڭ ساياساتىڭىزدىڭ ناتيجەسى دەپ بىلەمىز. سول ءۇشىن دە سىزگە مىڭ العىس, نۇرسۇلتان ءابىش ۇلى.
جاڭا قالاشىقتىڭ تاعى ءبىر تۇرعىنى ۆارۆارا سۋەتينا ءوز ءسوزىن قىسقاشا قايىرىپ, حالىقتىق سالت-داستۇرگە ساي ەلباسىن ءىرگەدە تۇرعان جاڭا قونىسىنان ءدام اۋىز ءتيىپ شىعۋعا شاقىردى. ءجۇزى قۋانىشتان جايناپ تۇرعان انا تىلەگىن نۇرسۇلتان ءابىش ۇلى اياقسىز قالدىرعان جوق. مەملەكەت باسشىسى بۇل شاڭىراققا باس سۇعىپ, وتباسى مۇشەلەرىمەن تانىسىپ, داستارقاندارىنان ءدام تاتتى.
بۇدان سوڭ ەلباسى وتىرعان تىكۇشاق قۇرىلىسى اياقتالعان قۋاتى 54 مەگاۆاتتىق گاز تۋربينالى ەلەكتر ستانساسىنا قاراي باعىت ۇستادى. بۇدان تۇپ-تۋرا جيىرما جىل بۇرىن, تاۋەلسىزدىككە قادام باسقان كەزدە رەسپۋبليكانىڭ ءار ايماعى مەن ءوندىرىسىنىڭ تەك وزدەرىنە عانا ءتان پروبلەمالارى مەن قيىنشىلىقتارى الدان شىققان ەدى. مىسالى, باتىس قازاقستان وبلىسى ءۇشىن مۇنداي پروبلەما – كەشەگى كسرو-نىڭ مۇراگەرىندەي كورىنەتىن كورشىلەس الىپ ەل – رەسەيدىڭ الدىنداعى ەنەرگەتيكالىق تاۋەلدىلىك بولاتىن. سول تۇستاعى دەرەكتەر توقسانىنشى جىلداردىڭ باس كەزىندە باتىس قازاقستان وبلىسىنىڭ رەسەي ەنەرگەتيكتەرىنە كىرىپتارلىعى 90 پايىزعا جەتكەنىن كورسەتەدى.
ويتكەنى, بۇل كەزدە ورال ءوڭىرى قازاقستاننىڭ بىرىڭعاي ەلەكتر جۇيەسىنەن تىم الشاق ورنالاستى. بۇدان كەيىنگى جىلداردا ءوڭىردى ەنەرگەتيكالىق تاۋەلسىزدىككە جەتكىزۋدىڭ جولدارى بەلگىلەنىپ, سوڭعى ءتورت-بەس جىلدا بۇل ءىس تاماشا ناتيجە بەردى. وسى ۋاقىت ارالىعىندا وبلىس اۋماعىندا بىرنەشە گاز-تۋربينالى ەلەكتر ستانسالارى سالىندى. سونىڭ ەڭ قۋاتتىلارىنىڭ ءبىرى – قۋاتى 54 مەگاۆاتتىق اتالعان ۇلگىدەگى ستانسانىڭ العاشقى كەزەگى 2010 جىلدىڭ 28 ماۋسىمى كۇنى ەل پرەزيدەنتى نۇرسۇلتان نازارباەۆتىڭ قاتىسۋىمەن بولعان تەلەكوپىر كەزىندە پايدالانۋعا بەرىلدى. وسى نىساننىڭ ىسكە قوسىلۋى ارقىلى وڭىردە ەنەرگەتيكانىڭ يمپورتتىق ۇلەسىن 90 پايىزدان 2 پايىزعا دەيىن تومەندەتۋگە جول اشىلدى.
مىنە, ەلباسى اقجايىقتاعى ەنەرگەتيكالىق تاۋەلسىزدىكتىڭ باستاۋى بولعان وسى گتەس-ءتىڭ ءبۇگىنگى تىنىس-تىرشىلىگىمەن تانىستى. مۇندا باتىس قازاقستان وبلىسىنىڭ اكىمى باقتىقوجا ءىزمۇحامبەتوۆ مەملەكەت باسشىسىنا 2010-2014 جىلدارى وبلىستا ۇدەمەلى يندۋستريالىق-يننوۆاتسيالىق باعدارلامانى ىسكە اسىرۋدىڭ جاي-كۇيى تۋرالى بايانداپ بەردى. يندۋستريالىق جوبالار ماكەتىمەن تانىسقان ەلباسى بۇل باعىتتا ورال وڭىرىندە تىندىرىلعان ىستەردى وڭ باعالادى. ۇجىم مۇشەلەرىنە جىگەر مەن دەم بەرە وتىرىپ, ولارمەن از-كەم وي-پىكىر الماستى. سول ساتتە ستانوك جانىندا جاس تا مىعىم جىگىت تۇردى. نۇرسۇلتان ءابىش ۇلى ونىڭ جانىنا كەلدى دە اتى-ءجونىڭ كىم دەپ ساۋال تاستادى.
– نيكولاي پونومارەنكو, – دەدى ول.
– ءوز جۇمىسىڭ ساعان ۇناي ما؟
– ارينە, ۇنايدى, نۇرسۇلتان ءابىش ۇلى.
– بايقاپ تۇرمىن, كورىپ تۇرمىن, مۇنداعى قۇرال-جابدىقتار مەن قوندىرعىلاردىڭ ءبارى دە جاڭا ەكەن. سونىڭ ءتىلىن جەتىك مەڭگەرۋ ءۇشىن بۇدان دا جاقسى ەڭبەك ەت. جاڭا قوندىرعىنىڭ ءتىلىن جەتىك بىلۋگە ۇمتىل, نيكولاي.
ەلباسى جاس جىگىتتىڭ جىگەرىن وسىلاي جانىدى.
– مىندەتتى تۇردە كوڭىل ءبولەمىن. بىلدىرگەن سەنىمىڭىزدى اقتايتىن بولامىن, نۇرسۇلتان ءابىش ۇلى, – دەدى ءوز كەزەگىندە كەۋدەسىن قۋانىش كەرنەگەن جاس مەحانيك.
كاسىپورىن ۇجىمىمەن كەزدەسۋ بارىسىندا ەلباسى, اسىرەسە, زاماناۋي تەحنيكانىڭ ءتىلىن مەڭگەرگەن جاس مامانداردىڭ بولاشاعىنا زور سەنىم ارتاتىنىن ايتتى. الماتى قالاسىنداعى ەنەرگەتيكا جانە بايلانىس ينستيتۋتىنىڭ تۇلەگى, ستانسا وپەراتورى ايگەرىم يحسانوۆا مەملەكەت باسشىسىنا جاس ماماندارعا كورسەتكەن قامقورلىعى مەن قولداۋى ءۇشىن ريزاشىلىعىن جەتكىزدى.
باتىس قازاقستان وبلىسىنا ساپارىنىڭ ەكىنشى جارتىسىندا نۇرسۇلتان نازارباەۆ وڭىردەگى اۋىلشارۋاشىلىق تاۋارلارىن وندىرۋشىلەرمەن كەزدەسىپ, ولاردىڭ نازارىن ازىق-ت ۇلىك قاۋىپسىزدىگىن ساقتاۋ جولىنداعى كەلەلى مىندەتتەرگە اۋداردى. قازاقستان, رەسەي جانە بەلارۋس مەملەكەتتەرى اراسىنداعى كەدەن وداعى بۇل باعىتتا اتقارىلاتىن ىستەردىڭ جاڭا كوكجيەكتەرىن اشتى, دەدى نۇرسۇلتان ءابىش ۇلى ءوڭىر فەرمەرلەرىمەن كەزدەسۋى كەزىندە. بيىل رەسپۋبليكادا ەگىننەن تاعى دا مول ءونىم جينالادى دەپ كۇتىلۋدە. سونىڭ ىشىندە 7-8 ميلليون توننا كولەمىندەگى استىقتى ەكسپورتقا شىعارۋ مۇمكىندىگى بار.
قىسقاسى, قازاقستاندا استىق ءوندىرىسى ەشقاشان اقساماق ەمەس. ءبىز, سونىمەن بىرگە, ەلدەگى مال شارۋاشىلىعىنىڭ ەكسپورتتىق الەۋەتىن ودان ءارى كوتەرۋدى نازاردان تىس قالدىرماۋعا ءتيىسپىز, دەپ ويىن ساباقتادى بۇدان كەيىن مەملەكەت باسشىسى. بيىل ەلىمىز ەكسپورتقا 60 مىڭ توننا ەت شىعارماق. الداعى مەجە – 180 مىڭ توننا. بۇل ىسكە ەجەلدەن ەتتى مال ءوندىرىسىن وركەندەتۋدە ءوز ءداستۇرى مەن تاجىريبەسى, تاريحى قالىپتاسقان اقجايىق ءوڭىرى سۇبەلى ۇلەس قوسا الادى دەپ سەنەمىن. تەك وسى ءداستۇردى بۇگىنگى زامانعى تەحنولوگيالىق ۇدەرىستەرمەن ساباقتاستىرا بىلگەن ءجون. بۇل ءۇشىن ىجداعاتتىلىق پەن تاباندىلىق كەرەك ەكەنىن ۇمىتپاڭىزدار. ءبۇگىنگى كۇنى ەلىمىز بۇكىلالەمدىك ساۋدا ۇيىمىنا كىرۋ قارساڭىندا تۇر. باسەكەگە قابىلەتتىلىكتىڭ سىنعا تۇسەر كەزى ناعىز وسى كەز.
ەلباسىمەن وي-پىكىر الىسۋعا «كروۋن-باتىس» كومپانياسىنىڭ جەتەكشىسى سەرىك قابيتحانوۆ, شارۋا قوجالىعىنىڭ باسشىسى سەرىك شونايبەكوۆ جانە «جايىق-ەت» جشس-ءنىڭ ديرەكتورى تيمۋر ەسكەندىروۆ قاتىسىپ, ساپالى ەت ءوندىرۋ جونىندەگى ءوز ۇسىنىس-تىلەكتەرىن مەملەكەت باسشىسىنا جەتكىزدى.
قازاقستان باسشىسى اقجايىققا ساپارىنىڭ قورىتىندىسى بويىنشا مۇندا تاۋەلسىزدىك تۇسىندا قول جەتكەن تابىستارعا وڭ باعا بەردى. ءيا, اقجايىقتىڭ ءبۇگىنگى ادىمدارى تايعا تاڭبا باسقانداي انىق, بەدەرلى ءارى ارشىندى ەكەنى تالاس تۋعىزبايدى. ءتاۋەلسىزدىكتىڭ توپشىسى ودان ءارى بەكي تۇسۋىنە باتىسقازاقستاندىقتاردىڭ قوسقان ۇلەسى تاۋەلسىزدىكتىڭ ەرتەڭگى تاريحىنان ورىن الارى انىق. ەلباسىنىڭ باتىس قازاقستان وبلىسىنا ساپارىنىڭ تاعى ءبىر ءتۇيىنى وسىنداي ويعا جەتەلەدى.
تەمىر قۇسايىن.
باتىس قازاقستان وبلىسى.
-----------------------------------------
سۋرەتتەردى تۇسىرگەندەر س.بوندارەنكو, ب.وتارباەۆ.
