ەل تاۋەلسىزدىگىنىڭ 20 جىلدىعىنا وراي جولعا شىققان ۇگىت-ناسيحات پويىزى توعىز جولدىڭ تورابىندا ورنالاسقان شەجىرەلى مەكەن قاندىاعاش قالاسىنا كەلدى.
قالانىڭ تەمىر جول ۆوكزالىندا ادەتتەگىدەي استانادان باستاۋ الىپ, ەلوردانىڭ ىستىق سالەمىمەن بىرگە جاناشىرلىق ءىلتيپاتىن الا كەلگەن پويىزدى قارسى الۋ سالتاناتى ءوتتى. وعان «نۇر وتان» حدپ وبلىستىق ءبولىمىنىڭ توراعاسى, وبلىستىق ءماسليحات حاتشىسى بالعالي ورداباەۆ, مۇعالجار اۋدانىنىڭ اكىمى, پارتيانىڭ اۋداندىق ءبولىمىنىڭ توراعاسى سەرىك شانعۇتوۆ پەن ارنايى پويىزدىڭ مۇشەلەرى قاتىسىپ, ءسوز سويلەدى. سالتاناتتى شارادان كەيىن قۇرامىندا «نۇر وتان» حدپ ورتالىق اپپاراتىنىڭ, ادىلەت, ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ, تۋريزم جانە سپورت مينيسترلىكتەرى مەن ۇلتتىق بانكتىڭ قىزمەتكەرلەرى بار كەرۋەن-پويىزدىڭ مۇشەلەرى ءوز سالالارى بويىنشا اۋدان تۇرعىندارىنىڭ سۇراقتارىنا جاۋاپ بەرىپ, ماسەلەلەرىن شەشۋ ءۇشىن قابىلداۋلار ءجۇرگىزۋدى جالعاستىردى.
مۇعالجار اۋدانى 1997 جىلى بۇرىنعى وكتيابر جانە مۇعالجار اۋداندارىن بىرىكتىرۋ ءناتيجەسىندە قۇرىلعان اۋدان. ونىڭ جەر كولەمى 27,8 مىڭ شارشى كم., حالقىنىڭ سانى – 67,4 مىڭ ادام. اۋداندا 3 قالا, 12 اۋىلدىق وكرۋگ بار. قاي جەردە بولسا دا ءاربىر ازاماتتىڭ جەكە باسىنىڭ پروبلەمالارى, كوپتەن بەرى شەشىلمەي جاتقان ءماسەلەلەرىنىڭ بولاتىنى جاسىرىن ەمەس. سوندىقتان اۋدان تۇرعىندارى ەلباسىنىڭ باستاماسىمەن جولعا شىققان «مەنىڭ قازاقستانىم» پويىزىن تاڭەرتەڭ ەرتەمەن تەمىر جول ۆوكزالىندا قارسى الىپ, ءوزدەرىن تولعاندىرىپ ءجۇرگەن ماسەلەلەرىن شەشۋ ءۇشىن اۋدان ورتالىعىندا وتكىزىلگەن بارلىق ءىس-شاراعا قاتىستى. بۇل كەزدەسۋلەردە ازاماتتارعا زەينەتاقىمەن قامتاماسىز ەتۋ, الەۋمەتتىك كومەك, الەۋمەتتىك ساقتاندىرۋ, زاڭدىق جانە بانكتىك قىزمەت كورسەتۋ ءماسەلەلەرى بويىنشا جاۋاپتار بەرىلدى. ماسەلەن, اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىندە زەينەتاقىنى كوتەرۋ, سوعىس جانە ەڭبەك ارداگەرلەرى مەن مۇگەدەكتەرگە كومەك كورسەتۋگە بايلانىستى ءماسەلەلەر قارالدى. ونىڭ ىشىندە, زەينەت جاسىن ازايتۋ, زەينەتاقىسىن كوبەيتۋ, كەزىندە دەنساۋلىعىنا بايلانىستى زەينەتكە ەرتە شىققان ازاماتتارعا جەڭىلدىكتەر بەرۋ ماسەلەسى كوتەرىلدى. كەزدەسۋدە ەڭبەك جانە حالىقتى الەۋمەتتىك قورعاۋ مينيسترلىگىنىڭ ماماندارى ازاماتتاردىڭ بارلىق وتىنىشتەرىن قاراپ, ولارعا ءتيىستى جاۋاپ بەرىلەتىنىن جەتكىزدى. وسى جەردە اۋدان تۇرعىندارى مينيسترلىكتىڭ ماماندارىنا وتىنىشتەرىن ايتىپ قانا قويماي, اۋداندا جۇمىسپەن قامتۋ, مۇگەدەكتەردىڭ ماسەلەسىن شەشۋدە ىستەلىنىپ جاتقان جۇمىستارعا توقتالىپ, بالالارى مەن نەمەرەلەرىنىڭ جۇمىسسىز جۇرمەي, ەڭبەكاقىسىن الىپ, ەل قاتارلى ازامات بولىپ قالىپتاسىپ جاتقاندارىن ايتتى. سوعان ريزاشىلىقتارىن ءبىلدىردى. جۇمىسپەن قامتۋ جانە الەۋمەتتىك باعدارلامالار ءبولىمىنىڭ باستىعى ايدىنعالي شوتوۆتىڭ ايتۋىنشا, اۋداندا جۇمىسقا جارامدى 37 000 ادام بولسا, سونىڭ ىشىندە جۇمىسسىز جۇرگەندەرى 109 ادام. بۇل اۋدان بويىنشا 0,7 پايىزعا تەڭ. قازىر وسى ازاماتتاردى جۇمىسپەن قامتۋ ءۇشىن بارلىق مۇمكىندىكتەر قاراستىرىلۋدا. مۇگەدەكتەرگە 50 پايىز جەڭىلدىك بەرىلىپ وتىر. وبلىستا 1,2,3 توپتاعى مۇگەدەكتەرگە اي سايىن 3 000 تەڭگە كولەمىندە كومەك بەرىلەدى. سونىمەن بىرگە وبلىس بيۋدجەتىنەن سوعىس ارداگەرلەرىنە تەڭەستىرىلگەن, ولاردىڭ جەسىرلەرى مەن اۋعان سوعىسى مەن تىل ارداگەرلەرىنىڭ كوممۋنالدىق قىزمەتى 50 پايىز جەڭىلدىكپەن تولەنسە, سوعىس ارداگەرلەرىنىڭ كوممۋنالدىق قىزمەت اقىسى 100 پايىز وبلىس بيۋدجەتىنەن تولەنىپ كەلەدى.
وسى كۇنى «نۇر وتان» پارتياسىنىڭ قابىلداۋ بولىمىندە ازاماتتار كوبىنە باسپانا ءماسەلەسى بويىنشا وتىنىشتەرىن ايتسا, اۋداندىق اۋرۋحانادا تۇرعىندارعا دارىگەرلىك كومەك كورسەتىلدى. ءادىلەت مينيسترلىگى مەن ۇلتتىق بانكتىڭ قىزمەتكەرلەرىمەن كەزدەسۋدە دە ازاماتتار وزدەرىنە تيەسىلى جاۋاپتارىن الدى.
وسىدان كەيىن قاندىاعاشتا وليمپيادا چەمپيوندارى ەرماحان ىبىرايىموۆ پەن يۋري مەلنيچەنكو باپكەرلەرمەن جانە سپورتشىلارمەن كەزدەسىپ, بالالارعا شەبەرلىك كلاستارىن كورسەتسە, اۋداندىق مادەنيەت ۇيىندە «بالالىق شاعىمنىڭ اسپانى» كوركەم ءفيلمى مەن «بايتەرەك» دەرەكتى ءفيلمى كورسەتىلدى.
كەشكە قاراي ءىس-شارا مەرەكەلىك كونتسەرتپەن جالعاستى.
داستان كەنجالين.
اقتوبە وبلىسى, مۇعالجار اۋدانى.
