استانادا الەۋمەتتىك ماڭىزى بار 15 جوبا قابىلداندى

ورتالىق كوممۋنيكاتسيالار قىزمەتىندە استانا قالاسى مەن ونىڭ اگلومەراتسياسىنىڭ تۇراقتى دامۋى جونىندەگى كەڭەستىڭ قىزمەتىنە ارنالعان ءباسپاسوز ءماسليحاتى ءوتتى. بريفينگكە «قالالىق شەشىمدەر بيۋروسى» اقپاراتتى-تالدامالىق ورتالىعىنىڭ ديرەكتورى داۋرەن قايساروۆ, استانا اكىمشىلىگى جانىنداعى «Elorda Aqparat» جشس مەديا حولدينگىنىڭ باس ديرەكتورى قايسار جۇماباي ۇلى, كەڭەس حاتشىلىعىنىڭ باسشىسى, استانا قالاسى اكىمىنىڭ كەڭەسشىسى اقمارال بايتەمىروۆا مەن  كەڭەس حاتشىسى الماسبەك ءجانابىلوۆ قاتىسىپ, جاڭادان قۇرىلعان كەڭەستىڭ قىزمەتى مەن مىندەتى تۋرالى كەڭىرەك ايتىپ بەردى. د.قايساروۆتىڭ ايتۋىنشا, كەڭەستىڭ باستى مىندەتى – قالا مەن ونىڭ اگلومەراتسياسىن تۇراقتى دامىتۋ ستراتەگياسىن ىسكە اسىرۋ,  ەلورداداعى قىزمەتتەر الدىندا تۇرعان كەشەندى ماسەلەلەردىڭ شەشىمىن ىزدەۋ, قالانىڭ ەكونوميكالىق الەۋەتىن جانە ينۆەستيتسيالىق قىزىعۋشىلىعىن دامىتۋ مەن جاقسارتۋعا باعىتتالعان ۇسىنىستار ازىرلەۋگە قولداۋ كورسەتۋ. –«تۇراقتى دامۋ» ۇعىمىنىڭ  ءوزى بەس باعىتتا جۇمىس ىستەيدى, – دەدى ول ءارى قاراي, – وعان ەكونوميكالىق, ەكولوگيالىق تۇراقتىلىق, تۇراقتى ينفراقۇرىلىم, ەنەرگەتيكا جانە يننوۆاتسيا, الەۋمەتتىك تۇراقتىلىق, باسەكەگە قابىلەتتىلىك جانە ستراتەگيالىق تۇراقتىلىق سياۇقتى باعىتتا كىرەدى. جاقىندا قالا اكىمىنىڭ توراعالىعىمەن كەڭەستىڭ كەڭەيتىلگەن وتىرىسى ءوتتى. ونىڭ قۇرامىنا وسى ماسەلەلەرمەن اينالىسىپ جۇرگەن 63 ساراپشى مۇشە بولدى. جيىندا قالانى دامىتۋعا ارنالعان كوتپەگەن ماسەلەلەر قارالدى. بريفينگتە استانا قالاسى اكىمىنىڭ كەڭەسشىسى كەڭەس الداعى ۋاقىتتا دا قالانىڭ اگلومەراتسياسىن دامىتاتىن قوزعاۋشى كۇش بولىپ, حالىقتىڭ كوپتەگەن الەۋمەتتىك-تۇرمىستىق پروبلەمالارىن شەشۋگە اتسالىساتىن ورگانعا اينالاتىنىن اتاپ ءوتتى.   ونىڭ ايتۋىنشا, قازىر قالانىڭ ساۋلەتى مەن داۋلەتى جىل سايىن دامىپ جاتقانىمەن شەشىلمەگەن كوپتەگەن پروبلەمالار بار. سونىڭ ىشىندە بالا-باقشا مەن مەكتەپتەردە ورىنداردىڭ جەتىسپەۋشىلىگى, حالىقتى تۇرعىن ۇيمەن قامتاماسىز ەتۋ, ادامنىڭ دەنساۋلىعىن ساقتاۋ  سياقتى ماسەلەلەر كۇن تارتىبىنەن تۇسپەي وتىر. – جاقىندا قالا اكىمى اسەت يسەكەشەۆتىڭ توراعالىعىمەن وتكەن كەڭەستىڭ العاشقى وتىرىسىندا استانانى 2020 جىلعا دەيىنگە دامۋ ستراتەگياسى جاريالاندى. سوندا الەۋمەتتىك ماڭىزى زور 15 جوبانى ىسكە اسىرۋ تۋرالى شەشىم قابىلداندى. بۇل جوبالاردىڭ كوبىسى الەۋمەتتىك پروبلەمالارعا ارنالعان. سوندىقتان «جۇمىلا كوتەرگەن جۇكە جەڭىل» دەگەندەي, الداعى كەزدە قوعام بەلسەندىلەرىمەن, ءوز ءىسمىن جاقسى بىلەتىن ساراپشىلارىمەن بىرگە جۇمىس ىستەسەك قالانى جان-جاقتى دامىتۋعا تولىق مۇمكىندىگىمىز بار, – دەدى ول. ال «Elorda Aqparat» جشس مەديا حولدينگىنىڭ باس ديرەكتورى قايسار جۇماباي ۇلى جيىندا ءوزى جەتەكشىلىك ەتەتىن مەكەمەنىڭ قىزمەتىن تانىستىرىپ, بولاشاقتا اقپارات سالاسى بويىنشا استانانانىڭ دامۋىنا قولدا بار مۇمكىندىكتى جاسايتىنىن ايتتى. داستان كەنجالين, «ەگەمەن قازاقستان»