تۇجىرىمدامالىق تۇرعىدا ماقۇلداندى

پارلامەنت سەناتىنىڭ الەۋمەتتىك-مادەني دامۋ كوميتەتىندە «نەكە (ەرلى-زايىپتىلىق) جانە وتباسى تۋرالى» كودەكسىنىڭ جوباسى قارالدى. كودەكستىڭ جوباسى قازاقستان رەسپۋبليكاسىندا نەكە-وتباسى قاتىناستارىن رەتتەۋگە, ولاردىڭ جۇزەگە اسىرىلۋىنىڭ كەپىلدىكتەرىن بەلگىلەۋگە, سونداي-اق وتباسى­نىڭ قۇقىقتارى مەن مۇددەلەرىن قور­عاۋ­دى قامتاماسىز ەتۋگە باعىتتالعان. كودەكس جوباسىن ازىرلەۋدىڭ ماقساتى نورماتيۆتىك قۇقىقتىق اكتىلەردىڭ قولدانىستاعى ەرەجەلەرىن كوديفيكاتسيالاۋ جانە نەكە-وتباسى قاتىناستارى سالاسىندا قوسىمشا نورمالار ەنگىزۋ بولىپ تابىلادى. وسى جوبادا نەكەنى قيۋدىڭ, توقتاتۋدىڭ, ونى جارامسىز دەپ تانۋدىڭ شارتتارى مەن ءتارتىبى ايقىندالعان, ەرلى-زايىپتىلاردىڭ, با­لا­نىڭ (بالالاردىڭ), اتا-انالاردىڭ, بالا اسى­راپ الۋشىلاردىڭ قۇقىقتارى مەن مىندەتتەرى ناقتىلانعان. سونداي-اق بالانى اسىراپ الۋ­دىڭ ءتارتىبى, قورعانشىلىق پەن قامقورشى­لىق­تى رەتتەۋ ماسەلەلەرى, وتباسى مۇشەلەرىنىڭ, ەرلى-زايىپتىلاردىڭ, بۇرىنعى ەرلى-زايىپ­تى­لاردىڭ جانە وتباسىنىڭ باسقا دا مۇشەلەرىنىڭ اليمەنتتىك مىندەتتەمەلەرى بەكىتىلدى. ودان باسقا قازاقستان رەسپۋبليكاسىنىڭ نەكە-وتباسى زاڭناماسى نورمالارىنىڭ شەتەلدىكتەرگە جانە ازاماتتىعى جوق ادامدارعا قول­دا­نىلۋ ەرەكشەلىكتەرى جانە تاعى باسقالار ايقىندالدى. كودەكستە سۋرروگات انا, بالانى تاربيەلەۋگە بەرۋ تۋرالى كەلىسىم جاساۋ جانە ونى بۇزۋ, ازاماتتىق احۋال اكتىلەرىن مەملەكەتتىك ورگانداردىڭ تىركەۋى ماسەلەلەرىن رەتتەيتىن جاڭا ەرەجەلەر بار. تۇجىرىمدامالىق تۇرعىدا ماقۇلدانعان جوبا پالاتا قاراۋىنا جىبەرىلدى, دەپ حابارلادى پارلامەنت سەناتىنىڭ ءباسپاسوز قىزمەتى.