ىقپالداستىقتىڭ وزەكتى ماسەلەلەرى قوزعالدى

كەشە ەرجان قازىحانوۆ قازاقستاننىڭ سىرتقى ىستەر ءمينيسترى رەتىندە ءوزىنىڭ بەيجىڭگە العاشقى رەسمي ساپارىن جاسادى. قىتايلىق ارىپتەسى, قحر سىرتقى ىستەر ءمينيسترى يان تسزەچي قازاقستان سىرتقى ساياسات ۆەدومستۆوسى باسشىسىمەن كەزدەسۋ وتكىزدى. بۇل كەزدەسۋ مەرەيتويلىق داتا قارساڭىندا بولىپ ءوتتى. الداعى جىلدىڭ باسىندا قازاقستان مەن قىتاي اراسىنداعى ديپلوما­تيا­لىق قارىم-قاتىناستاردىڭ ورنا­عا­نىنا 20 جىل تولادى. وسىعان وراي مينيسترلەر تاريحي ولشەم­مەن سالىستىرعاندا وسىنشاما قىسقا مەرزىمدە ءبىزدىڭ ەلدەرىمىز ۇلكەن جولدى وتكەنىن مالىمدەدى. «ءوزارا ءتيىمدى ىنتىماقتاستىققا نەگىز سالا وتىرىپ, قازاقستان مەن قىتاي ارىپتەستىكتىڭ ءار كەزەڭىندە ەكى ەلدىڭ ءارى قاراي جاقىنداي تۇسۋىنە دەگەن شىنايى نيەتتەرى مەن ءوزارا ۇستانىمدارىن ناقتى ىستەرمەن دالەلدەدى», دەپ اتاپ ءوتتى ە.قازىحانوۆ. تاراپتار قازاقستان-قىتاي قا­رىم-قاتىناسىنىڭ جان-جاقتى ستراتەگيالىق ارىپتەستىك دەڭگەيى­نە شىققانىن قاناعاتپەن اتاي وتى­رىپ, ءوزارا ءتيىمدى ىنتى­ماق­تاستىقتى تەرەڭدەتۋدىڭ ەڭ ما­ڭىز­دى فاكتورى جوعارى جانە اسا جوعارى دەڭگەيدەگى تۇراقتى ساياسي ۇنقاتىسۋ بولىپ تابىلاتىندى­عىن باسا ايتتى. مينيسترلەر اتاپ كورسەتكەندەي, ەكى ەل كوشباس­شى­لارىنىڭ – قازاقستان پرەزيدەنتى نۇرسۇلتان نازارباەۆ پەن قىتاي توراعاسى حۋ تسزينتاونىڭ ءبىر-بىرىنە دەگەن سەنىمدى جانە سىي­لاس­تىق قاتىناستارى جاڭا ءمۇم­كىندىكتەردى, ەكىجاقتى جانە كوپ­جاقتى تۇرعىداعى ىنتىماقتاس­تىق­تىڭ كەڭ اۋقىمدى ماسەلە­لە­رىن قامتيتىن پەرسپەكتيۆالىق سالالار مەن باعىتتاردى قاراس­تى­رۋعا بەرىك نەگىز جانە كۇشتى سەرپىلىس رەتىندە قىزمەت جاساپ وتىر. ىنتىماقتاستىقتىڭ ساياسي ۆەكتورىن جاڭا مازمۇنمەن تو­لىق­تىرۋ ماسەلەسىمەن قاتار, ەرجان قازىحانوۆ پەن يان تسزەچي ساۋدا-ەكونوميكالىق ىقپال­داس­تىق ماسەلەلەرىن دە تالقىعا سال­دى. سوڭعى ون جىل ىشىندە ءبىزدىڭ ەلدەرىمىز اراسىنداعى تاۋار اي­نالىمى 12 ەسەدەن اسا جوعارى­لا­دى. وسىنداي دامۋ ىرعاعىن ساق­تاعان جاعدايدا ەكى ەلدىڭ باس­شى­لارى اتاپ كورسەتكەندەي, 2015 جىلعا دەيىن تاۋار اينالىمى دەڭگەيىن 40 ملرد. دوللارعا جەتكىزۋگە مۇمكىندىك مول. سونىمەن قاتار, كەزدەسۋدە استانا مەن بەيجىڭ اراسىنداعى ەنەر­گەتيكا سالاسىنداعى بىرلەسكەن جوبالاردى جۇزەگە اسىرۋ, ور­تالىق ازيا – قىتاي كولىك جە­لىسىنىڭ ينتەگراتسياسىن دامىتۋ, اتوم ەنەرگەتيكاسى سالاسىنداعى جانە اگروونەركاسىپ كەشەنىندەگى ىقپالداستىقتى ارتتىرۋ بولاشا­عى زور باعىتتار رەتىندە اتاپ ءوتىل­دى. سونداي-اق قازاقستان مەن قى­­تاي­دىڭ, اتاپ ايتقاندا, اوسشك, بۇۇ جانە شىۇ سەكىلدى ۇيىم­دار شەڭبەرىندەگى ىنتىماقتاستىق ءما­سە­لەلەرى قوزعالدى. ءتۇرلى با­عىتتارداعى ورتاق باستامالارعا ءوزارا قولداۋ كورسەتىلىپ كەلە جات­قانىنا ريزاشىلىق ءبىلدىرىلدى. تاراپتار, سونىمەن قاتار, قىر­كۇيەك ايىنىڭ سوڭىندا تاري­حى­مىزدا العاش رەت جۇزەگە اسى­رى­لاتىن حالىق وكىلدەرىنىڭ جال­پىقىتايلىق جينالىسىنىڭ ءتور­اعاسى ۋ.بانگونىڭ قازاقستانعا سا­پارىنىڭ پراكتيكالىق تۇستا­رىن تالقىلادى. كەزدەسۋ اياسىندا تاراپتار كەي­بىر حالىقارالىق جانە اي­ماق­تىق كوكەيكەستى ماسەلەلەر بويىن­شا پىكىر الماستى.