قاشاندا وتتاي جانعان قاسىم جىرى

كوپ جايدىڭ كەزى كەلدى اشىلاتىن, كوپ ءىستىڭ ايتاتىن دا اشىپ اتىن. وزگەشە ولەڭ ءورى, تۋى بولعان, وزگەشە قۇدىرەتتى قاسىم اقىن.   كوپ ەدى اسىپ, تاسقان كەزى ارنادان, ول جايلى تالاي ۇلى ءسوز ارناعان. ودان سوڭ تالاي تۇلپار تۋعانمەنەن, ىلگەرى وعان جەتىپ, وزا الماعان.   «دۇنيەگە كەلەر ءالى تالاي قاسىم, ولار دا بۇل قاسىمدى ءبىر بايقاسىن». دەپ جازدى اسىل اعا وتتى ولەڭنىڭ, اسپاندا جارقىلداتىپ اق الماسىن.   قياعا قىران اقىن قانات كەرگەن, قاشاندا ءوز بيىگىن قالاپتى وردەن. كورسەتىپ ولمەس جىردان ونەگەنى, تالپىنعان تالاي جاسقا قانات بەرگەن.   ءبىر ءۇمىت تىنشۋ بەرمەي جاس جانىمدا, تالپىنىپ جىرعا قادام باسقانىمدا. اسىل نۇر كوكىرەگىمە ۇيالاتقان, قاسىم جىر جارقىلدادى اسپانىمدا.   سەكىلدى ءبىر عاجابى سۇيىكتى ەلدىڭ, قاسىمداي اسۋ بەرمەس بيىك كوردىم. قاسىم – جىر شىعار شىڭى, تۋى بولدى, مەندەگى ارمان, ماقسات, ۇمىتتەردىڭ.   مەن بۇرىن مۇنداي عاجاپ كورىپ پە ەدىم, ەلىتتىم ەرەن جىرعا, ەلىكتەدىم. اڭعاردىم اسىل جىردىڭ, قاسىم – جىردىڭ, نۇرلانتىپ ەل جۇرەگىن ەرىتكەنىن.   شىن سۇڭقار شىرقاي الماي تۇنشىققاندا, توبەگە شىعار قۇزعىن, شىمشىق, قارعا. جانسا دا جانى وتتى جىرمەن لاۋلاپ, قانشاما كەزىكتى اقىن قىرسىقتارعا.   كەمەل وي اسىپ جاتقان كەمەرىنەن, كوپ جايدى تولعاۋشى ەدى تەرەڭىنەن. ءبارىن دە كورە ءبىلدى, جەڭە ءبىلدى, داۋىلداي ورتكە تيگەن ولەڭىمەن.   وت شايناپ, الاۋ, جالىن جامىلاتىن, سالاتىن كەيدە ورتكە جانىن اقىن. قانشاما شاكىرتتەرى قالدى ارتىندا, قاسىمشا ويلاپ, اعىنان جارىلاتىن.   جۇرەكتى قاسىم جىرى نۇرعا مالىپ, بيىكتە قاسىم تۋى تۇر قادالىپ. ارمانداي اينالادى ساعىنىشقا, تاۋلارداي كورىنەدى تۇلعالانىپ.   جاقسىعا اقىن جانى عاشىق ەدى, مارجانداي ءسوز مارجانىن شاشىپ ەدى. عاسىرلىق اقىن تويىن تويلاپ جاتىر, بۇل كۇندە ءوزى سۇيگەن اسىل ەلى.   ەركىندىك العان قازىر سۇيگەن ەلى, كوپ ەلدەن ەڭسەسى وزىق ىرگەدەگى. اقىنعا بەردى كوشە, مەكتەپ اتىن, ءبىر كەزدە ءبىر باسپانا تيمەپ ەدى.   جاسىن جىر جانارتاۋداي اتىلاتىن, بىردە نۇر, بىردە مۇڭعا باتىراتىن. ساقتاعان جۇرەگىندە اياۋلى ەلى, ارداقتاپ جاتىر بۇگىن اقىن اتىن.   التىن ءتاج سەكىلدەنگەن ارقاداعى, توي جاساپ جاتىر بۇگىن قارقارالى. تەربەگەن قاسىم جىرى, قاسىم ءانى, بىزدەگى بايتاق ءوڭىر, بار قالانى.   شىققانداي شىرقاپ شىڭعا, قىرعا قاسىم, شىن تىلەك پەن قۇرمەتتەن نۇرلاناسىڭ. جاساۋدا اسىل اقىن ۇلى تويىن, بىلەتىن قالىڭ ەلى جىر باعاسىن.   اقىننىڭ ورىندالىپ ۇلى ارمانى, قونعانداي قولىڭا كەپ قيالداعى. قاشاندا وتتاي جانعان قاسىم جىرى, جىلىتىپ جۇرەكتەردى تۇرار ماڭگى. ماحمۇتباي امىرە ۇلى, قازاقستان جازۋشىلار وداعىنىڭ مۇشەسى. قىزىلوردا.