استانادا اتىراۋ, جامبىل جانە شىعىس قازاقستان وبلىستارىنىڭ كۇندەرى وتۋدە
ەلباسى نۇرسۇلتان نازارباەۆتىڭ جارلىعىمەن 2011 جىل تاۋەلسىزدىكتىڭ 20 جىلدىعى دەپ جاريالانعانى بەلگىلى. «بەيبىتشىلىك پەن جاسامپازدىقتىڭ 20 جىلى» – ءبىزدىڭ مەرەيتويىمىزدىڭ ۇرانى وسى. تاۋەلسىزدىك جىلدارىندا قازاقستان جولىنىڭ – بوستاندىق, بىرلىك, تۇراقتىلىق, وركەندەۋ سەكىلدى ارقاۋلىق قۇندىلىقتارى قالىپتاستىرىلدى» دەپ اتاپ كورسەتتى ەلباسى بيىلعى جولداۋىندا. وسى بۇكىلحالىقتىق شاراعا وراي ارنايى مەملەكەتتىك كوميسسيا قۇرىلىپ, مەرەكەنىڭ جالپىۇلتتىق جوسپارى بەكىتىلدى. مىنە, وسى مەملەكەتتىك جوسپارعا سايكەس ەلىمىزدىڭ باس قالاسىندا بارلىق وبلىستاردىڭ كۇندەرىن وتكىزۋ بەلگىلەنگەن بولاتىن. كەشە سول اۋقىمدى شارا شىمىلدىعىن اتىراۋ, جامبىل, شىعىس قازاقستان وبلىستارى اشتى. تومەندەگى ماقالالاردا اتالمىش وبلىستاردىڭ استاناداعى كۇندەرى كورىنىس تاپقان.
شۇعىلالى شىعىس شاقىرادى
ەل تاۋەلسىزدىگىنىڭ 20 جىلدىعىنا ارنالعان شارالار شەڭبەرىندە باستالعان استاناداعى وبلىس كۇندەرىنىڭ اشىلۋ سالتاناتىن شىعىس قازاقستان وبلىسى باستادى. شىعىسقازاقستاندىقتار وزدەرىنىڭ ەلورداداعى كۇندەرىن «شۇعىلالى شىعىس شاقىرادى» اتتى تەاترلاندىرىلعان كاۆالكادامەن اشتى. ەلوردانىڭ ورتالىق كوشەلەرىمەن مەرەكەلىك رۋحتاعى شىعىسقازاقستاندىقتاردىڭ شەرۋى ءوتتى. وبلىس كۇندەرى اياسىندا وتكىزىلگەن بۇل كارناۆال استانالىقتار كوڭىلىنەن شىقتى.
جالپى, شىعىس قازاقستان وبلىسى ەلىمىزدىڭ الەۋمەتتىك-ەكونوميكالىق ءوسۋ جولدارىندا ەرەكشە ورىن الىپ وتىرعان ءوڭىر. وبلىس ايماعىندا جالپى رەسپۋبليكا قورلارى مولشەرىنە شاققاندا قورعاسىننىڭ شامامەن 24 پايىزى, مىرىشتىڭ 41 پايىزى, مىستىڭ 45 پايىزى شوعىرلانعان. ءتۇستى مەتالدىڭ قورى شامامەن 25 كەن ورنىنا تيەسىلى. «ءۇلبى مەتاللۋرگيا زاۋىتى» اق الەمدىك دەڭگەيدەگى بىرەگەي ءونىم سانالاتىن اتوم ستانسالارىنا قاجەتتى وتىن تۇرلەرىن, بەريلي, تانتال وندىرەدى. «جاڭا مەتاللۋرگيا» جوباسى اياسىندا «قازتسينك» جشس جاڭادان مىس بالقىتۋ جانە ەلەكتروليز زاۋىتىن ىسكە قوسقان. وبلىستاعى تيتان-ماگني كومبيناتى تيتان قۇيمالارى مەن بالقىمالارىن شىعارۋ جونىندەگى يننوۆاتسيالىق جۇمىستى اياقتاپ قالدى. وبلىستاعى «ازيا اۆتو» كولىك قۇراستىرۋ زاۋىتىنىڭ قازىرگى ءوندىرىس كولەمىن ودان ءارى ۇلعايتۋ جۇمىسى جالعاسۋدا.
شىعىس قازاقستان وبلىسى ەلىمىزدە باستاۋ العان ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسى اياسىنداعى ينۆەستيتسيا تارتۋ ماسەلەسى بويىنشا ەلىمىزدە العاشقى ورىندا تۇر. قازىر شىعىس قازاقستان وبلىسىنىڭ ينۆەستيتسيالىق پورتفەلى جالپى قۇنى 603,6 ميلليارد تەڭگەنى قۇرايتىن 34 ءىرى يندۋستريالىق جوبادان تۇرادى. وتكەن جىلى وسىنداي قارقىندى وندىرىستىك دامۋ جەتىستىكتەرى ناتيجەسىندە قوسىمشا 97,3 ميلليارد تەڭگەنىڭ ونىمدەرى شىعارىلىپ, 1,5 مىڭ جاڭا جۇمىس ورنى اشىلدى.
شىعىسقازاقستاندىقتار مىنە, وسىنداي ءوندىرىستىك جەتىستىكتەرمەن قوسا, اۋىل شارۋاشىلىعى سالاسىندا دا ۇلكەن ناتيجەلەرگە قول جەتكىزىپ وتىر. وعان تاۋەلسىزدىگىمىزدىڭ 20 جىلدىعى مەرەكەلەرى شارالارىنىڭ اياسىندا وتكىزىلىپ وتىرعان استانا قالاسىنداعى شىعىس قازاقستان وبلىسىنىڭ كۇندەرىندە كوزىمىز انىق جەتكەندەي. ەلوردادا شىعىسقازاقستاندىقتار ۇيىمداستىرعان اۋىلشارۋاشىلىق جارمەڭكەسىنە 17 اۋداننان 83 كاسىپورىن قاتىسىپ وتىر. جارمەڭكە بارىسىندا ۇيىمداستىرىلعان كورمەلەرگە وسكەمەن جانە سەمەي قالاسىنىڭ ءىرى كومپانيالارى وزدەرى شىعاراتىن اۆتوموبيلدەر, اۆتوبۋستار جانە تراكتورلاردى كەلۋشىلەرگە پاش ەتتى.
استانا قالاسى اكىمدىگى الدىنداعى الاڭدا شىعىس وڭىرىنە ءتان قولونەر بۇيىمدارىنىڭ كورمەسى ۇيىمداستىرىلدى. سونىمەن بىرگە جارمەڭكەدە «بال جانە جاڭعاق فەستيۆالى», «قىمىز مەرەكەسى» جانە باسقا دا شارالار وتكىزىلمەك. سونىمەن بىرگە استانالىقتار شىعىسقازاقستاندىق ونەر شەبەرلەرىنىڭ كۇمبىرلەگەن كۇيى مەن اۋەزدى انىنە دە ءتانتى بولادى.
«بايتەرەك» ۇلتتىق ءباسپاسوز ورتالىعىندا وتكەن ءباسپاسوز ءماسليحاتىندا شىعىس قازاقستان وبلىسىنىڭ اكىمى بەردىبەك ساپارباەۆ استانا قالاسىندا ءوتىپ جاتقان وبلىس كۇندەرى اياسىنداعى وسىنداي جەتىستىكتەر مەن شارالار تۋرالى جان-جاقتى اڭگىمەلەپ بەردى. سونداي-اق ءوڭىر باسشىسى وبلىستىڭ بولاشاقتاعى الەۋمەتتىك-ەكونوميكالىق دامۋ باعدارلارى تۋرالى دا بايان ەتتى. بەردىبەك ساپارباەۆ استانالىق باق وكىلدەرىنىڭ قويعان سان-الۋان سۇراقتارىنا تياناقتى جاۋاپ بەردى.
كونە تارازدان كەلگەن كوش-كەرۋەن
قازاقستان رەسپۋبليكاسى ءتاۋەلسىزدىگىنىڭ 20 جىلدىعىنا ارنالىپ وتكىزىلىپ وتىرعان استانا قالاسىنداعى جامبىل وبلىسىنىڭ مادەني كۇندەرى ۇلىلاردى ۇلىقتاۋدان باستاۋ الدى. ەلورداداعى جامبىل جاباەۆ ەسكەرتكىشى الدىنداعى الاڭقاي مەرەكەدەگىدەي بەزەندىرىلگەن. ۇلى جىبەك جولىنىڭ بويىنا ورنالاسقان قاسيەتتى تاراز ءوڭىرى – كيەلى جامبىل جەرى قاشاندا ۇلىلارىن ۇلىقتاپ وتكەن. ءجۇز جاساپ, ارتىندا ولمەس مۇرا قالدىرعان, ءوز زامانىندا «حح عاسىردىڭ گومەرى» اتانعان ۇلى اقىن, تەڭدەسسىز جىراۋ جامبىل بابا ەسكەرتكىشىنە وبلىس باسشىلىعى, ەلىمىزدىڭ پارلامەنتىنىڭ دەپۋتاتتارى, ءوڭىردىڭ قۇرمەتتى ازاماتتارى گۇل شوقتارىن قويدى.
وسىدان كەيىن بۇل سالتاناتتى توپ اتى اڭىزعا اينالعان داڭقتى قولباسشى باۋىرجان مومىش ۇلىنىڭ استانا قالاسىنداعى ەڭسەلى ەسكەرتكىشىنىڭ الدىنا كەلدى. وسكەلەڭ ۇرپاققا وتانىن ءسۇيۋدىڭ بالاماسىز ۇلگىسىن كورسەتىپ كەتكەن باتىر بابامىزدىڭ زاڭعار ەسكەرتكىشى بۇگىندە باس قالامىزعا اسقاق رۋح بەرىپ تۇر. ەسكەرتكىش الدىنا توسەلىنگەن القىزىل كىلەمشەنىڭ ۇستىمەن سالتاناتتى قادام باسقان ەكى اسكەري قىزمەتكەر قۋاتتى مارش ۇنىمەن «جامبىل وبلىسى اكىمىنەن» دەگەن جازۋى بار لەنتامەن بەزەندىرىلگەن گۇل تولى سەبەتتى باۋىرجان مومىش ۇلى ەسكەرتكىشىنىڭ تۇبىنە قويدى. ودان كەيىن وبلىس اكىمى قانات بوزىمباەۆ, جامبىل وبلىسىنان شىققان بەلگىلى تۇلعالار حالىق قاھارمانى باقىتجان ەرتاەۆ, قازاقستاننىڭ اتاقتى ارتىستەرى ءاسانالى ءاشىموۆ, تۇڭعىشباي جامانقۇلوۆ, قازاقستان رەسپۋبليكاسى پارلامەنتىنىڭ دەپۋتاتتارى جانە باسقا دا رەسمي ادامدار باتىر ەسكەرتكىشىنە تاعزىم ەتتى.
ەلورداداعى جامبىل وبلىسىنىڭ مادەني كۇندەرى اياسىندا وبلىس اكىمى قانات بوزىمباەۆ استانالىق باق وكىلدەرىمەن باسپاسوز ءماسليحاتىن وتكىزدى. ءوڭىر باسشىسى وبلىستىڭ الەۋمەتتىك-ەكونوميكالىق دامۋ جاعدايىنا جان-جاقتى توقتالىپ, بۇگىنگى وبلىس كۇندەرى شەڭبەرىندە ۇيىمداستىرىلىپ وتىرعان «كونە تاراز جارمەڭكەسى» شاراسى تۋرالى كەڭ ماعلۇمات بەردى.
استاناداعى «كونە تاراز ءجارمەڭكەسى» 8-9 قىركۇيەك كۇندەرى «حان شاتىر» ماڭىنداعى ۇلكەن الاڭدا جالعاسىن تاپپاق. وبلىستىڭ اۋىلشارۋاشىلىق تاۋارلارىن وندىرۋشىلەرى بۇل جارمەڭكەگە ءوز ونىمدەرىن مولىنان اكەلىپتى. ساۋدا-ساتتىق 42 دۇڭگىرشەكتە ءجۇرگىزىلەدى. جارمەڭكەدە وبلىس كاسىپكەرلەرى ەلوردا تۇرعىندارىنا 36,4 مىڭ كيلو ەت ءونىمدەرىن, 4 مىڭ كيلو شۇجىق, 4,3 مىڭ كيلو ءسۇت ونىمدەرىن, 40 مىڭ دانا جۇمىرتقا, 40 مىڭ كيلو بالىق, 500 كيلو بال, 1 مىڭ كيلو تۇز, 124,5 مىڭ كيلو كوكونىس پەن جەمىس-جيدەك, 20 مىڭ كيلو باقشا داقىلدارىن ۇسىنادى. جارمەڭكە باعاسى استانا بازارلارى باعاسىنان 15-20 پايىز تومەن.
«كونە تاراز جارمەڭكەسى» جامبىل وبلىسىنىڭ استانا قالاسىنداعى مادەني كۇندەرى شەڭبەرىندە وتكىزىلىپ وتىرعاندىقتان بۇل كۇندەرى ساۋدا-ساتتىق شارالارىمەن قاتار ەلوردا جۇرتشىلىعى مەن قوناقتارعا كورمە تۇرىندە ەجەلگى اۋليەاتا جەرىنىڭ كونە ءداۋىردەگى ساۋدا مادەنيەتى, وڭىردە وندىرىلەتىن ونىمدەر كورسەتىلەدى. سونىمەن بىرگە, جارمەڭكەنىڭ العاشقى كۇنى جامبىل وبلىسى ونەرپازدارىنىڭ ۇلكەن كونتسەرتتىك باعدارلاماسى ۇسىنىلادى. وبلىس كۇندەرى ەل تاۋەلسىزدىگىنىڭ 20 جىلدىعىنا ارنالىپ وتىرعاندىقتان بۇل كۇندەرى باس قالا تۇرعىندارى مەن قوناقتارى جامبىل وبلىسى اگروونەركاسىپ كەشەنىنىڭ 20 جىلدىق دامۋ جەتىستىكتەرىمەن تانىساتىن بولادى.
التاي اراسىنىڭ بالى داۋا
شىعىس قازاقستان تاڭداي قاقتىرار تاماشا بالىمەن دە تانىمال – التاي ارالارىنان الىناتىن بالدىڭ جۇپار ءيىسى, ءدامى مەن شيپالىق قاسيەتى الەمدە تەڭدەسى جوق دەپ سانالادى. بۇعان قوسا وسىدان ءبىر جارىم عاسىر بۇرىن وسكەمەننىڭ ىرگەسىنە العاشقى ارالاردى اكەلىپ, قولعا ۇستاي باستاعان. سول سەبەپتى شىعىس قازاقستان وبلىسى ورتالىق ازيا ايماعىندا, سىبىردە جانە قيىر شىعىستا ومارتا شارۋاشىلىعىنىڭ وتانى بولىپ سانالادى. ەلىمىزدە ءوندىرىلەتىن بالدىڭ 80 پايىزعا جۋىعى شىعىس قازاقستاننىڭ ۇلەسىندە. سوندىقتان حالىقارالىق بال فەستيۆالىنىڭ ءدال ءبىزدىڭ ءوڭىردە وتكىزىلۋى زاڭدىلىق. وسى ورايدا II حالىقارالىق بال فەستيۆالىنە وبلىس اكىمى ب.ساپارباەۆتىڭ باستاماسىن قولداپ, الەمنىڭ 9 ەلىنەن وكىلدەر ارنايى كەلىپ قاتىسقاندىعىن اتاپ ايتقىم كەلەدى.
مەنىڭ اكەم ۆيكتور يمانباەۆ ءومىر بويى بال ومارتاسىن ۇستاپ كەلەدى. كاتونقاراعاي اۋدانىندا ءبىزدىڭ ومارتامىزدان الىناتىن بال جوعارى باعالانادى. قازىر اكەم ءوزىنىڭ نەمەرەلەرىن دە وسى كاسىپكە باۋلىپ, سوڭعى جىلدارى «يمانباەۆ» شارۋا قوجالىعىن قۇردى. التاي ءوڭىرىنىڭ سۋلى دا نۋلى ولكەسىنە قونىستانعان «نوۆو-پوليكوۆكا» اۋىلىندا ورنالاسقان «يمانباەۆ» شق-نىڭ بال ارالارى تابيعاتتىڭ تاماشا وڭىرىندەگى سان ءتۇرلى گۇلدەردىڭ شىرىنىن جيناپ, بالعا اينالدىرادى.
بۇگىندە «يمانباەۆ» شق-نىڭ بال ومارتالارىندا 100 ارا-وتباسى بار. بۇل ارا-وتباسىلارىنىڭ ارقايسىسى ءبىر ومارتاعا بال جينايدى. سوندا ماۋسىم ىشىندە ءاربىر ارا-وتباسى ءبىر فلياگا بال بەرەدى. وبلىس باسشىسىنىڭ باستاماسىمەن بىلتىردان باستاپ ءبىزدىڭ وبلىسىمىزداعى بارلىق مەكتەپتەردىڭ وقۋشىلارىنا جەرگىلىكتى بيۋدجەتتىڭ ەسەبىنەن مىندەتتى تۇردە بالمەن تاماقتاندىرۋ جونىندەگى قاناتقاقتى ءىس-شارا قولعا الىندى. ءبىز ءوزىمىزدىڭ جەكە شارۋاشىلىعىمىزدان الىناتىن ءونىمدى ماڭايداعى مەكتەپتەرگە دە تاپسىرامىز.
اۋدان اكىمىنىڭ ورىنباسارى سەرگەي ءمۇباراكوۆتىڭ جانە اۋداندىق كاسىپكەرلىك ءبولىمىنىڭ باستىعى دارحان الداجاروۆتىڭ كومەگىمەن ءبىز وبلىستا وتكىزىلىپ تۇراتىن اۋىلشارۋاشىلىق جارمەڭكەلەرىنە تۇراقتى تۇردە قاتىسىپ تۇرامىز. مىنە, تاۋەلسىزدىگىمىزدىڭ 20 جىلدىعىنا وراي ەلىمىزدىڭ باس قالاسى استانادا وتكىزىلىپ وتىرعان شىعىس قازاقستان وبلىسىنىڭ كۇندەرىنە دە ءوزىمىزدىڭ تارتۋ-تارالعىلارىمىزدى الىپ كەلىپ قالدىق. مەن بۇل جولى استانالىق تۇتىنۋشىلارعا التاي وڭىرىنەن 1,5 توننا شيپالى بال اكەلدىم. ەلوردا تۇرعىندارى ءبىزدىڭ اكەلگەن ونىمدەرىمىزدى زور قىزىعۋشىلىقپەن الىپ جاتىر.
كەشە استانا قالاسىنا كەلگەندە مەن ەرتەگىلەر ەلىنە كىرگەندەي اسەر الدىم. مۇنداي تاماشا قالادا تۇراتىن تۇرعىندار قانداي باقىتتى. تاۋەلسىز ەلىمىزدىڭ مەرەيى وسە بەرسىن.
باقتى الۋەتوۆا, «يمانباەۆ» شق جەتەكشىسى.
شارۋا كەڭەيىپ, تابىس مولايىپ كەلەدى
بيىل ەلىمىزدىڭ ءتاۋەلسىزدىك العانىنا 20 جىل تولىپ وتىر. مەن دە وسى عۇمىرىمنىڭ 20 جىلىن ەرەكشە قاناعاتتانعاندىق سەزىممەن ەسكە الامىن. وسى جىلدار بويى مەن مال وسىرۋمەن اينالىسىپ كەلەمىن. ەلباسى نۇرسۇلتان نازارباەۆتىڭ اۋىل ەڭبەككەرلەرىنە كورسەتكەن كومەگىنىڭ ارقاسىندا وسىدان 10 جىلدان استام بۇرىن «جافار» اتتى شارۋا قوجالىعىن قۇرىپ الدىم. ارينە, باستاپقى كەزدە قيىندىقتار بولدى.
قازىر مەنىڭ شارۋا قوجالىعىمدا 70 ساۋىن سيىر, 45 بورداقىعا قويىلعان وگىزشە جانە 100-دەن استام تايىنشا بار. قوستوبە اۋىلدىق وكرۋگىنە قاراستى تالاس اۋىلىندا 25 ادامدى جۇمىسپەن قامتىپ وتىرمىن. مەن الدىمەن وگىزشەلەردى بورداقى الاڭىنا قويىپ, سەمىرگەننەن كەيىن ەتكە وتكىزەمىن.
سوڭعى جىلدارى مەملەكەت باسشىسى اۋىل شارۋاشىلىعى سالاسىنداعى كاسىپكەرلەرگە شىنايى كوڭىل ءبولىپ, ەلىمىزدىڭ ەت ەكسپورتتايتىن الەۋەتىن ارتتىرۋ جونىندە كەلەلى مىندەتتەر قويدى. وسىعان بايلانىستى مەن مەملەكەتتىڭ «سىباعا» باعدارلاماسى بويىنشا قارجى الىپ, شارۋاشىلىعىمدى ودان ءارى كەڭەيتۋدى قولعا الدىم.
ءبىزدىڭ بايزاق اۋدانى استانا قالاسىنداعى وبلىس كۇندەرى شەڭبەرىندە وتكىزىلىپ وتىرعان ءجارمەڭكەگە 50 تونناعا جۋىق ەت ءونىمدەرىن, 20 توننا كارتوپ, 20 توننا پياز جانە باسقا كوكونىس ءونىمدەرىن اكەلدى. ەلوردا تۇرعىندارىنا ۇسىنىلىپ وتىرعان بۇل اۋىلشارۋاشىلىق ونىمدەرىندە مەنىڭ شارۋا قوجالىعىمنىڭ دا قوماقتى ۇلەسى بار.
رۇستەم سۇلەيمانوۆ, «جافار» شارۋا قوجالىعىنىڭ جەتەكشىسى.
اتىراۋلىقتار تارتۋى قوماقتى
كاسپي تەڭىزى جاعاسىنان ەلورداعا باعىت العان اتىراۋ وبلىسىنىڭ كوش-كەرۋەنى 7 قىركۇيەك كۇنى استانا قالاسىنا كەلىپ جەتتى. وسى كوشتىڭ العى ساپىندا كەلگەن قىزىلقوعا اۋدانى «جاسقايرات اسىل تۇقىمدى قوي زاۋىتى» جشس-ءنىڭ ديرەكتورى تولەگەن ءجاسيموۆتى اڭگىمەگە تارتقان ەدىك. «ارمىسىزدار, استانالىق اعايىندار! اۆتوكولىكپەن 2700 شاقىرىم جول ءجۇرىپ, تەڭىز تارتۋلارىن الا كەلدىك», دەپ باستادى ول ءوز ءسوزىن.
– مەنىڭ «جاسقايرات» جشس-ءىن باسقارعانىما ءبىراز جىلدىڭ ءجۇزى بولدى. كەشەگى وكپەنى قىسقان وتپەلى كەزەڭدە اقتىلى قويدان ايرىلىپ قالا جازداعان كۇندەرىمىز دە بولعان. تاۋبە, مەملەكەت باسشىسى نۇرسۇلتان نازارباەۆتىڭ شىنايى قامقورلىعىنىڭ ارقاسىندا اۋىل تۇرمىسى دا قاتارعا قوسىلا باستادى. قازىر ءبىزدىڭ «جاسقايرات» شارۋاشىلىعىندا 11 مىڭ قوي بار. ءىرى قارا مەن جىلقىنى قوسپاعاندا, 100 تۇيە ءوسىرىپ وتىرمىز. 1000 گەكتاردان استام جەرگە ەگىن سەبەمىز. ءداندى-داقىلدار ونىمىنەن نەگىزىنەن كۇنباعىس مايىن وندىرەمىز.
«ەلدە بولسا, ەرنىڭ كەزەرمەيدى» دەگەندەي, تابىسىمىز جامان ەمەس. جاسقايرات اۋىلىنىڭ تۇرعىندارى تۇگەلدەي دەرلىك, ياعني ءجۇزدەن استام ادام وسى سەرىكتەستىكتە ەڭبەك ەتەدى. تابىستارى بارشىلىق. اۋىلىمىزدا ۇلكەن ورتا مەكتەپ جانە باسقا الەۋمەتتىك مەكەمەلەر جۇمىس ىستەيدى.
تاۋەلسىزدىگىمىزدىڭ 20 جىلدىعىنا بايلانىستى وتكىزىلىپ وتىرعان استاناداعى اتىراۋ وبلىسىنىڭ كۇندەرىنە وبلىسىمىزدىڭ 8 اۋدانىنان جانە 1 قالادان كاسىپكەرلەر وزدەرىنىڭ ونىمدەرىن اكەلدى. باسقاسىن ايتپاعاندا, ءوزىم باسقاراتىن سەرىكتەستىك ەڭبەككەرلەرى بۇل جارمەڭكەگە 2 توننا قوي ەتىن, 2 توننا سازان بالىعىن جانە وڭىرىمىزدە وندىرىلەتىن باسقا دا ونىمدەردى اكەلدىك, دەيدى سوزىنە نىق, ىسىنە سەنىمدى سەرىكتەستىك باستىعى تولەگەن جاسيموۆ.
بەتتى ۇيىمداستىرعان جىلقىباي جاعىپار ۇلى, سۋرەتتەردى تۇسىرگەن ورىنباي بالمۇرات.
